Ja Tilako dohot Si Badu Olo

ADONG DO LE koum-sisolkot nami di homuan na margorar Ja Tilako? Anggo di huta namian boto, na margoar Ja Tilako ima sasada halak na tabiatna na martilako sajo tu halak na lain, jana tu koum bope sisolkot nia. Ima soi dok halak na sahutai ronyang do ia pula inda martilako sangape marlayas ia tu halak sasadari. Songonima parange nia muloi do sian daganak sampe tu poso-poso, santak buse tu tobang nia. Harana semboyan ni ibana ajakna “Tilako i sabagian ni hairasan”. Sangape muda di kaus cap padi na dor ipake ni ibana cocok doi gari ipasablonkon tulisan sian jolo ni kaus nia i: “THILACO FOREVER”.

Ijiape ia juguk manangion halak na marcarito, anggo ia lek na tutu sajo do ibana pajouk-joukkon suang songon Ja Monis, oni na paboto-boto on muse alakna. Dung i, aha pe parsapaan ni halak laing na botoan do ia mangalusisa.

Songoni juo ma di sada ari, markatopetan tulang i Ja Dagang marsapa i lopoi tu halak na rap minum i si. Aha ma parsapaan ni Ja Dagang baya, ima sanga songonjia do carona pamasak kuajik, harana goarna nagiot arirayo. Markabotulan tulangta Ja Dagang on, na dagang do ibana. Dangolna baya, madung tolu noli ia marbagas, laing natotop do ibana itinggalkon dongan sabagasna. Aha sobob so laing marpupu mangido marsarak dongan sabagas ni ibana inda binoto antong. Nasada, tar tolu borngin dope dung rap kalai mang mangido mulak. Harani i, bahat halak na marsidok na idokna.

Muda pandok ni Ja Cilek i lopo an: “Biamantongi so nga itadingkon dongan sabagas nia si Jadagang, angke songon caro mamili pula pemilu na maso on do ibaen ia, Nai ‘contereng’ nia do songoni, inda songon caro na jolo isusuk do”, ning Ja Cilek, tandang mambaen mangkardak halak sa lopo i. Adong buse bayo na lain mandok, inda tahan dongan sabagas nia, angke marpupu tombom ibaen Jadagang, harana arian na borngin, nga i saba, nga i dolokan humbaen marpupu tombom alak bagas nia i patunda pangkilang ni Ja Dagang. Hara ni bahatna pandapot ni halak sahinggo inda binoto jabat pasalna aha do anso lek tinggal dagang sajo Ja Dagang, inda unjung na tahan rap dohot ia dongan sabagas nia.

Jadi songon i mada, hatio marsapa Ja Dagang tu halak na i lopo i sapanjang caro pamasak kuajik, topet inda adong buse na mamboto, harana bia mantong angke le parina-ina do habiasoanna na humboto. Tai songon naidok na di ginjang, anggo Ja Tilako, totop doi laing naiboto nia sasudena. Nida ia inda adong na bisa mangalusi parsapaan ni Ja Dagang i sapanjang caro pamasak kuajik i, ro obar ni Ja Tilako: ”Hum songoni pe ngadong hamu na mamboto, au dabo pula inang ni daganak pamasak kuajik ibagasan na utalion doi manat-manat”, ning ibana pabilak-bilakkon. Dung i, ipalalu ia obar nia: ”Odo on uali i, pamasuk gulo bargot, dung mair ma gulo i, dabu ma sipulut i tu bagasan, oni i gaor – gaor, dung rara manida ibalut gulo bargot i, bo pasurut ma soban nai, napaangit-angitkon doma i”, ning ibana paboto-boto on. Bo anggo halak sanadeba, sapetona ngana purcayo halak nai dok nia i, harana sotik bahatna adong juo do na mamboto, tai inda ra halak paboto-boto on songon Ja Tilako i. Harana nadiingot ni halak, angkon naidahan doi jolo sipulut i anso dayuk.

