SI NA RAAN

Dongan dongan sasudena sai rap marriang ni roha hatio haluar pangumuman sian sikola bahasona hami sakalas rap lulus sian SMU. Sanadeba marcarito rap marsidok angan-anganna dalan malanjutkon sambung ni parsikolaanna be. Adong nagit tu Jawa, adong nagiot tu Doli, adong juo nagit tu Padang. Bope narap dompak marlugut dohot dongan-donganku di namarcaritoi, tai anggo au hum bahatan do au sip, salau mikim-mikim songoni saotik di na mambege sude carito ni halai i. Padohal na hum ginjang dope angan-anganku sapetona. Tai biama baya ningiba, angke hum olat ni angan-angan maia, harana martaringot tu hangoluan ni damang dohot dainang angke naso ipangan utok-utok niba do ilala nangkan tar pasikola sa iba tu parkuliahan songon dongan-dongan i, hum martimbuspe tataring ari-ari on ma godangma roha ni ba. Dungi ibagasan ni ate-atengku songon adongdo saotik mangiburu tu dongan-donganku sasudenai, aso do luai inda songon simatobang nihalai i hangoluan ni damang dohot dainang, sahinggo tujiape giot ni halai marsikola lek gogo do parsiandaran ni halai.

Borngin ni ari, lek nai sajo ma ibagasan ni rohangku, i ma marpikir sanga songonjia doma rohai so bisa au manyambung sikola. Tai lek pupu do muntul songoni muda martaringot tu hangoluan ni simatobangi. Bahat do nian na maribo ni roha tu au, tarmasuk guru-gurungku i sikola an. Pupu do halai marposan tu au angkon na uparjuangkon do angkon na usambung sikolangku, harana iboto halai bahaso au sada murid ni halai na mandapot ranking muloi sian kalas sada santak tu kalas tolu.

Adong do nian masuk tu parguruan tinggi sian jalur undangan gorarna hatio muloi masuk i kalas tolu.Tai hatia i inda masuk au tu sikola adong sabulan, hara ni marnyae damang sahinggo au doma manggontion damang tu parusahoan anso lek totop martimbus i tataring nami an. Hara ni i mada so inda ikirim guru nami i gorarku tu parguruan2 tinggi bope na lek jeges do raportku muloi sian kalas sada santak tu kalas dua. Naiambang ni halai do na madung mantak au sikola.

Maso i pupu do renge baya ilungku, lumobina muda taringot di parsikolaanku na madung tading. Nida damang dohot dainang hancitna ulala na haluar sian bangku parsikolaan, kehe ma dainang tu sikolaan marsuo dohot kapala sikola nami i, maribo-ibo dainang anso laning ipatola au mulak marsikola. Dung i ma anso bisa au mulak marsikola.

Godangna rohangku boto na giot manyambung sikola on, indabe na tar pasari-sari au. Dung sumbayang kotu magorib hupasampe ma tu damang dohot dainang bahasona au angkon nasikola do jia pe na tu jia. Rap marsipan antong nian halai na dua, damang dao matana tu loteng, dainang mamudun-mudun ujung ni talokungna. Tai... u boto do nian aha na ibagasan ni roha ni halai i. Ibo do roha ni halai tu au, tai borat halai mangoloonna hara ni parsuadaan, naso mungkin-mungkin ilala halai nangkan tarpasikola on halai au tu parguruan tinggi. Lambat-lambat haluar ma hata ni damang: "Ngatar dok amang anggo godang ni roha mambege hatamu na giot marsikola on, tai amang..., hum godang ni roha ma ia ale na tarbaen nami dohot inangmu, anggo mangoloon do tu sasude nai dok mon, nangkonpe hami alusi angke nadung mangarti do ho bahaso hum manganpe ho amang dohot anggimu saonok naon na hum olat ni na songoni maia ale na tarbaen hami dohot inangmu, ulang majolo nangkan pasikola on ko tu parkuliahan."

