Thursday, October 9, 2014

Mangkusip


Sapoken na lewat, iontang Si Pulut mada Si Pege marmayam-mayam tu Huta Piul so adong si pandongani nia, arana adong dabo sada boru bujing na lagak na baru itandaan nia i poken. Ning Si Pulut: "Nga se binoto le adong rasokimu, adong dongan nia na lagak muse alakna, so dong gandakmu, kan...na so adong dope gandakmu ? Ning ia tu si Pege. "Olo keta", ning si Pege antong soni.
Pas mantong ari Minggu, dung sumbayang Azar i Mandersa, marangkatma ma alai na dua tu Huta Piul. Tar dua jom do lolotna, laluma alai tu si, oni kehe ipalalu alai tu Mandersa na i huta i sumbayang kotu Magorib. salose sumbayang, kehe musema alai tu sada Bagas Podoman ni poso-poso i huta i, arana get mangido izin mangkusip kalai tu Raja Na Poso (Katua Naposo Bulung sannari), soni mantong adatna i maso i, arana anggo inda mangido izin jolo, goyak dei roa ni poso-poso i adong na mangkusip alak na ro tu kampung ni alai i, i ma so kehe alai na dua mangido izin tu Raja Na Poso ni huta i. Abiaran ni Si Pulut sabotulna, mabiar ia adong kalak na manganggu ia pala dompak markusip dot bujing ne get kusipon nia i, apalagi adong na mangrambasi. Kasidunganna inda lalu mangkusip boru bujing na por roa nia i, sambang kaji, um lojana sajo mangulangi tu Huta Piul.
"Soni mada Raja, on pe langkama ami on jolo mamarik-marik. Tarimo kasi godang mada", ning si Pulut, Ro ning Raja Na Poso i: "Jadima, tai reso amu di si, na sadari ning kalak adong boto ulok sa mamolus i lambung na i. Soni pe, pala adong sanga na monga dokon kamu jami, na i son sajo do ami", ning ia. Dung isolom kalai Raja Na Poso i, langka ma antong alai na dua palan-palan taro mangecek-ecek.

Inda lolot dung i, sampe ma alai antong tu Bagas Podoman ni bujing i. Dung tardonok tu bagas i, na pakaluar ia mantong Tulila nia sian bagasan ni kupiah nia, na torusma ipalu-palu ia ilambung ni bagas i inda dao sian lubang pangkusipan na adong i bagas i. Dung martulila, marende-ende maia. Ompak na marende-ende ia, songon on ma ende-endena:
Tirikong...tirikong...tirikong
Lobe doit da anggi

Lobe doit da anggi
Jorolong...jorolong
Na padua tiang na padua losung
I tonga ni parik on

I bege ho dehe
Ibege ho dehe

Suling mada on so suling
Sulingkon bulu tolang

Mangkuling maho le mangkuling
Ari on ma get andoostorang....

Oni, martulila muse ia mulak. Dung loja martulila, marende-ende muse ia mulak, songon i ma torus ibaen ia torus marulak-ulak. I mantong rasoki nai, anta songondia, mangalus mada sada boru bujing sian bagasan, na manyapai sanga ise bayo na martulila dot na marende-ende i. Nga bentong, na bulusma ialusi Si Pulut obar ni bujing i, tai marende-ende parjolo songon on:
Au on mada manuk tinggiran
Manyogot so tarpatuduk

Potang ari so tarpadek
Mate-mate ipogaskon donganna songon i


Na suangkon danon ni bulu
Tu aek so ipangan gulaen

Tu darat so ra tubu

Madabu so dong topotan

Dung i, mangalus muse boru bujing i:
Uboto do parpordamu
Sintap ni sarisir tu rumput manis

Uboto do parroamu

Sintap ni bibir do baya obar na manis

Mangkusip muse Si Pulut songon on:
Dongdong baya so tardongdongkon
Tubu dahan dfi bona bulu

Podom baya so tarpodomkon

Ida-idaan i tompa muyu

Muda lindot do hodong ni pahu
Gariang i manjadi napu

Muda na giot do ho baya di au

Damang-dainang madung satuju

Mangalus muse boru bujung i:
Nada pahu baya na so lindot
Gariang i na tubu i lereng-lereng

Nada baya au na so giot

Damang-dainang indape mangalehen

Tentong ison dope pitulo
Tarambung-ambung lao mamolus

I son dope antong ita marsuo

Torang sigat sidumadang ari

Mangkusip muse Si Pulut:
Tangan do botohon
Ujung nai jari-jari

Ita patama do dokonon

Ujung nai ita pasari-sari

Ro museng alus ni boru bujing i:
Yabo..........angkang...................

Soni mada anta na piga nolima Si Pulut mardalanan tu Huta Piul so leng bisa ia mangkusip boru bujing na dung solot i ate-ate nia i. Tai i mantong rasoki nia, inda ra boru bujing i maringanan dot ia, oni ngantong idokon boru bujing i muse sanga aha sobobna so inda ra ia maringanan dohot Si Pulut.



~o0o~


see: 
http://edinasution.files.wordpress.com/2007/06/sekilas-buku-tulila.pdf
http://muse.jhu.edu/login?auth=0&type=summary&url=/journals/asian_music/v045/45.1.ross.html
http://arecabooks.com/product/tulila-muzik-bujukan-mandailing/
http://muse.jhu.edu/journals/asian_music/toc/amu.45.1.html
http://books.google.co.id/books?id=tTa__ZfyMhEC&pg=PR8&lpg=PR8&dq=tulila:+muzik+bujukan+mandailing&source=bl&ots=ZS_2U7W4Yq&sig=3sTRKaD70WsVqtwLxmv-dlUfgkw&hl=id&sa=X&ei=DE82VLnxCtGVuASAlYCwCg&sqi=2&redir_esc=y#v=onepage&q=tulila%3A%20muzik%20bujukan%20mandailing&f=false
http://www.amazon.com/TULILA-MANDAILING-Edi-1963-Nasution/dp/B002J47BRU