Cerita Rakyat Mandailing (8)

AMA NA LOJA BOTO ilala Dja Bolut dohot sinuan tunasnia i manarui eme tingon saba tu huta. Taru na mosa-osa doma nida alai nadua dung tolap tu pangkal tangga ni opuk eme ni alai i. I mantong rasoki na i, taon on dompak deges pambaenan, jabat do lima pulu belek dapot kalai. Tai biamantong tele, ambaen na sakali maia sataon mambaen, eme na lima pulu belek i pe inda nangkan cukup panganon sataon. Paling tar onom ato pitu bulan mang habis mei eme na i opuki iduda ambaen panganon ni alai sabagas. I ma so angkon na leng mangguris apea dohot markobun-kobun juo do Dja Bolut, so dong panabusi ni dahanon muda dung danga eme di opuk. Oni muda tibo masona aleon, rap kehe mei alak huta i manggore tu topi-topi ni Batang Gadis an. Rata lomlom doma nida sibuk ni alak na manjalaki sere i arani markangar sasadari, sian manyogot sampe tu potang ni ari.

Anggo amanta Dja Bolut na tuntun sala do ilala ia na mangolu i maso on, songon parulos abit karung: “i tarik le tu incat ngalian pat, isanggopi pat nangkan ngalian musema ulu”. Mari-ari muse ibana mang tobang, tarantongkin mungkap batuknia, biamantong ale na songeon, oni marpupu muse marun. Muda nga kehe ia mangomo arani pamatang na madung rukrek i, ampot nga martimbus dapur, kasidunganna marciotan daganak di bagas. Ambaen paetna na mangolu i, na jarang doma Dja Bolut tarida di Lopo, bope antong ale hum na get pasonang-sonang roa sotik, markombur taro minum kopi paet di si, tai inda be le na ialap roania be, na tu saba tu kobun sajo doma karejonia ari-arion pangondasanna.

Mur marsak musengtong roa ni Dja Bolut dung do anak panggoraran ni ibana si Roken tommet sikola gincat. Dung do dapot si nuan tunasnia i ijasah sarjana sian UNIVERSITAS SUMATERA BARAT DAYA (USBD) dua taon na solpu, indape na dapot ia karejonia, sampe-sampe danak i kehe manjalaki karejo tu Jakarta. So leng bisa ia pe mengolu di huta na godang i, ambaen na ra do danak i jadi kenek ni motor i Jakarta. Pala itonaon ia anso mulak anaknia i tu huta muda na so dong dope karejona di sadu, ampot bisa manolong-nolongi ia tu saba tu kobun, tai inda na dong boto le balosna, oni inda unjung musengtong muli tu huta bope Ari Rayo, hum na kirim solom dohot mangido mohop maia na ro tonana. I pe dung lopus do jabat Ari Rayo so sampe tona i. Mamombo, adong do roania get kehe mangaligi anak panggorarannia i tu pandaramanna, tai biamantong, ranto ni danak i pe ama na santak dao, ngadong ongkosnia marmotor tu sadun.

I mantong, ambaen na so unjung i be Dja Bolut tu lopo saonoknaon, heran doma jabat alak na dong i lopo i atia Dja Bolut ro tu si dung kotu Isa. Arani i, na bulus ro ma sapa-sapa ni alak na dong di bagasan lopo i. Mari-ari mantong iparnia Dja Ultop, na dodas kalai pasuo atia mangaso dung mangguris, arana antong palambung-lambung kobun apea ni alai nadua di arangan na i dolok.

“Aha do na muba lae, naso unjung-unjung, ompot muse uida aroro muyu tu lopo on,!” Ning Dja Ultop mada.

“Inda dong ba sanga monga ipar, benna kehe do alak bagas dohot daganak i mangulangi tu huta ni tulang an, jadi lungun kulala sado-sado au i bagas”, ning Dja Bolut.

“O ... iambang sanga na monga. Mabia si Roken di Jakarta, mang dapot iama karejonia?” Marsapa Dja Ultop.

“Indape boto le”, ning Dja Bolut.

“Oni, songondia dei le danak i mangolu di sadun anggo nasodong do karejona?” Marsapa mulak Dja Ultop.

