Cerita Rakyat Mandailing (5)

Atia potang-potang dung salose si Banua pature-ture batangi ni i saba nia i, tarida ia mardalan palan-palan tu sopo na i tonga saba i. Dung manaek ia tu sopo i, ipajuguk ia di si salaos pakaluar pusuk dot imbako sian caku nia ambaen idupon. Dung ibalun ia imbako dohot pusuk i, i pagara ia muse ma idupon nia i dohot loting pakpak. Ngada lolot dungi, si Banua madung marbual sado-sado ia di si salaos mangkusande tu dinding ni sopo i. Sian parboi nia tarida na sonang mada roa ni ibana paida-ida eme na muloi marboltok sada-sada. Songon na lopeh do nida ilala ia garar ni karejo nia i na sasapotang pature-ture saba i dua bulan lolotna.

“O … ayah ni si Langgo … indape dot kamu muli tu huta !!” Ning tulang Jabalun sian dolok targogo.
“Indape, tongkin na i, abis jolo iduponkon, papudi mau!!” Ialusi si Banua sian sopo i.
“Jadima, pajolo mami”, ning tulang Jabalun laos mardalan udur dohot parsonduk nia i naambit sada danak menekna.

Inda sadia lolot dungi, i tonga dalan i lambung ni tobat bolak ni raja i pasuo tulang Jabalun dohot anak ni si Banua. Marsapa tulang Jabalun: “Giot tu dia do ho Bania ?"
“Mangalap ayah tu saba, tulang. Intean udak Karlan i bagas, baru ro sian Paroman Ampolu", ning si Bania.
“Na i saba an dope ayahmu nangkin, dompak mangaso i sopo muyu i”, ning tulang Jabalun.
“Jadima tulang, utopotkon jolo ayah tu si”, ning si Bania.
“Ke mani, marpalan alalaomu, na landit dope uida dalan-dalan arani udan na potang tuari”, ning tulang Jabalun.
“Olo tulang”, ning si Bania laos mangalangka maripas-ipas tu jolo.

Inda sanga dope ia tu saba ni alai i, sian jambu bol na i topi bondar i, i pio ia ayahnia marulak-ulak, tai inda dong alusna. “Tu jia dei baya ayahki”, ning roania. Inda sobar si Bania, kehe ia lao maripas-ipas manopotkon ayahnia tu sopo saba ni alai i. Laik do rupa so nga mangalus, angke na tarpodom do ayahnia di si, ungkorna dohur-dohur muse. Dung i, i ngoti danak i ‘tong ayahnia i.
“Ayah … ayah … ngot ko … ayah”, ning danak i marulak-ulak salaos mangutuk-utuk pat ni ayahnia.
“Bo … bo … bo ... ho dei, Lian ?” Mangkuling ayahnia dung ngot.
“Olo, ayah. Keta jolo muli, mang intean udak Karlan i bagas”, ning si Bania.
“Bo, aha dei luai so songgotna aroro ni udamu ?” Marsapa ayahnia.
“Inda uboto ba, ayah”, ning si Bania.
“Jadima, pamasuk jolo sumangge i tu adangan i”, ning ayahnia.
Dung ipamasuk si Bania sumangge i tu bagasan ni adangan i, alai nadua pe kehe ma muli udur tu huta.

Dung lalu tu bagas, udak ni si Bania pe ro ma tu pangkal tangga ni bagas i mangalo-alo angkang nia i. I jalang ia angkang nia i, dungi masukma alai tu bagas. Ayah ni si Bania torus tu bilik manggonti salin, udaknia juguk mulak i ruar, anggo si Bania kehe manopotkon umaknia tu dapur. Lalu ia tu dapur, marsapa umaknia: “Ma muli ayahmu, amang ?"
“Madung, umak”, ning si Bania.
“O, taruon jolo kopi ni ayahmon tu ruar”, ning umaknia.
Dompak na pataru kopi ni ayahnia i tu ruar, nida ia ayahnia mang rap juguk paadop-adop dohot udaknia i di si.

Mangkuling ayahnia: “Markasehatan do ita sude di Paroman?"
“Alhamdulillah, markairasan do nian. Kirim solom ni tulang Jagental dohot amangboru Japagar. Anggo inda adong halanganna, bulan oji nangkan ro, ro do alai mangulangi salaos pabuat amangboru Sawal na get naek oji i”, ning si Karlan.
“Sampe ma da i kirim solom i, mudah-mudahan nian ita sude markairasan so rap ita pabuat pala amangboru Sawal naek oji taon on”, ning si Banua.
“I ma da angkang, taringot di boruntai si Masniari, kan adi madung tommet sikola Parabek taon na lewat. Rupa dompak sikola i Parabek adong dongan marsambungnia di si, dongan sakalasnia. I bulan na solpu ro danak i maroban amangtuana dohot umaktuonia tu bagasta. Marsapa alai sanga tola do boruntai ioban kalai tu Sawah Lunto”, marcarito si Karlan.
“Bo, ma pade i. Songondia do ning borunta?” Marsapa si Banua.
“Anggo borunta madung olo do, boti madung lolot do alai nadua marsitandaan, biamantong na rap sasikola. Anggi ni angkang pe sada do nida roania. Arana madung tarjotjot do ia pasuo dohot simatobang ni danak i muda kehe anggi muyu pataru balanjo ni si Masniari tu Parabek”, ning si Karlan.
“Ma pade i anggo songon i, oni andigan ma iorjaon, adat sumondo do ibaen?” Marsapa mulak si Banua.
“Olo, saro i sadun do ibaen, angkang. Pokat nami tolu ari rayo orjana. I ma so ro au manopot angkang tu son, paboana oni mangido au tu angkang anso rap lagut ita na sabagas i orja na i, so martondi boruntai”, olos ni si Karlan.
“Anggo i da anggi madung kawajiban niba dei, asalma markairasan”, ning si Banua.
“On pe da angkang inda na bisa au moncot, arana nasosakan karejo get pature-ture kobun lasiak na baru isuanan. Baen na dompak logo di sadun angkon na i siram manyogot na potang. Tarlobi-lobi muse adong do jabat sapulu lungguk na usuani i. Naron dung kotu magorib, painte motor ALS na tu Air Bangis i ma au”, ning angginia i si Karlan.
“Jadima anggo songon i, tai markopi ma ita jolo”, ning si Banua.
Dung i, i suru ia anaknia i si Bania tu dapur mandok obar tu umaknia so i pature parmanganan. Tar sapangidupan dung mangan, tarbege ma di alai sora ni otuk sian musojid. Dung i, sora ni alak na bahang. Ambaen na get painte motor i angginia i si Karlan, inda kehe alai be sumbayang tu musojid, i bagas doma alai sumbayang marimom. Ngada lolot nian painteon, tarbege ma tuter ni motor ALS i, bulus i lojong si Bania tu topi dalan godang an mangambat motor i. Dung so ‘ntong motor i, manaek ma udaknia si Karlan tu motor i dung i jalang ia parjolo angkangnia si Banua, oni si Bania, si Langgo, induk ni daganak na dua i, na rap pabuat ia tu topi ni dalan godang i. Dung i bagasan motor i si Karlan sompat dope ia mandok obar: "Ke mau", ning ia. Dung i, tarbege muse sora: “Tarikkkk ... !!!”, ning kenek na i, baruma motor i mardalan palan-palan. “Tet … tut … tet … tut … tet …” tarbege muse sora ni tuter ni motor i, dung i pardalanna murmaisar tu julu an.