Sabotulna nadung tar takok au doi alus ni damang sapanjang au na giot marrencana marsikola tu parguruan tinggi on, tai makasudku tarsongon na paido isinkonna do tu sasude ni rencanangkon, anso borkat na giot kehe dalan mangaranto i ma na giot mancubo marsikola tu Bandung. Udok do tu damang dohot dainang, nangkon halai jabat marsak mamikirkon ongkosku muda lalu au kehe tu tano Pasundan an, harana madung lolot do au martabungan sian pangomoanku di namanaru eme ni halak dihatio manyabi muloi au kalas dua na sakali, itamba buse saotik hepeng ni na manggadis incor muda au martambom lek na utabungkon doi i.

Pondok carito, aupe marangkat ma tu pandaraman, sandang ma tasku na madung hodar nida warnana na marcap "Bank BRI" dungi itoru nai gambar ni bendera merah putih, rohangku tas ni par mamak on i doi di hatio kehe tu Mokah nasakali, tas na ilehen ni pariboto on ni dainang ambaen ganan ni abit-abit na so ipake ni halaibe sian Doli na jolo na ioban ni dainang hatio kehe mangulangi tu sadun.

Rap juguk ma hami ombar dohot dainang songoni ju damang ibangku-bangku na ijolo ni Duta Selera i painteon ALS trip Medan-Bandung. Uida songon na lepe do muko ni dainang na pabuat au i, songoni juo damang, marpupu busa-base, tarantongkin ke tu balakang tu kamar mandi an. Lek sosot do nian sipaingot ni damang tu au anso ulang lupa sumbayang, dungi rahot na markoum sangape halak hita na adong i tano Pasundan an. Madung kehe do nian damang tu bagas ni halak bang Chandra Jamil Dalimunthe di ari rayo na solpu tarsongon na giot marguru sotik, harana antong abangi madung lolot i Bandung, tarsongon pasahatkon mada artina damang dalan so adong topoton di sadun targan so dapot karejo salau patidaon dalan artina di na giot dohot mangikuti Ujian Masuk perguruan Tinggi.

Muloi do na sakali, na tu Bandung ma ia na uangan-angankon marsikola i ma tu ITB. Ngalambat ami di si jonggor, ro ma ALS na hupainte i, targan so masuk au tu bagasan ni motor i, usolom ma damang dohot dainang, tar lolot do ialuk dainang au salau boti tangis marilu-ilu, songoni juo damang ialuk sa au, salau maneteki juo ilu nai, borat na iala halai na pabuat au, na mangalangka dohot do'a, na maniop hagiot ni roha na gincat boti godang dalan patidaon tu simatobang bahaso au inda hum olat ni na marangan-angan. Mur sosot ilu ni matangngku, hatio dainang dohot damang mandada, utatap jong-jong au sian bagasan ni ALS i sampe mago halai sian matangku.

I Bandung au madung mandaftar ujian masuk perguruan tinggi negri, pilianku ima tu ITB Fakultas Teknik Mesin. Dungi, di USU muse dohot di Andalas fakultas na lek sarupo na upili di ITB. Modalku adong do buku-buku na uoban sian huta, songoni juo buku-buku ni dongan-dongan sahuta. So mabahat parbinotoanku di na giot ujian masuk i, sasakali kehe do au nian tu toko buku Gramedia, u hantam ma marsiajar di si marjom-jom, salau marsapa muda adong na sungkot tu angka dongan niba na madung parjolo kuliah sampe tu tibo ari ujian. Odokan do boto le ulala di na mangisi karotes jawaban ompak na ujian i, tai ulala torang do pikiranku, dungi songon nadapot au do na manjawab soal-soal nai sudena.

Painte pangumuman, hara ni tolongan ni angka-dongan niba i Bandung, karejo ma au i Rumah Makan Padang "Bundo Kanduang". Alhamdulillah...lopeh au do nian manganku, songoni juo parpodoman. Harana na i parmanganan i do au rap dongan-dongan sakarejo tinggalna. Sasanoli lungun-lungun ni roha, utongos juo do surat tu huta, mandok habarku, songoni juo manyapai habar ni simatobang.