“Anggo pandoknia, karejonia manolong-nolongi sitandaannia di sadun, nga uboto antong sanga aha pastina karejonia”, ning Dja Bolut soni, maila ia mandok anaknia karejona kenek ni motor di huta na godang an.

Rontong ning sada bayo na juguk i susui ni lopo i: “Anggo on do masona, na payahan dei manjalaki karejo, apalagi mantong nangkan jadi pagawe negeri bope pegawe swasta, ning kalak i angkon na dong dei burangir surduonkonon”.

“Olo ba, so dapot karejo maso sannari, ning kalak i doba, miakna do panggorengna”, ning bayo na sada muse.

“Te ... anak ni si aha i mabo, manggayar 100 juta so jadi pagawe, manggadisi saban-kobun jabat amangnia, i pe leng urang juo, tarpaksa doma marutang tu toke i tambana”, ning bayo na juguk i pangkal pintu ni lopo i.

“Aha dei baya ibaen ia panggayarna, salangkon saba dot kobunnia mang gade, manjalaki mangan pe aropku payah domai”, ning Dja Ultop.

“Sonima natarjadi, nga mangarti iba, ninna dung jadi pagawe jolo so iangsuran utang na tu toke i”, ning bayo na juguk i lambung ni Dja Ultop i.

Anggo Dja Bolut antong sip sajo ia soni, nga binoto ia sanga aha nangkan dokonon. Mur marsak roania muda nangkan manggadisi saba-kobun ma jolo so bisa anak panggorarannia i jadi pagawe. Padohal harto pe ngada sadia jabat, saba pe le na tolu lungguk maia, tai anggo kobun apea nian tarbolak do gurison, bope le marbagi pandapotanna dohot amangnia. “Saulakon nian muli-muli tu iba juo dei, biamantong gorarna pe pucako”, ning ia i bagasan roania.

“Aso do sip sajo homu, lae”, ning Dja Ultop tu Dja Bolut.

“Eeee ... indaba ipar, benna taringot dau arina incogot mandaek, homu biado le”, ning Dja Bolut songon nagiot paasing-asing carito, padohal na dompak taringot do ia tu anaknia i Si Roken na so dong dope karejona, leng na manganggur dope bope mang dua taon tommet sarjana.

“Homu antong lae, dot damu manggadisi saba-kobun so pagawe anaktai?” Marsapa Dja Ultop tu Dja Bolut.

“Olo tele, na gaduk mantong maso sannari on, sadebana antong alak i angkon na mangepengima so dapot karejo, ampot dabo sada tando mei, donok mon kiamat”, ning Dja Bolut.

“So batas kiamat, dot muse homu antong Dja Bolut na mangepeng i”, ning bayo na juguk di susui ni lopo i.

“Ala ... Dja Pagar, leng na ningot dope dabo pituah ni guru i, i ma da gunana so leng ro iba mangaji malom Jumahat”, ning Dja Bolut antong.

Rontong ning Dja Pagar: “Anggo kaji i dabo leng na ningot dei pisang raut nami, tai muda ro parhalan tu jolo niba nga tardok iba obar, mari-ari musengtong muda mangkolos daganak niba, marsak roa pasari-sarina, kasidunganna ipalalu juo hagiot ni daganak i arani ibo ni roa niba paida-idasa”, ning Dja Pagar.

Ngantong ialusi Dja Bolut obar ni Dja Pagar i, sip ia munduk, purak-purak pareso solopnia. Inda lolot dung i, mangkuling Dja Bolut: “Muli mau parjolo da, mang borat ulala mata i”. Dung mangkuling, Dja Bolut pentong morotma ia sian lopo i, oni kehe ia mulak tu bagasnia an, lao sado-sado ia maripas-ipas. Alai pentong nadi lopo i morot-morot sada musema, marmulakan tu bagasna be i borngon ni ari na golap i.

Tolu poken dung i, tarsanggot Dja Bolut paida-ida anak panggorarannia i si Roken mulak sian ranto. Sibukna nida mur marniang boti malomlom muse, oni marobuk gondrong, suang doma nida songon pareman na urang mangan. Ibo roa ni amangnia paida-ida anak panggoraran i, lepe-lepe soni nida, nga martondi. Soni pe leng na isapai ia do sanga songondia hangoluan ni anaknia di pandaraman. Songondia mantong kenek ni motor bope di huta na godang, ngangkan na murpade hangoluan, markais jolo manyogot anso adong panganon potang, ira-ira songon manuk saba.