***
Tonga dua bulan dung i, alak na i huta ni si Banua i pe simbur ma karejo tu saba sasadari. Adong do sapoken jabat lolotna alak huta i marrami-rami i saba an. Adong na manyabi dope dohot marbunbun, sadebana adong na mardege, adong juo muse ‘ntong na dung mangangin, marsibaen karejona so ipas taroban muli eme i tu huta. Somalna, antargan so mangan kotu, so umgogo na karejo i, mangan bubur cacak mei jolo. Dodas dei daganak na dot tu saba manolongi, marulak-ulak martambu arani tabona bubur cacak i: songon kue bongko adi, somal dei parbukonta di bulan puaso.

“Piga belek do dapot taon on”, marsapa Jakulim tu si Banua atia rap minum kopi alai di lopo ni Jauristak na i lambung losung bonggar i.
“Murak do boto tulang, taon na lewat dapot do lima pulu belek, anggo taon on tolu pulu lima belek maia”, ning si Banua.
“I ma da ubege-bege, rap na morong do ita na sahuta on, mur murak pandapotan. Tarlobi-lobi muse marayak ari rayo songon on, murmagodang muse ma arga ni barang”, ning Jakulim.
“Olo uida, ulu bondar nami, taiba anggo arga ni gota, ulit manis, congkeh dohot tanaon na mur mur mamura do. Ngada uboto be da maso on, songon na madabu itanggang tangga muse do ulala”, ning si Banua.
“Botul dei amangboru, poken na lewat arga ni gota saringgit doma sakilo, i pe angkon na ioban tu pasar. Anggo i gadis tu pamuge na i huta on, dua rupia maia iarga i alai sakilo”, ning si Sargut sian topi an.
“Songon i ma boto sannari ita na markampung on, dapot taon mur tu laratna do ulala, ulang ma jolo na get pasehat-sehatkon minum susu sakali sadari, kopi paet pe inumon niba sasapoken i lopo on leng na tarutang-utang juo dibaensa”, ning si Ranggas patidaon arsak ni roa nia.
“Olo le, na paet ma ulala batu ni mahoni, na paetan dope hangoluan niba sannari. On na get ari rayo muse ma bo, mur poning ulu niba”, itambai si Jakolek muse na juguk i lambung pintu ni lopo i.
“Ala ... ulang da bo ma comeh tu ita di hangoluan on, Tuhan do na Lobi Kuaso. Kan adi somalna atia aleon songon on, rap rim do ita manggore tu batang aek an”, ning sada tobang-tobang na di lopo i.
“Olo te, amangboru. Botul ma da i, muda atia aleon biasona mungkap mei sere na i Batang Gadis an. Incogot pade mei gakku ubaen parkononganku i aje ni tahalak na i lambung ni suro ni dadaboru i”, ning si Katitiren.
“Anggo ho da lae, aso mei angkon na i lambung suro ni dadaboru i ibaenko parkononganmu, inda langa ila roamu paida-ida alai dadaboru muda dompak maridi mangusa-usa arumpang ni alai di si”, ning si Jakatik mangarsak.
“Ulang sala sangko hamu boto tu si Katitiren, arana na bahatan dabo sere na dayuk di si, marparak doma na sabatu ni lasiak ... ka ... ka ... kakkkk ...”, matukakkak si Porkas.
“Ulang ko se na mangalayas jau, Porkas. Ho pe na dodas do uida potang-potang i kobun-kobun pisang na i bariba, purak-purak manastasi bulung ni pisang, tai aha do, na buncilak do matamu tu tapian ni dadaboru i !!” Kaluar obar ni si Katitiren targogo arani milasna roa nia pabege-bege obar ni si Porkas i.
Sip tong si Porkas. Tai anggo sibuk nia pupu meos-keos i juguan nia i, muko na mar rara, oni hibul muse tenju-tenjuna.
Paida-ida si Porkas na get putungan i, bulus mangkuling tulangnia Jatalam: “O ... bere, sadia do arga ni ulit manis poken i?”
“Au da tulang tu udak Palit do ugadis, sakotip iargai ia sakilo“, mangalus si Porkas, tarpalan ma nida sotik dung ipangkulingkon tulangnia i.
“Na godang tong targadis ko, na maruntung ma ho i, au tolu ringgit ma ia na ra toke i manabusisa i pasar an, loja doma ula pae-paulu i pasaran manyapai arga ni ulit manis tu toke-toke i na i Banjar Kuliling”, ning si Sargut.
“Inda na bana dope i, te si Lokot targadis ia lima ringgit sakilo ji oji na sian Tambangan i”, ning si Porkas.
“Lain ma jolo kecek i, magodang do le arga ni piso takik ?” Marsapa si Ranggas.
Ro ‘ntong ning si Sargut: “Na get apea dia do he takik on mi, songon on maso parudan, maraek batang, landit !!”.
Mangkuling muse si Porkas: “Batang na dia do, ala ... ijia mei nangkan maraek i, angke na dung ranggason do uida sude apeami na i Aek Karlan an”.
“Andigan muse dei nida ho kobun apeangki, sasataon na tu bariba aek do tohapmu !!” Ning si Ranggas tu si Porkas.
“Kobun apeami kan na i lambung koje godang i ?” Marsapa si Porkas.
”Inda ba le, kobun apea ni mandiang Jatorop dei, anggo kobunku dao dope tu dolok, i lambung ni tusam an”, ning si Ranggas.
”Antak kamu i le, i sajo kecek on, songondia do, ita muloi ma pature panggoreanta be poken on ?” Mangkuling si Jakolek.
“Pokatna do da, anggo au olo, biado le ita na di lopo on”, marsapa si Sargut.
“Aropku da pade mei ita muloi incogot, palanga aduan, arana dua poken na i puaso ma ita”, mangkuling Jakulim bayo na tobang i.
“Au pe sapandapot do dot tulang i, hum ipas hum pade”, ning si Banua.
Dung i, putus pokat ni alai na i lopo rap pature panggorean na be aduan. Ari pentong madung bagas borngin, mulak-mulak sada ma alai sian lopo i tu aratak na be. Sado si Ranggas doma na tading di si. Rupa so parbalakangan ia mulak ambaen na get marutang sigaret do ia di parlopo i.
”Tuliskon amangboru ma joloda, pokenon doma ita maretong”, ning si Ranggas.
”Ho pe da Ranggas, dapot poken pupu ituliskon, mandok songondia dei he!” Targogo sora ni alak parlopo i.
”Sobar ma jolo amangboru, dompak aleon ale”, ning si Ranggas palan.
”Aleon ni ahana dei, aleon igungmu da”, ning amangborunia i muse. Tai ba songon i pe obar nia, leng na i lehenna juo do si Ranggas marutang.

