ROA-ROA

NINNA NA JOLO, nga binoto antong sanga na gabus ato na peto ba carito on, goarna pentong carito ni carito: adong mada dua bayo na tarrumo parange ni alakna i sada banua. Atia adong pamilian "calon wakil ni si tuan na jaji" i banua ni alai i na simbur mada boto, topek musengtong maso i adong sapulu alak na giot pilion on na mancalon jadi "calon wakil ni si tuan na jaji" di banua i, i ma Jabolut, Jalandit, Japinasa, Japorngas, Jatungir, Jabiaowok, Jalosung, Jalage, Jagete, dohot Jamonis. Songon na somal muda mamili "calon wakil ni si tuan na jaji", ibaen mantong gambar-gambar ni calonnai i karotes na bontar so isusuk alak-alak nadong i banua i sanga na ise do giot ni roa nia. I karotes na bontar i, inda ba gambar ni "calon wakil ni si tuan na jaji" i, tai ba gambar ni buah-buahan do pilion songon arambir, eme, tarutung, apundung, manggis, lancat, pining, tobu, sotul, dohot onas.

Pas incogot get mamili "calon wakil ni si tuan na jaji" i banua i, borngin nai ke mantong Jaamot tu jambur an giot minum kopi paet. Indape tolap tu jambur i, adong mada sada bayo manopotkon ia, oni mandok obar: "Jaamot, incogot ulang lupa da mamili tulangta, gambarna sotul da!". 

Ro ning Jaamot: "Ala sondia mei baya, mang sapokat dot alak bagas nangkan mamili lancat!".

Ro alus ni ning bayo i mulak: "Ah...na momo mei, o...ison tolu lambar na balau, jagit bo !"

Bulus antong ijagit Jaamot epeng i, dung i mangkuling ia: "Anggo songon on antong banamon, incogoi isusuk mei gambar sotul i!" laos ke ia maripas-ipas tu lombang giot tu aek na godang.

Pas hum na lalu dope ia tu topi dalan godang i mulak, ro muse sada bayo na asing manopotkon ia oni mendok obar: "Paingot janjintai do da amangboru, rap ita susukma gambar tarutung incogot, i son bo parkopi ni amangboru", salaos pamasuk salambar epeng na rara tu caku ni Jaamot. 

Ro ning Jaamot: "Ala sonjia mei te, angkon na gambar manggis muse do ning alak bagas julukon nami boto incogot !"

Ro ning bayo i: "Tai adi mang marjanji ita adi gambar tarutung do susukon incogot, ala amangboru, o...i son bo salambar nai tambana ambaen parsigaret ni amangboru !" Ning ia salaos menggolomkan epeng na rara salambar tu tangan ni Jaamot.

Dung i antong mangkuling Jaamot: "Jadima, uingot mei janjintai !"

Ira-ira satonggak nai so tolap tu jambur i, pasuo Jamot dohot dongan sarosu nia Japalar di dalan-dalan i, bulus mangkuling Japalar: "Biado...piga golom do jabat saborngin on !"

Ro ning Jaamot: "Nga uetong ba le, tai sanga ise sajope na ro manggolomkon, uoloon soni sanga aha giot ni roana, porlu dei jau sudena i, na ponting pol caku niba, kan?"

"Olo, au pe ba songon i do ubaen, sakali maia saulak na songon on, na ponting marbual sapoken on tele!" Ning Japalar muse antong, oni rap matukakkak alai na dua.

Tolap alai na dua tu jambur i, rupa alak na i jambur i dompak martongkari di n menyise parhalan alak-alak na dapotan "epeng na milas" songon na i cakuon Jaamot dohot Japalar i. Ro ning na sa, inda na borkat i epeng na songonian, harom dei ningia. Tai, ro muse ning na asing, anggo epeng nai do inda harom i, alak na manirimo nai dei na mardosa pala ipake ia epeng nai ambaen kaporluan nia misalna panabusi ni dahanon. Oni, adong muse antong antong na marpandapot: epeng na iambur-amburkon ni "calon wakil ni si tuan na jaji" i, inda na epeng nia ia, ampot epeng na itangko do, i ma so momona ilala ia mangambur-amburkonna. Inda ba le...ning sada alak muse, bayo i kan alak na maradong dei samatua muloi do sian aompung ni ompung nia, anggo epeng hum na saian do, "epeng receh" dei jalai, ngana comeh kalai i boto, arana ngana jabat mangurakkon jalai i. Pupuh, rap marsidok na idokna alai na i jambur i, sampe jabat martongkari alai patunda ni "epeng na milas" i.

Oni adong sada bayo na marsapa tu si Japalar: "Pol do caku muyu maso on Japalar ?"

Ro alus ni si Japalar: "Inda uboto-boto i, pokokna juluk sanga aha na get julukonmu incogot, titik !"

Ro muse ning si Jaamot: "Anggo i ba, ulang juluk na so julukonmu, non ikojar-kojar kalakko !" Ning ia laos tata baba nia

Arani obar ni Jaamot i, mangkuling muse sad bayo: "Alaaa..Jaamot, hope na mandaek do maso on aropku !"

"Urus baeeeeeeen... !" Ning Jaamot, tai sompat do jabat rara muko nia pabege-bege obar ni bayo i.

"Bo soni do, marsibaen jibana do langa maso on !" Ning sada bayo na tobang na juguk isusui ni jambur i. Dung mangkuling bayo na tobang i, polgit ibagasan ni jambur i.

~o0o~