“Songonon do da amang”, ning si Roken mandok amangnia.

Tai bulusma marsapa Dja Bolut bope naso salose dope anakna i mangkuling: “Aha do langa na monga amang so ompotna ho mulak sian pandaraman?”

Rontong ning si Roken: “Ayah, di sadun adong sitandaanku na ra pature-ture au so bisa jadi pagawe, tai sindok i, pandoknia angkon ipasiap epeng 100 juta ambaen pangurus-urusna”.

“Inang goinang, na joman ma au na mangolu on amang, indape unjung uida epeng na sabahat i gokna, salangkon pasikola amu pe binoto ho do sanga songondia payahna, itaonkon soni mangan dot bolgang, tambana arasak na i tutung, poken tu poken, ulang ma jolo ningmu pasimpan epeng 100 juta, salangkon 10 ribu pe inda bisa tarcelengkon tiop poken ambaen ji anggi-angimu pala get paincat sikola taon na ro”, ning amangnia.

“Anggo satuju ayah, igadis kobun ape na di Aek Coro, saulakon upaulak mulak epengnai dung kareja au”, ning si Roken.

“Inda bisa bale i, pucako dei, ompungmu dope i ampunana, kan binoto ho do na mangolu dope ia”, ning amangnia.

Pabege-bege obar ni amangnia i, sip antong soni si Roken, nga ibantah ia. Tai anggo ulunia torus marpikir sanga songondia carana so adong epeng, so bisa ia jadi pagawe. Putus roania, borngin na i, dung kotu Isa kehe ia manopotkon ompungnia. Bimantong anggo tu paoumpu, na olongan roa ni ompungna tu paompuna, angke na marangka-maranggi. Ompungna si angkaan, paompu na muse si anggian. Sidung kaji, dung idokon si Roken hajatnia tu ompungnia i, incogotnai na bulus ro ma ompungnia manopotkon amangnia tu bagas. Isuru ia ayah ni si Roken manggadis kobun na i Aek Coro, oni epengnai ilehen sude tu si Roken ambaen pangurus karejo ni paompunia i. Sadari i juo angkon na kehe ayah ni si Roken manggadisna, ulang ipalambat-lambat be, arana so ipas si Roken jadi pagawe, so dong hangoluannia tu pudi ni ari.

Sonjia mantong ibaen amangnia, ngada tartulak ayah ni si Roken parentah ni amangnia i. Dung markopi i bagas, na kehe ma ia tu bagas ni toke an giot manggadis kobun apea na i Aek Coro. Anggo toke i, ambaen bahatna epengnia, na ra sajo dei ia manabusi saba atope kobun, asalma i gadis kalak i tu sia. Tai, ambaen na tardao i antong kobun apea nangkan gadison ni ayah ni si Roken i, inda ra toke i sai argana, angkon na murak do sotik. Arani ngadong be antong toke na asing si panabusi, leng tu toke i juo do laluna, bope murak argana.

Pondok ni carito, sian kobun apea ni ompungnia na dung gade i, tar dua bulan do dung i, mang jadi pagawe ma si Roken i huta na godang an. Urang-lobi sataon dung i, bonggalma tu si Roken bahaso ompungnia i mang maninggal. Tai arani na mandasor dopentong karejonia, inda bisa ia muli tu huta mangaligi ompungnia na maninggal i, tona maia na itongoskon ia. Lolot-lolot mur martamba lolot, jadi kapala bagian muse ma ia di kantor parkarejoannia i. Arani i, na bahat sajo ma urusannia, jama on jomak adun,  oni ringgas muse ia mangurus kaporluan ni alak na ro mangido tolong tu sia. Na ponting jisia, miakna do panggorengna, i maia putona, salose mei sude urusan ni alak i ibaen ia. Ngabentong, tar dua taon do ia jadi kapala bagian di kantornia i, na dong ma bagas dohot motor sedannia, oni epengnia martumpuk-tumpuk, nga taretong ia be jabat sanga sadia epengnia i sudena ambaen bahatna. Arani bahatna epengnia i, gok muse antong isimpan ia i luar negeri, anta na piga bank na godang panyimpananna nga binoto. Oni, itabusi ia muse saham ni perusahaan-perusahaan na godang i luar negeri.