***
Dung pe sapoken na i doma so ari rayo, anggo alak Huta Toras i na leng bahat sajo dope manggore i batang aek an. Itaonkon kalai songon di si bope ro udan sian manyogot sampe tu kotu. Mangampiri pe pat dohot tangan ni alai arani lolotna i batang aek i, ngada hum roa ni alai nida. Pupu musengtong male arani tondik na i bagasan ni aek i sajo markonong mambuat pasir alom sian toruan. Somal dei mabangkir ulu ni alai itinggang batu dompak markonong i bagasan ni aek i, anggo hum na marbujal ulu i na biaso do mei. Bahat dei alak i, baen asikna na manggore i, laos kotu magorib do ma so morot kalai sian batang aek i. Biamantong, angke porlu daknanak marbaju na baru di ari rayo on. Ulang muse na so dong lomang dohot aleme koroton i bagas, murtama musengton muda adong kue sapit dot kue kambang loyang tambana surduon tu koum-sisolkot na ro tu bagas niba. Ila dei boto roa muda ngadong pangan-panganon i bagas niba muda ari rayo. Daganak niba pe angkon na adong muse mei paraburna bope na sotik ale, bopentong na hum panabusi ni pocal satapak dohot cendor samangkuk. I ma da boto so itaonkon simatobang niba songon i sasadari manggore i batang aek an bope bituana male boti pamatangna matondik ngali-ngalian.

Dung kotu isa bahat mei tarida ama-ama bope na tobang-tobang i lopo ni Jagulo i. Kecekkonon ni alai di si inda dao sian parhalan na masa dompak i, ima simbur ni alak sakampung manggore arani aleon.
“Biado, mangasi do i jae?” Marsapa si Sargut tu si Ganggang.
“Adong sotik, tai na sasamonis maia, anggo tar i julu sotik, i lambung ni napal i, dapot kalai do di si na sabatu ni lasiak”, ning si Ganggang.
“Ma paten mei, anggo ami i bariba na sasatungir maia na dapot”, ning Jagerep na juguk i lambung ni si Ganggang.
“Tai ubege i jae ni suro ni dadaboru i adong do na dapot sa na sasajegang”, ning si Ganggang.
”Ala ... ise muse dei na manggabusi ho i", ning Jagerep.
“Botul do da carito on, sapai dabo si Pege na rap sapanggorean dohot si Dapot. Mai gadis umak ni si Dapot ma sere na sajegang i tu tukang sere na i pasar na tuari”, ning si Ganggang.
“Ah, botul dehe?” Marsapa Jagerep.
“Olo, sapai dabo si Dapot so joleh ilala ho”, ning si Ganggang.
“Ampot dabo tapor-tapor ni sere na saulu ni kudo i dei na dapot si Dapot i”, ning ompung Katik.
“Ho da amangboru, andigan muse dei adong sere saulu ni kudo i kampungta on”, ning si Sargut.
“Bo, inda unjung dope langa ibege homu carito sere na saulu ni kudo i, nida halak na baron atia paimbar batu na godang i parbalan na i bariba?” Ning bayo na tobang i.

Dung i, ipatorus ia marcarito: “Na jolo, atia alak huta on margotong-royong mambaen parbalan na i bariba aek i, i tonga-tonga adong sada batu na godang, tar saopuk panggodangna. Adong do tolu ari jabat so tarungkal kalai batu na godang i. Dung tarangkat batu i, bo nida alak na di sian mada sere na saulu ni kudo payak i toru na i, i lubang i. Ngangang kalai sude paida-idasa, oni sip sude songon na ona sihir. Tai inda lolot dung i adong mada sada bayo na get mijur tu lubang na i giot mambuat sere na saulu ni kudo i. Indape sompat bayo i mijur tu lobang i, adong muse sada bayo na maniop tangan ni bayo i, oni isaratkon ia bayo i mandao sian lubang i. Idokon bayo i ulang ibuat jolo sere na saulu ni kudo i, arana sere i na marbegu dei, sere ni jihin. Ning ia, so bisa tarbuat sere na saulu ni kudo i angkon na i siram dei jolo dohot mudar ni manuk na lomlom. Dung i marpokat kalai sanga ise na i suru kehe tu huta mangalap sada manuk na lomlom ambaen koyokon i ginjang ni sere na saulu ni kudo i. Putus pokat i suru ma dua alak tu huta mangalap manuk na lomlom. Dung kehe na dua alak i tu huta, alai na tinggal di si leng jonggor i topi ni lubang i, tai anggo mata ni alai sude leng na tu sere na saulu ni kudo i. Inda binoto-binoto tarbege ma di alai sora na santak gogo, tarsongon sora ni ronggur, oni mutur muse ilala alai tano parjonjongan ni alai i, songon na ro lalo. Inda binoto sanga arani aha, magulang mada batu na godang na baru iungkal i masuk mulak tu lubang i. Sere na saulu ni kudo i pe nga nida be dung itimpoi batu na godang i. Inda lolot dung i, ro mantong alak na duai tu si, oban sada manuk na lomlom. Nida alai, alak na isian sude songon na maoto. Dung ipangkulingkon kalai dope so songon na sodar mulak. Oni, sere na saulu ni kudo i pe ngada adong nida di si be, batu na godang i mang masuk mulak tu lubang na i. Dung do kajadian na gaduk i, i sajo doma kecekkonon ni alak na sahuta i sasaborngin, oni bonggal musengton tu ombar balok ni huta i. Dua ari dung i, ioban alak Huta Toras i ma sada Bayo Datu na beteng, dohot sada manuk na lomlom tu bariba. Marsitutu alak na bahat i margotong-royong so tarungkal mulak batu na godang i. Urang-lobina satonga ari, tarungkal ma batu na godang i. Tai aha do, sere na saulu ni kudo i ngada dong be i toru nai, mago boti. Leam doma nida ilala alak na bahat i. Baen holas na nida roa ni alak na bahat i sadebana, tu batu na godang i doma tandosanna ibaen kalai i. Pukpak i rambani alai batu na godang i dohot aha sajo na dapot kalai, bope batu jana hayu, taro marsurak-surak songon alak na giot putungan. Pangabisanna, marrami-rami alai manggulang batu na godang i, dung i, i durukkon kalai tu aek godang i”.