Manyogot ni ari, harana madung itotapkon tanggal pangumuman ni UMPTN, hira-hira pukul 7, au pe na kehe ma maripas-ipas tu parjagalan koran an, inda sobar be au ne get mangiligin pangumuman i lulus sanga inda au. Peto mantong...madung bahat huida goar-goar ni halak i koran i alibos. Dung ulehen dope 3000 rupia tu bayo parjagal koran i, salau upasinggang anso manot palan-palan salau mambaco bismillah....ukeker mantong tu kolom ni ITB, sada-sada hujalahi goarku sampe adong i si tartulis "Parlindungan Nasution"..., inda pursayo au, usibitkon tanganku..., sanga na marnipi do au..., oni baru unot-noti mulak sakali nai, isima so sodar au bahaso na au madung lulus masuk ITB. Dung sujud syukur, inda sodar au mangambur-ambur au i topi dalan godang i, sampe inot-noti halak na marlewatan doma jabat, humbaen sonang na hulala baen na lulus i au. Dung muli au tu parkarejoanki... manetek ilungku hatio manulis surat tu damang dohot dainang mancarito on bahasona au madung lulus masuk sikola insinyur di ITB.

Songoni mada, hatio manjalani parkuliahan, bahat paet manisna bope na humbahat antong paetna. Sude karejo na halal ukarejo on muloi do na mangajar les ni daganak sikola, songoni juo karejo-karejo na lain nai, aha sajo, asalma na so i larang ni Tuhan. Sasakali ro juo do nian kiriman ni damang bope na sotik songoni le, tai madung ubayangkon mai bahasona na madung tungkap-talak mai damang dohot dainang paiduk-iduk na ikirim ni halai tu au. Sampe muloi do semester 5, alhamdulillah...isi dope au mandapot beasiswa. Ngalambat songoni juo ma nian rasoki niba namarsikola on, adong mada sada perusahaan swasta na mangelehen beasiswa juo, ipasikola halai au sampe tomet tai tarsongon komitmen na muda dung tomet dua ari on, dot parusahaan i ma au karejo.

Dung salose sikolangku, au pe mulak ma tu huta, harana dung do marangkat au najolo sian huta, on dope so mulak au, harana madung tekat di au inda mulak au targan so salose sikolangku. Hatia wisuda pe, inda na bisa ro damang dohot dainang, harana damang madung onom bulan lolotna urang sehat, sahinggo ngada tolapsa be marusaho. Tolap tu huta, songonima godang ni roha ni damang dohot dainang, dungi madung uniatkon muse do angkon na uoban baju wisudangku, kabotulan unjung do ro surat ni damang, godang do rohana angkon margambar dohot au dompak marbaju wisuda au.

Jagit holong mada amang, ale inang di holong ni roha muyu i do sumangot dohot tondingku. 

Muda nida halak najolo

Alus-alus doi muda na marsaro

mangido mohof au tu nampuna foto

harana hubaen jadi insfirasi ni carito

Tanjung Balai, 24 Februari 2014

Cerita pendek (cerpen) yang

ditulis oleh  Pinrizky Lubis ini tidak 

diketahui apakah memang disadur 

dari sepenggal perjalanan hidup seseorang, 
atau tidak. Namun yang pasti putra-putri 
Tanagodang-Ulu Pungkut tidak sedikit yang 
melanjutkan studi ke pergurun tinggi negeri 

maupun swasta, bahkan ada yang pernah menjabat 
Gubernur Sumatera Utara yaitu Almarhum Raja Junjungan Lubis, 
para tokoh pejuang yang gigih berperang melawan penjajah kolonial Belanda yaitu 
Sutan Mangkutur dan Raja Gadombang, serta sekaliber sosok pelukis terkenal 
Batara Lubis, adalah putra-putra 'the best' dari Huta Na Godang ('kota yang agung') 
dari dataran tinggi Banua Mandailing Julu.