Ro antong Ja Dagang, dung haluar sian lopo i, na manjadi pikiran nia do caro naidok ni Ja Tilako i, nabulus purcayo do ia songon naidok ni Ja Tilako i. Tolap tu bagas, na iodo on sa ma gulo bargot i uali, iombusi sa ma api dohot inggung-inggung anso gara, so ipas maer gulo bargot na madung iodo on i uali i. Maer ma gulo, na itekong sa ma sipulut opat tekong sian buntil nasirik lalek on, idabusa ma tu uali i “.... rengggg”, ningna sora ni dahanon sipulut naipamasuk tu ali i, natorus ma igaor-gaorsa. Dung rarama nida Ja Dagang, mamarbalut gulo sipulut i, na isurutisa ma soban, i inteon sa ma salau mangidup-idup i tangga dapur i. Angke Ja Dagang on bope na bulan puaso, tai naso unjung do ibana puaso. Natotop doi tiop taon muda di puaso na mungkap asam lambung ni ibana, pandok nia tu halak muda isapai halak aso do martimbus tataring nia di lang-lang ni ari. Sonang boto roha ni ibana, dung masak kuajik na madung lambat iangan-angankon ibana. “Madung adong dongan ni kopi pula ro koum-koum arirayo on manjalang tu bagason”. Tarsongoni ma ajakna ibagasan ni roha ni ibana.

Muloi do dung masak, santak arrayo, naso unjung do idai Ja Dagang kuajik na ipamasak nia i, Angke holong roha nia, mabiar ia inda cukup kinnai patibalon tu koum-koum na marroan.

Tibo ma di arirayo, songon na madung iparkiraon Ja Dagang i, memang peto do marroan ale koum-koum naro sian pandaraman, songoni juo dongan-dongan saparmayaman ni ibana hatio menek na jolo. Godang nian roha ni Ja Dagang, dalan manyambut aro-ro ni koum-koum tu bagas nia i, tai sapetona sonang-sonang ni roha ni Ja Dagang do mangida jinjingan ni dongan sabagas ni koum naroi doi ipalastik gesek-gesek na bontar. Anggo pambacoan ni Ja Dagang i palastik i tarsurat “Carefour”, ibagasan ni roha ni ibana: “Roangku ajakna silua ni koum naro on sabangso roti do on bo, anggo sian tulisan nai palastik i roangku roti kering Namarkapur maon ajakna ibagasan”.

Dung marsijalangan antong nai suru ni Ja Dagang ma koum na marroan on manaek tu bagas. Tai hatio manyolom nangkini, tarlambat so i palua Ja Dagang di namonyolom alak bagas ni bayo koum na roi na markabotulan boru na ilehen najolo margana na manopot kahanggi tu barisan ni halak Ja Dagang. Iutuk-utuk sa bagema tangan ni anak boru i hatio marsijalangan, salau idoksama: “Ala iboto...., martondi ilala i haroro muyuon”, ningna bagema. Padohal baen na limus rongkon lanom do ilala Ja Dagang tangan ni dongan sabagas ni bayo koum nia i. Goarna na maringanan i Jakarta, angke ngana unjung maniop pacul dohot goluk. Padohal sude na ipardok ni Ja Dagang i, ngana sian ate-ate nia, baen na mikim-mikim i songoni anak boru dongan sabagas ni koum naroi, bo dao buse male angan-angan ni Jadagang. Sooooorooo....ronggurrrr !!!

Dung marjugukan ma koum na marroan, Ja Dagang pe na mangido isin ma tu pudi giot mambaen inumon dohot lampiranna. Dung ibaensa tes manis, ibuatsa ma piso, i golat-golat sa ma kuajik nai uali i. Tai heranna roa ni Ja Dagang, igolat-igolatpe angke nahum maturgis maia, magaris songoni bokas ni piso i. Angke na songon simin doma karasna.

”Sambang kaji !!!”, ningna ibagasan ni rohana. “Ulang maila iba tu koum-koum on, angkon naijalahi do on akalna so tarkorot”, ning ibana muse ibagasan nirohana. Ibuatsa goluk, icubosa itampulsa kuajik nai uali i, lek songoni do, hum olat ni na mabar-bar maia. Inda abis akal ni Ja Dagang, ibuatsa itoru tataring kapak na godang humbaen pamkapak ni soban dohot panaba ni ayu ara biasona. Iangkatsa palan-palan uali ni kuajik i mijur ibana sian pintu dapur tu toru tu parik i. Harana mabiar ibana heran koum-koum i pula bur bar ia mangkapak i idapuran. Ngada beda be, na i patibal ni Ja Dagang doma kuajik na iuali i iginjang ni soban na godang, iangkatsa kapak saginjang-ginjangna: “Pakkk.....”, dung songoni dope so tallus kuajik i sian uali i. Dung songoni baru ilamot-lamotsa dohot kapak i juo. Nga lambat ibaensa ma ipinggan kuajik i dung itanggo-tanggosa. Na doting doma sora ni pinggan kaleng i hatio ipatibal Ja Dagang kuajik i iginjang nai, angke nasongon batu doma pir na.