Pabege-bege carito ni bayo na tobang i, alak na i lopo i adong tong na mikim-mikim, adong muse na get mantata tai itutup ia babania dohot tangan so ulang tarbege sora ni tata nia i, adong juo ‘ntong na ngangang babana, adong musengtong na marsitundu.
Ro ning si Ganggang: “Au pe da amangboru unjung do icaritoon ompungku jau losung dohot indalu sere. Ning ompungku na jalo, adong mada dua alak na lumobi betengna, alak na sakti. Sada sian jae an margorar Patuan Langit, sada nai muse sian julu on margorar Raja Nagasaki. I sada maso, so binoto ’ntong sanga ise na hum beteng, martanding ma alai na dua i tonga-tonga ni banua Mandala Holing on, i ma di uncuk ni gunung Sorik Marapi an. Patuan Langit maroban sinjato losung na sian sere, Raja Nagasaki maroban sinjato indalu na sian sere juo. Dung kalai nadua martanding marmoncak pitu ari pitu borngin, ngada dong na talu, tai rap loja mosa-osa aduana, arani i mangaso alai satongkin. Atia pitpit mata ni Patuan Langit satongkin arani amasukan agas matania, bulusma irambankon Raja Nagasaki sinjato indalu nia i tu ginjang an. Dung i, i pasang ia muse mantong ajina so mijur ipas indalu i tu toru so ipotuk sa ulu ni Patuan Langit, so batas mate, ning roania. Paida-ida indalu na get ro momotuk ulu nia i, iambungkon Patuan Langit muse ’ntong sinjato losung nia i tu ginjang an. Bo, masuk mada indalu i tu lubang ni losung i, dung i tarbege sora na maturatak-maturutuk: tuk ... tak ... tuk ... tak ... tuk ... tak ..., ninna sajoma binege. Inda lolot dung i, tarbege ma sora: Parrrrrrrrrrrrrrrrrrrr ..., songon adong na mapultak binebe. Rupa, losung dohot indalu na sian sere i do na matapor i ginjang an, oni tapor-tapor na i manyarsar tu jia-jia, dung i mangkadabu tu tano i. Tapor-tapor na i sadebana mapistak tu mata ni alai na dua. Arani ni marmudar-mudar mada mata ni alai, oni na golap doma ilala alai arion, ngada be bisana mengida sanga aha pe, na mandadap-dadapi doma tongan ni na dua halak i manjalaki parsitiopan so bisa jongjong. So bisa pe alai na dua mijur sian uncuk ni gunung Sorik Marapi i, ambaen na dong do topek alak huta na i toru ni gunung i dompak mambuat balerang ambaen pulungan ni ubat ni alak na purgatalon. Dung do kajadian i, dua alak na sakti i margonti goarna: Si Pitung Sorik Marapi doma ipio halak na bahat”.

”Ha ... ha ... ha ...”, martata-tata si Sargut sagogo-gogona. Dung i mangkuling ia: “Patut do rupa so nga nida be sere na saulu ni kudo na i parbalan na i bariba, angke na ibuat ni Patuan Langit dohot Raja Nagasaki do ambaen sinjato ji alai”.
“Anggo na botul da carito i, aropku incogot tu uncuk ni gunung Sorik Marapi an doma ita manggore, ngase binoto ale ampot dapot kita dope mulak tapor-tapor ni losung dohot indalu sere i”, ning si Ranggas.
“Jo le Ranggas, ulumu pe na dung rangas-ranggason do ho uida, bope na poso dope ho”, ning Jagerep.
“Marpalan doba Jagerep, utipul-tipul ko naon songon gerep”, ning si Ranggas ambaen holas na roa nia pabege-bege obar ni Jagerep i.
Pabege-bege na marsirisaan i, mangkuling Jakulim targogo: “He, antak kamu i, bulan puaso do daon, ulang ibaen na so ture parange niba !!”.
Dung ipaingot bayo na tobang i, marsipan kalai ‘ntong na marsirisaan i. Aripe pentong mang bagas borngin, alai na i lopo i pe marmulakan ma sada-sada tu aratak na be.

***“Allaahu akbar... Allaahu akbar... Allaahu akbar.....
Laa - ilaaha - illallaahu wallaahu akbar.
Allaahu akbar walillaahil - hamd.
Allaahu akbaru kabiiraa walhamdulillaahi katsiiraa,... wasubhaanallaahi bukrataw - wa ashillaa. Laa - ilaaha illallaahu walaa na'budu illaa iyyaahu mukhlishiina lahuddiina walau karihal - kaafiruun. Laa - ilaaha - illallaahu wahdah, shadaqa wa'dah, wanashara 'abdah, - wa - a'azza - jundah, wahazamal - ahzaaba wahdah. Laa - ilaaha illallaahu wallaahu akbar”.

