Thursday, May 23, 2013

Mangarsik alahan ni dongan




TOLU PULU TAON na solpu, marningot dope si Gantil atia kehe rap dohot dongan-dongan sakalas nia mambuat apundung tu dolok huta ni alai i, inda dao sian panggurisan ni amangboru nia Ja Koje. Ra dei opat sanga lima alak bahatna alai na kehe i marmayam dung mulak sian sikola tu dolok-dolokan manjalaki pangan-panganon pabutong-butong bitua. Anggo si Cayat dohot si Kaut na dua alak marangka-maranggi i, hum jambu pe nida alai ramos margantilan i batang nai na bulus mei irambas kalai dot ayu so mardabuan. Ulang majolo antong adong nida alai botik, pisang atope sanga marapolom na malamun i kobun-kobun ni alak huta i, na martaru ipas mei alai nadua mambuatna ambaen panganon jalai i dalan-dalani laos manangkok tu dolok an. Muda manguas antong na momo dei ilala alai, na tinggal mangupokkon sajo do batang ni tobu na marjejer tubu i topi ni dalan-dalani.


Tar satonga ari do alai markusor-kusor manjalaki pangan-panganon i dolokan, mangontang mulakma si Cayat dohot si Kaut, arana manggok tong bitua ni alai nadua. Ben butongna boto le, get ipapodom kalai doma jabat I sopo ni amangboru Ja Koje i. Sonipe, na marangan-angan dope alai nadua get kehe muse mangarsik alahan dohot mandehe gulaen tu batang aek an, ningkalai papotang-potang ari so ulang sayang woktu i. Nyato dontong, dung sumbayang kotu asar mang markacakma alai nadua di topi-topi ni batang aekan, rap marsitutu mangarsik alahan ni dongan sapodoman ni alai. Untungna male alahan i tar tu julu ni pamintasan ni na gogo i, pas i balakang ni ayu ara na godang i, i ma so nga nida alak kalai dompak marsitutu mangarsik alahan i. Ngada boto lolot jabat, mang iaup kalaima gualen sakadak bahatna sian alahan i, adong aporas, sulum, siating, lonjing. Salangkon burincak pe iamot kalai.

Dung itumpat kalai alahan i, ibaen kalai muse osar-osarna, oni ipamasuk kalai mulak aek tu si, alai pe kehe ma lao markerer orong tu julu. Inda dao sian tapian na i lambung suro ni alaklai i, kema alai nadua mandehe-dehe tu asak ni batang aek i. Ben bahatna antong gulaen di batang aek i, garing bope lelan, na momo do dapotan asalma ra boti ringgas iba na mandehe i.

Ari pentong mang potang, tongkinnai get kotu magoribma. Alak huta i pe sada-dua adongma na ro tu tapian i get maridi, dung muli sian saba atope ngon kobun. Tai anggo si Cayat dohot si Kaut na leng mandehe-dehe dope karejo ni alai i tonga ni batang aek na doras i. Ompak get maridi tulang Ja Bondar, marsapa mada ia tu si Kaut: Biado bere, dapotan do !”.

Rontong alus ni si Kaut: Olo tulang, inda tanggung bahatna gulaen i batang aek on di potang ni ari on.
Lehen sotik ji tulang da, ambaen tutungon, mangido tulangnia i Ja Bondar.
Olo tulang, iligima jolo naon ampot tarbagi, ning si Kaut.

Tarsapangidupan dung i, si Cayat dohot si Kaut kehema alai manopi, mantakma alai na mandehe i. Lalu tu topi ni batang aek i, rap ipaias kalai  nadua mantong gulaen i, oni baruma isusuki alai isangnai dohot andor. Sude adong do jabat onom susukan, dokdok doma nida tangan ni si Cayat  na dompak manjingjingkon nai laos mardalan palan-palan manopotkon Ja Bondar na dompak maridi mangusa-usa pamatangna i tapian i. Lalu tu si mangkuling Ja Bondar: Inanggoinang … nabahat mei le dapot kamu na mandehe i

Ro alus ni si Kaut: Olo … sonima dompak rasokina tulang, taiba sasusuk maia na tarbagi ambaen ji tulang, ijia do upatibal?”
Saipe da mangsyukur godang mei ilala, patibalma soni ilambung ni kupiahki, jagit olong da bere!” Ning Ja Bondar.
Samo-samo, tulang, ning si Kaut.

Dung i, alai nadua pentong maridima di tapian i. Salose maridi, morotma alai sian tapian i, lao laos manangkok palan-palan tu dolok ngon topi-topi ni batang aek i. Na gadukna, inda binoto sanga arani aha, tarsilandit mada pat ni si Cayat, oni singgalak ia jabat tu pudi laos mandok obar: Alaleee amang, mate mauuu … !!!” ning ia, torus dobur muse pamatangnia tu batang aek na doras i, lalu mayup sude gulaen na lima susuk i.

Gandoang, 24 Mei 2013.

No comments:

Post a Comment