Nga lolot dung i, i kirim si Roken ma epeng 200 juta tu amangnia ambaen panggonti ni kobun apea ni ompungnia na dung gade i. Sapoken dung i, ikirim ia muse ma sada motor na godang tu alai an, so dong maroban simatobang dohot anggi-angginia, rongkon sude koum-sisolkot ni alai so rap ro tu pandaramannia an, i ma na get mangalo-alo boru nangkan jadi parsonduknia. Boru nangkan alapon on alakna ama na santing kagakna, bontar boti lanjang muse, oni ama na jeges nida muda mekel, apalagi mantong mangkuling ama na laok binege, salaku ngadong be nida urangna. Singkop, songon napuran na i surdu ni anak boru tu hatobangon atia orja haroan boru. Topet waktuna, orjana ibaen i sada hotel na godang, oni na ro mangaligina alak na beteng-beteng na dong di huta na godang i. Arani i, na suang raja sajo doma nida ilala si Roken, bope le na sadari maia. Dung salose orja, ngana ipatola ia be muli simatobangnia tu huta, mang ipasiap ia kinan ma sada bagas na godang ingananna, inda dao sian bagas ni si Roken i. Anggi-angginia sude, ning ia, nangkan ipasikola ia saincat-incatna di huta na godang i, tu luar negeri pe sekola indamangua asalma na lalu alai.

Sabotulna, ibagasan roa ni amangnia adong na taraso ilala ia targaduk, tai inda binoto ia sanga aha. Jop do nian roania paida-ida anaknia i sannari mang jadi alak na kayo, tai mangalobi nida ia jabat, inda suman tarida, mari-ari muse antong ngada piga taon dope anaknia i karejo. Marsapa-sapa di roania, ngondia dei baya dapot ia sinadongannia i sudena? Mardabuan soni tingon langit an songon parrobak ni tarutung? Ah, nga ra dai!! Alak na oto pe isapaan leng na soni dei aropku mangantusina. Arani i mada sada so inda onak ilala ia tinggal rap dohot anakniai  di huta na godang i. Sapoken dung salose orja, mangkulingma Dja Bolut tu anaknia i: “Songonon do da amang, arani madung lopehma sude karejonta di son, ho pentong mang ipatobang ma, aropku dabo mulima ami incogot tu huta. Mari-ari  muse antong na bahatan karejo na tinggal di ita an, jana saba bope kobun”. Songondia pe pangelek ni si Roken, inda na ra simatobangnia tinggal rap dot ia di huta na godang i, angkon na mulak do. Potangnai, mulak juo antong simatobang dohot anggi-angginia i tu huta ni alai an.

Sataon dung i, bonggal ma tu simatobangna bahaso anak panggorarannia i itangkup upas. Ning kalak i, so itangkup pe anaknia i arana adong na mangaduon si Roken manangko epeng na santak bahat i kantor parkarejoannia i. Epengnia na bahat i, isimpan ia i bank, sampe tu bank-bank i luar negeri, oni bahat muse sahamnia di perusahaan-perusahaan na godang. Anggo ietong-etong gari, inda mungkin sai bahat epeng dohot hartonia, arana hum na pegawe sajo do ia, bope le mang jadi kapala bagian ia di kantor parkarejoannia i. Sugari ipakumpul pe sude gajinia i sampe 50 taon karejo di kantor parkarejoannia i, inda nangkan mungkin sai bahat epeng dohot hartonia, ma ngalobi i doma jabat ambaen gokna. Parcarito ni alak, bahatan dao sinadongannia umpando Bill Gates, alak Marikin na kayoan i adi.