Tarbege takbir marulak-ulak sian musojid godang. Alak na i Huta Toras pe ’ntong markean ma tu musojid. Pas pukul pitu manyogot, mambaca katubah ma oji Saleh. Songon taon-taon na salpu do da, sipaingot ni ibana tu alak na bahat i, leng na i juo do: "ita pabahat sobar na mangolu on, oni ulang lupa marsyukur tu Na Sada i, Na Maha Kuaso i, so salamat kita mangolu i dunia on sampe tu akhirat. Bahat pe ra dei urang, otik pentong bisa cukup", ning bayo na lobi malim i. Sadebana ’ntong nida alak na i bagasan musojid i, adong na mondok-mondok get modom, adong juo ’ntong na dung tarpodom, manombo angkon na i goritkon domei so ngot mulak. Anggo daganak i pupu retuk i baris balakang, apalagi dakdanak na dung mompas godang i, songon si Retuk anak ni tuak Sobaruddin dohot si Lage anak ni amangboru Sukur, loja doma nida ama-ama i mangoraisa, arana get sosok ilala alai sidung sumbayang, so bisa marmayam bope na giot marlancung atope marabur manabusi pangan-panganon na tabo. Olo da, gorarna pe ari rayo tele.

Dung salose sumbayang ari rayo, marmulakan mei alak na bahat i tu bagas na be dung rap marsijalangan i musojid: ”upat puji sohir batin”, ning kalai mei atia marsijalangan. Dung tu bagas niba ’ntong, iba na sabagas muse mei marsimohop-mohopan. Parjolo mangido mohop iba tu amang dohot inang niba, dungi baruma tu abang dohot kakak niba. Dungi rap-rap kehe mei iba na sabagas manjalang tu bagas ni tobang, ompung, udak, tuak, tulang, amangboru, dohot koum-koum niba sudena na di huta i. Oni dodas muse dei iba sabagas marsiulangan dohot koum-sisolkot niba na mian di huta luar. Di ari rayo na borkat i, busungon doma ilala bitua niba arani na mangankon i sajo.

Somal na atia ari rayo, adong sajo dei alak huta i na pabagaskon atope na palalu hajat na asing-asing na i, ja na mangkekah sanga na pabotohon. Masona mei mangan na tabo marrami-rami di orja: mangan juhut ni ambeng, orbo sanga lombu na igule dohot kacang muring, atope pisang sanga sibodak. Dodas dei alak na mian di huta na sada mangalap boru tu huta na lain. Adong juo ‘ntong na mambuat boru i huta nia. Muda sisolkot atope koum niba na markaroan i, ro mei taon na tu bagas niba. Muda ro taonna jiba, inda nangkan tartulak i ba, angkon na ro dei iba, bope na tarmarun-marun ilala sotik sibuk niba, biamantong alak iba an sudena na markoum marsisolkot samatua. Dodas musengtong i ari rayo na borkat i, ro taon ni namarkaroan tu iba sian koum atope sisolkot niba na mian di luat na dao.

“Songon dia do le ayahna, lalu do ita mangaligi na markaroan i tolu ari rayo tu Paroman Ampolu?” Marsapa umak ni si Langgo.
Ro ning ayah ni si Langgo: “Jadi, ma ugadis ma sere na ugore i sude, so dong ongkosta tu sadun”. “Piga do manuk obanon”, marsapa mulak umak ni Langgo.
“Martolu pade mei gakku”, ning ayah ni si Langgo.
“Ayah, ke jolo au tu Sopo Godang mangaligi na margordang, na simburan ubege”, ning si Bania.
“Ke mani amang, tai mulak ko antargan so kutu luhur, so rap sumbayang kita tu musojid”, ning ayah nia.
“Olo, ayah”, ning si Bania salaos keluar sian bagas ni alai.

***
Dung sapoken marari rayo di hutana be, koum-sisolkot na dompak mulak kampung sian ranto pe marmulakan muse ma alai tu pandaraman na be. Bope bahat do nian panganon na tabo i huta-huta na godang an, tai anggo lomang dohot alame leng na ioban dei ambaen silua, bope na sotik le, so leng adong daion ni koum-sisolkot niba i kota na so sompat marari rayo i kampung. Dung markean kalai sudena, lungun mei nida huta i, mulak songon na biaso.

Atia tonga ari i huta i dung kotu luhur, i lopo ni Jagulo i tarbahat do dompak alak na markopi di si taro mangecek-ecek.
“Nangkin adong uida lima halak na ro tu bagas ni tulang Jakayo, na sian dia dei luai?” Marsapa si Ranggas tu alak na i bagasan lopo i.
“Olo, au pe uida dei, maroban masin bageng, sanga aha pe nangkan karejoon ni alai di huta on”, ning si Sargut.
Ro ning Jagerep: ”Inda iboto homu langa, na get mardompeng dei alai tu batang aek an, mambuat sere. Adong gorarna dompeng apung, masinnai i ibaen i tonga ni batang aek i, muda dompeng darat, i darat ibaen masinnai. Oni adong dua selangna, sada mangincop, sadanai mangutahonna”, ning Jagerep.
”Anggo i luat ni alak balok an boto na mardompeng i, na jebuan do ubege”, ning si Ranggas. Dung i, mangkuling muse ia mulak dung iinum ia kopinia sandornguk: ”Parjolo-jolona alak i mardompeng i batang aek i do, tai lolot-lolot mardompeng kalai i darat. Ja na saba, ja na kobun, ikoruk kalai tanonai tu toru an sampe tarnapal, dung maraek ma lubang galian i, baruma ipasang kalai masin mangincop tano na i. Tano na kaluar sian masin i, ialirkon muse ma tu para-para na maralas goni, i goni i ma marsangkotan sere i. So momo elaon sere na i goni i, so tumpuk marlagut, idurus kalai mei dohot aek, inda uboto sanga aek aha gorarna, tai marnyae dei iba dibaensa muda tarinum, mate pe ra dei gakku muda bahat tarinum iba. Tarsongon rasa dei gakku. Ulang majolo saba-kobun iurkaran, tano na i taruma ni bagas ni alai pe i dompeng kalai”.
”Ak le dongan, i dabo uida karejo ni alak na get ipas kayo dei ning roangku”, ning si Ganggang.
”Au pe ning roangku ipar, tai boto ngada piga halak jabat na kayo ibaensa, hum na sada-dua halak maia, ipe ampuna ni masin dompeng nai dei na marlabo godang, toke na i”, ning si Ranggas.
”Marcarito tuak Jakayo jau, get mardompeng kalai i parbalan na i bariba dua ari na i”, ning Jagerep.
”Be, inda langa na i boto ni tuakmu carito ni ompung Katik i, ma mago ma sere na saulu ni kudo i sian parbalan i, ha ... ha ... ha ...”, martata si Sargut.
“Olo tele, na sala paretongan dei tuakmi, sugari tu uncuk ni gunung Sorik Marapi an do ioban ia anggotania i mardompeng, nga se binoto dapot kalai tapor-tapor ni lusung dohot indalu sere i”, ning si Ganggang.
“Na pintaran do uida ilala ho silepe-lepe umpado tuakku alak na kayo i”, milas rupa indora ni Jagerep pabege-bege obar ni si Ganggang i, ima sosongon i obar na kaluar sian babania.
“Kete muli le, na bahatan kulala rongit, murmalilas ulala di ari na golap on”, ning si Ranggas.
”Kei mulak parjolo, tai ulang lupa bayar kopi dohot sigaretmu”, ning Jagerep muse, leng na holas dope rupa roa nia.
“Ala, ho ma jolo dabo mambayarsa, kan adi alak na kayo do tuakta”, ning si Ranggas muse ‘ntong.
“Na momo mei ilala ho, abiskon pangomoanmu”, ning Jagerep inda ra talu.
“Saima dabo manden, keta le muli, mang bagas borngin bo, sajia jo Ranggas, so ubayar palalu”, ning si Sargut.