“Alaaa ... santabi dongan di hamu sasudena, abis nangkini gulo ke au tu lopoan tongkin manuorsa, pohom ma hamu alak na dagang on”, ning Ja Dagang ma purak-purak, harana nida ia koum-koum na marroan on madung markuayam-kuayam, sanadeba mamargulung-gulung iamak bayuon i, baen biasanna painteon Ja Dagang ro mangoban inumon.

Dung i, ro obar ni Ja Dagang: ”Adope dongan, songonon dope rasokina”, ning ibana mandok koum-koum nia i. Dung manyirup tes manis na be, marsibuat ma sangkorot be kuajik on. Dung marsisargut, rap marsiliginan kalai. Paida-idasa Ja Dagang pe madung muloi homang, dotok-dotok di indorana: “Anggo on maila godang maiba on”, songoni ma ibagasan ni indorana.

Nga lambat antong marsipatibal mulak koum-koum on kuajik nadung ibuat ni halai nangkinian i. Adong na markilah: “Alaaa … nalupa do au i angkang Ja Dagang, na panyakit gulo dau, na marpantang do tu namanis-manis bo”, ning na sada. Ro na lain nai: “Nahum mangan dope dabo nangkini bo, butong dope ilala, kinnai domai”, ningna. Songoni juo na lain nai, marsitibal. Ngalambat na mangido isin ma sudena, na marmijuranma sian bagas ni Ja Dagang i.

Dung marmijuran koum na marroani, ro sapa-sapa di roha ni ibana: “Aso do so ngadong na mangan kuajik buatan nibaon, sailoja iba pamasakna”, salau ibuatia sangkorot. “Ngapp....”, ipamasukia kuajik i tu papangan ni ibana salau ibondutsa dohot ngadol na tinggal tungkona. “Inananahhhhhh.........”, ning ibana songon na ahancitan, salau adong na itulbaskonsa sian papangan nia. “Tengng....”, ningna sorana na madabu na haluar sian papangan ni Ja Dagang na topek maninjal tu pinggan kaleng iganan ni kuajik i. Masambang kaji … rupona matalgang ngadol ni Ja Dagang harani baen pirna na songon batu doma rupona kuajik na ipamasak nia i.

“Kurang ajarrr....!!!” Ning Ja Dagang, i ingotsa na mangalehen resep caro pamasak kuajik ala Jatilako. Icakukkonsa duangkorot, iompotsa haluar sian bagas, taro na salangka doma ibaensa mun tangga parginjang tu tanoi baen giot sosakna. Rupona nagiot manjalahi Ja Tilako do Ja Dagang. Iagaksa songon biasona nadung ilopoan mai marburas Ja Tilako, tusima idapotkon ibana.

Tolap tu lopoi peto dontong, angke madung i si Jatilako minum kopi, tai nahum bokasna doma nida itapak nai adong sotik parak-parakna so binoto nakopi do inumon ni Ja Tilakoi, angke na aek nabontar doma isi ni galas panginuman nia i, rupona maopat kalima Ja Tilako tambu aek.

Palan-palan i poluk Ja Dagang tu cakuk nia, itarik sa tangan salau idoksa: “Naaaa.... kuajik simin mon Ja Tilako, siritttt ni amamuuuuuu ... !!!” ning ibana salau ianjaksa itopo on sa tu boi ni Ja Tilako.

“Oiiiiii ... nang..., mate mauuu !!” Ning Jatilako, salau iahabsa boi ni ibana na madung markantang, songon pargodang ni kantang Tanagodang ombar dua i boi i. 

Na ni surat ni Pinrizky Lubis di ari Kamis tanggal 14 Februari 2013. Sada bayo halak Hutanagodang - Ulu Pungkut - Mandailing Julu, ibana marpandaraman di Tanjungbalai, Sumatera Utara.