Pabege-bege na itangkup upas i si Roken, renge antong ilu ni simatobang dohot anggi-angginia, marsak roa ni alai sude dibaensa, oni ila botul roa ni alai paida-ida sude koum-kahanggi na di huta. Hum kaluar sian bagas pe alang roa ni alai, maila pasou dohot alak na bahat, ulang majolo nangkan mangecek-ecek dot kalai. Salaku markurung alai sude i bagas, martangis-tangis manyosali na dung tarjadi. Sapetona, get kehe do ilala amangnia mangaligi anaknia i tu huta na godang an, tai biamantong ale, isi ni cakuk inda cukup tu sadun. Ngada tarbaen sanga aha, hum na mandoah-doah maia soni di bagas, so leng salamat nian anaknia i dunia on sampe tu ahirat, i maia pangidoannia tu na SADA i.

Tar sapoken dung ipareso i kantor ni upas i, na isorahkon musema purkaronia i tu jaksa. Ibaen jaksa muse ma antong tuntutan dohot manyiapkon bukti-bukti dohot saksi-saksi na bisa mambuktion bahaso si Roken memang botul-botul manangko di kantor parkarejoannia i. Salain i, dapot jaksa muse dope bukti-bukti dohot saksi-saksi na lain, nangkan bisa mambuktion bahaso si Roken jotjot manarimo epeng sian alak na jungada marurusan tu sia. Arani bahatna kasalahan ni si Roken on, ibaen jaksa mantong tuntutanna. Tiba mantong masona marpurkaro di pangadilan, pangidoan ni jaksa i tu hakim, si Roken angkon na iuhum penjara sapulu taon lolotna, oni idenda muse 900 ribu juta. Dung salose antong jaksa i mambacaon tuntutannia i, marsapa muse mada hakim tu si Roken.

“Botul dei manangko epeng ko di kantor parkarejoan mi?”

“Botul, apak hakim”, ning si Roken.

“Botul dei jotjot alak mangelehen epeng jo muda marurusan dohot ko?” Marsapa mulak hakim i.

“Botul, apak hakim”, ning si Roken.

“Binoto ho dei kalakuanmi mangalanggar uhum?” Marsapa torus hakim i.

“Uboto, apak hakim”, ning si Roken.

“Anggo na binotomu do mangalanggar uhum aso ibaenko?” Marsapa muse mulak hakim i.

“Arani lojana ulala na malarat i dompak poso, apak hakim !!! I ma so porsikatutuna roangku merepeng nabahat songon alak-alak na kayo i, tartabusi alai sanga aha sajo pe giot ni roa ni alai”, ning si Roken antong lidang.

“O ... soni do”, ning hakim i.

“Olo, apak hakim”, ning si Roken.

“Anggo songon i, loja muse ma ho ubaen on bo. Tangion manat-manat amang Roken: iuhum penjara ho lima bolas taon lolotna, tai ipotong salolotko i tahan. Oni, isita sude epeng na i tangkomu sian kantor parkarejoanmi, dohot na ijagitmu sian alak na marurusan dohot ko, songoni juo harto-harto na i tabusimu dot epengmi nangkinondi, so ipaulak mulak sude tu ampunana na marhak. Ona denda muse ho 750 ribu juta. Tambana, angkon na igayar ko muse dope ongkos ni namarpukara on sabahat 5 ribu”, ning hakim i antong lanon.

Habis mandok obar, na bulus ma hakim i manokokkon palu-palu na tangan siamunnia i tolu kali targogo: “tok ... tok ... tok ...”, tarbege tu sude alak na dong i bagasan ni pangadilan i.

“Lopeh i”, ning hakim i di bagasan roania.

Dung i, alak pe markaluaran ma sude sian bagasan ni pangadilan i. Parbalakangan taridama si Roken ioban parkantor jaksa dohot parpenjara marmotor tahanan torus tu penjara na i lambung ni rel kareta api an.

~o0o~

Gandoang, 6 Januari 2012

Na ni surat: Edi Nasution

Boa-boa: Carito on na ikarang-karang dei soni, inda kisah nyata on, oni muda adong goar-goar na sarupo di bagasan ni carito on, ngada na i sangajo i dale, so suman dei carito ni alak kita Mandailing.
Untuk antropolog Zulkifli B. Lubis diucapkan terima kasih atas masukannya sehubungan dengan  judul cerpen ("Miakna do panggorengna") ini, yang ketika "mangecek-ecek" via HP mengingatkan kami kembali masalah praktek "suap dan korupsi" dalam masyarakat sejak dulu sampai sekarang.