Sapoken dung na marcarito i alai di lopo ni Jagulo i, manyogot-nyogot dope ari madung tarbege sora ni masin dopeng-dopeng i bariba aek. Rupana madung mardompengma anggota ni Jakayo i parbalan i tar itopi ni batang aek i, para-para pe mang jonjong di si dohot sopo-sopona. Sadari i alai markarejo di si, dung laos magorib doma so mantak. Sabutulna, ingoran do ilala alak huta i sadebana pabege-bege sora ni dompeng i, tarlobi-logi sorana dopeng-dopeng sian manyogot sampe tu potang ni ari, tai biamantong ale, nga tardok kalai le obar, ulang-ulang ma jolo tu Jakayo, habiaran ni alak huta i sadebana ambaen na marepeng i bayo i: ”ibayari ia ho non jongjong”, ning kalai alak na lomosan i paida-ida Jakayo.

Dung tar dua poken alak na roi, anggota ni Jakayo i mardompeng di si, marroan muse ma alak na balok na get mardompeng muse di si, arana bonggal rupa tu dia-dia bahaso na mangasi do na mardompeng i, bahat dapot kalai sere na sasajegang di si. Anggo sere hum na sasamonis do, ngada jalai ba, na i ayup kalai dei tu batang aek i. Ngada jabat sabulan, na ramian doma alak i batang aek an umpado i pasaran atia poken. Salangku bahat sajo alak ro tu si bope hun na meos-keos songoni. Tarlobi-lobi ’ntong adong muse lopo kopi dohot panganon i topi aek an, bope na pocal sanga goreng pisang, asidunganna margonti soluk alak ro mangaligi alak na mardompeng i.

Indantong tartahan kalak Huta Toras i be paida-ida simburna alak na mardompeng di huta ni alai i. I jalaki alai muse mantong alak na marepeng na ra manabusi masin dompeng, so dot muse alai mardompeng di si, tarlobi-lobi musengtong pardompengan i banua ni alai do, ulang ’ntong alak na balok sajo kayo dibaensa, alai pe por sikatutu do roa ni alai na giot kayo i. Ngada tarantai be, na sap doma alak na mardompeng muloi do sian belok na i Panggargaran an sampe tu Lubuk Siating. Songon porkis doma nida alak i ambaen bahatna pae-paulu i topi aek an.

I mantong tele gorarna alak na marusaho, adong na dapotan bahat, lobian doma jabat, adong musengtong na hum paspasan maia, lopeh-lopeh mangan songon i, tai ba bahat juo do na marngae. Ulang ma jolo le angkan na dapotan epeng na sotik sian pangomoan di na mardompeng i, na dapot nyae do arani ulu mabangkir itinggang batu na godang, pat mabingka ona cangkul, marun milas matondik dapotan i arani sasadari i batang aek an, adong juo antong na mungkap ronggotna. Untung na ma le ronggot api, anggo sugari ronggot aek aropku na madung mayup mei alaknai i aek na godang i. Arani na mardompeng i, inda boto hum na parmaraan na ro tu sibuk niba, saba pe marsegaan arani bahat na i urkuran, i tolbakan, songon i muse suan-suanan ni kobun-kobun pe bahat na i tabaan, marmomo nida songoni roa ni alak i: ”na ponting dapot sere sabahat-bahatna so marepeng na bahat so jadi alak na kayo”, songon i ma gakku na dong i bagasan roa ni alai. Nga piga be alak na marpikir sanga songondia akibatna tu pudi ni ari pala leng ipupu sajo na mardompeng i. Ulang nian sugari jabat manggora naso nida i, mabiar iba dabole ro bala na godang. Nian somalna ita manusia on, dung ro dei bala na godang i tu jolo niba so sodar iba parmaraan godang. Dung iraso i dangolna na ona bala na godang i, bahat mei na mandok: sugari songon on, sugari songon i, pupu marsugari-sugari, manyosali na dung tarjadi. I ma da bo so i dok alak na jolo-jolo i: "i ambang ko dontong adong tampang ni sugari !!!"

”Na saborngin, ompak lewat au i jolo lopo ni si Jalentak i, adong boto uida opat bayo na minum kopi di si, i dopis-dopis kalai boru ni tulang Mardan, si Pikek adi, oni adong na mandok obar: ro mau tu parik bagastai naron da, painte au te, ninna bage”, marcarito si Lagut.
”Botul dehe, ise mei alakna”, ning si Sanggar.
”Olo, inda utandai sanga alak dia i, alak na ro dei roangku”, ning si Lagut.
“Anggo i jae boto, ubege adong muse manuk na mago sian lobu, adong bage manuk na dompak modomkon i sanggak, buyukon doma pira na i, bo mangamuk antong udak Palit, iroro i alak na ro i, get iumban ia ma ulu ni alak i dot upang, untungma iora amangboru Goti, anggo inda gakku ra dei mabangkir mardaro-daro ulu ni alak na ro i”, ning si Sargut.
“Te na borngin tuari ma, adong muse dua alak na mabuk marjuguk-juguk i batang karambir na maurbat na i dolok, na i lambung ni suro i adi. Dompak lewat au sian jolo na i, sada halak mangkuling: hei lae, sigaret mi jo ba sabatang, ninna mon. Bo, upaibul tenjungku, uhaning sakali tu mukonai, jampayar so iboto homu tu tano i”, itambai si Ranggas muse.
“Alaaa ... tulang, marpalan da, mate non anak ni alaki, ha ... ha ... ha ...”, ning si Lagut salaos martata.
“Inda sianyang dabole bere, muda nga purcaya ho, kete ita topotkon alaknai sannari tu pardompengan na i toru ni ayu ara an”, ning si Ranggas.
“Nangkon be da tulang, tongkin nai tarsongkik au muse bayo i, ha ... ha ... ha”, ning si Lagut tai leng ipupu ia juo mantata-tata.
"Bana dei, na dung malalu tu dei uida, marmabuk-mabuk kalai i hutanta on, ulang sompat ubege iulaki alai parange na songonian, uayup mei tu batang aek an", ning si Sargut ambaen milas na roania.

Ehem, mengkehem sada bayo na tobang na juguk i susui ni lopo i, dung i mangkuling: “O ... parlopo, tamba jolo aek ni kopingkon e, oni laoskon sigaret sabatang”.
“Olo amangtua, ro ma”, ning alak parlopo i.
Dung itambai parlopo i aek ni kopi ni bayo na tobang i, oni ilehen ia muse mantong sigaret sabatang, bulus ma isurkut bayo na tobang i sigaret nia i, ipakaluar ia musema timbus na i ngon baba dohot igung nia marulak-ulak. Iangkat ia muse cangkir ni kopi nia i, isirup ia musengtong kopi i, ngada be, na mur maliar ma nida mata ni bayo na tobang i, songon na baru ngot modom na sinok, cikar doma nida.

Inda lolot dung i, mangkuling musema bayo na tobang i: “Aha na i pardokoni muyu i sudena botul dei, porlu dei ita ipikirkon sanga songonjia carana so ulang ro galebut arani bahatna alak no ro mangomo mardompeng tu hutanta on. Songon i pe, adong dope parhalan na lumobi borat adoponta pala”.
“Bo, aha museng dei tobang, humitir kulala totku”, ning si Sargut.
”Ira-ira sapulu taon na solpu, unjung ro alak na balok na marsikola gincat tu hutanta on. Ning kalai giot mamareso sanga aha sajo do na adong i toru ni tanonta on. Bonggal juo do dabo tu alai bahaso tano ingananta sorang on didok kalak Tano Sere, Tano Omas Sigumorsing, banua na torkis sapanjang. Bo udok: botul dei, sian na robi luat Mandala Holing on leng na ni dok ni halak mei songon i. Bukti na tinggal tong bahat, adong Garabak Ni Agom i Ulu Pungkut, bokas tombang sere ni alak Agam-Minangkabau, Tombang Ubi i lambung Muarasipongi, bokas tombang sere ni si bontar mata bangso panjajah alak Ulando i, Saba Garabak i Huta Pungkut, Tombang Galudak i Kuala Lumpur, eh ... i ... Tombang Bustak, dohot na asing-asing na i. Inda piga taon dung i, ro musema alai mulak tu hita on singkop dohot paralatanna ambaen pareso sanga sadia do parbahat ni sere i toru ni tanonta on, so binotontong sanga na marlabo ato marugi muda ipalalu i bukak tombang sere i. Ning kalai madung tola do alai mambukak tombang di banuanta Mandala Holing on. Inda lolot be ning kalai, muloi ma alai markarejo marsitutu. Au da, muda uida tombang sere na dong di tano ni halak na balok an, na goso do da uida, adong dei gakku sasator tano na i urkuri i, dung i, jadi lubang na bagas oni bolak muse, songon dano doma nida muda lubang galian na i marisi aek, tarlobi-lobi muda parudan, marparau pe bisa di si. Boti, muda bahat lubang na godang-godang na i galian di na manjalaki sere i, ulang-ulang ma jolo i uncuk ni tor an i lubangan, mandok aha dei luai. Taringot au baya mulak tu kajadian na dung solpu, dodas dope binege sampe sannari obar ni alak: Mayup Mompang, ning kalai. Baen hebatna mei kajadian i na jolo so ibaen koumta na sian julu an tokok ni gondang i tarsongon sora ni touk na martiga-tiga, ibaen kalai gorarna gondang Aek Magodang, i ma so rap ta boto”.

Dung marcarito bayo na tobang i, bulus mangkuling si Lagut: ”Inanggo inang, songon i do jabat, amangboru?”
“Songon i ma carito ni ompungku atia au kalas tolu SR”, ning bayo na tobang i.
“Au pe raian juo dau pabege-begesa, tobang”, ning si Sargut. Dung i, mangkuling muse ia mulak: “Anggo parbinotoan ni amangboru i, adong do dalan na asing na humpade so leng torkis hangoluanta i banuanta on?“

Songon na tarsonggot nida bayo na tobang i dung marsapa si Sargut. Tai nian mangalus juo do bayo na tobang i.
“Ala ... songondiama udokon tele, kan iboto homu do, au le ngada incat jabat sikolana, SMP pe ngada tommet. Urang dei padena gakku homu marsapa tu au, tarlobi-lobi satontang parhalan ni hangoluan ni alak na jaji“.
“Sikola bisa dei sagincat-gincatna, muda porlu sampe tu langit na patolu on, taiba anggo pangalaman ni sasada halak i marbeso dei, amangboru“, ning si Lagut.
“Anggo ho da tulang menek, peto mantong ko pinompar ni alak na malo mangatak mangetong i“, ning bayo na tobang i.

***
Dung salose sumbayang isa, murbahat ma alak na ro tu lopo i. Parlopo i pentong madung masak muse ma gorengnia satalam godang, milas-milas oni uskus muse, get manetek jabat ijur niba paanggo-anggosa i borngin ni ari na ngali i. Baen bahatna alak na marroan i tu si, ngada muat sudena di bagasan ni lopo i, i bangku-bangku na i jolo ni lopo doma alai sadebana marjuguan, oni adong muse na jongjong-jongjong taro mangecek-ecek dua tolu halak satumpuk.

“O ... amangboru, songondia do nanga“, ning si Lagut marsapa mulak.
“Na nida ni matangku salolotna on, boti muda upikir-pikirkon sasaulak, angke alak kita ‘ntong nabahatan martani do samatua. Kan rap taboto do sanga songondia raso ni kantang Tanagodang, ngadong da imbangna ulala dohot kantang na sian luat ni alak na balok, na uboto doba le. Itutung sajo pe ama na santak tabo panganon, ulang ma jolo iolah misalna jadi karipik, kan adi muda kehe ita tu kota dodas dei dakdanak i manabusi karipik kantang nai bungkusan deges-deges i pasar-pasar toko na menek i, ah ... ahadei gorarna, ma lupa au”, ning bayo na tobang i.
“Rok mini, eh ... Mini Market dei gorarna tobang, muda pasar toko na godang margorar Susu Market, ah masala dok muse bo, Super Market do, pala na hum godang muse sian i goarna Kiper Market, eh sala, Hyper Market do dabo”, ning si Sargut.
“I ma, inda pe ambaen panganon na asing-asing na i. Inda langa bisa ita suan kantang Tanagodang i mar sapulu tor bolakna i juluan?” Marsapa bayo na tobang i.
”Botul juo ’ntong amangboru, tai kan angkon na dong mei epeng na bahat ambaen modalna, so bisa ibaen usaho na godang na songonian, ngon dia dei epeng modal ni i”, ning si Lagut.
”Anggo i da, hamu na poso-poso i dei na bisa mamimirkonsa, anggo au na dung muap tano on, mancit dei ulungku mamikirkonsa”, ning bayo tobang i.
Dung i, itambai ia muse: ”Sompat dope luai tardai homu jabat unte manis Maga?” Marsapa muse bayo na tobang i.
”Sompat mantong, tobang. Tai sannari ning kalai payah tubuna jeges, bahat do ning kalak i sobobna. Inda songon na jolo i be, unte na i godang-godang boti manis-manis. Ning kalai sora tubuna jeges angkon na donok batangnai sian bagas ni alak, so leng ona timbus sian dapur ni bagas i, oni sampak-sampak ni aek ni pamispisan i”, ning si Sargut.
”Anggo hum na songon i do sobobna, inda langa bisa ita baen bahat bagas na menek-menek songon bagas ni alaklai na i sikola Purba an. Hum pade muse dope ning roangku muda di si ibaen muse sikola mangaji bahat martumpuk-tumpuk, muda porlu sabolak ni tano humaliang, i gunung Sorik Marapi an”, ning bayo na tobang i.
”Ala ... amangboru pe da tile, i pe angkon epeng na bahat dei tu si, songon carito kantang Tanagodang i dei”, ning si Lagut.
“Ma udok jomu nangkin, anggo purkaro epeng ambaen modal ni i sude, homu na poso-poso i dei na bisa mamikirkonsa marmate-mate, anggo au do ronyang dei mamikirkonsa”, ning bayo na tobang musentong mulak.
"Bo, songondia dei baya pala mapultak gunung Sorik Maripi i incogot ni ari ?" Marsapa si Katitiren.
"Mapultak ia tusi, gorarna pe gunung, na marapi-api muse, dompak so mapultak morot kita sian i jolo, dung salose amuk na i, ro ita mulak tu si", ning si Lagut.
“Au pe da ompung na santak tabo ulala lancat sian Sihepeng, tarsarupo manisna dohot duku sian Pelembang, inda na lupa au i manabusina muda dompak musim”, mangkuling si Sanggar.
“Olo, indepe bahat ni mocom ni tarutung i bariba Batang Gadis, timbako i Simandolam, kopi i Pakantan, dohot na asing-asing nai, na santak tabo sudena i, ampot dabo ambaen na i tano na marsere i dei tubuna so tabo-tabona ilala, ulang-ulang gakku na mangan sere do alak Mandala Holing on samatua, makasutna ‘unsur hara’ ni sere i do da, ha ... ha ... ha ..., sianyang do da i”, ning bayo na tobang i mikim-mikim dung mantata, tarida tongkin lobang na i.
“Muda upamata-matai alak hutanta on sadebana ompung, tarbahat muse do uida na targorsing-gorsing parsibukna songon sere”, ning si Lagut, dung i mikim-mikim ia tarida.
“Sadebana dei, adong na songon alak Koling na lomlom-lomloman, na songon alak Arab godang-godang, bontar-bontar, oni marabong-abong muse, alak Ulu i Muarasipongi na tarrodop-rodop, oni alak Siladang i jae an, nga dehe marmocom-mocom do tarida tompa ni alakna na rap mangolu i banuanta Mandala Holing na bolak on?” Ning si Sargut.
"Uambang dabole ambaen na urang vitamin alak kita on sadebana so gorsing-gorsing tarida sibukna, na jolo kan tiop bagas biasona adong dei tobatna, bopentong menek, so leng adong gulaen pamasakon muda ro koum-sisolkot tu bagas niba mangulangi", ning si Lagut.
Mangkuling muse bayo na tobang i: "Muda get marsaba na bolak iba, i jae an dei ingananna, muloi do sian Maga santak tu Simarongit. Hum saba na dong sannari marlobi-lobi panganonta i banua on, ulang-ulang ma jolo mambukak parsabaan na baru. Muda i julu on 'ntong hum na i topi-topi ni batang aek i maia na tarbaen saba, pandapotanna inda cukup boto panganon sataon, lima bulan pe mang habis eme di opuk niba, i ma so markobun kita i arangan an santak tu uncuk ni tor an, i suanan ma di si apea, ulit manis, congkeh, tanaon, kantang, bope na timbako sanga kopi. Sampe sannari na leng bahat dope ita na i julu on na marhauma di tor an".
"Sakirona tarbaen kita jambatan sian tor na sada tu tor na lain, ning roangku na sonangan i ilala na marhauma i di tor an, nga loja be ilala manangkok-manuat sian huta on tu si", ning Jagerep.
"Epeng na bahat dei tu si, dapot kita jolo mulak tapor-tapor ni lusung dohot indalu sere ni Si Pitung Sorik Marapi i", ning si Lagut, dungi rap matukolkol alai na i bagasan lopo i.

Di na dompak matukolkol i alai, adong ma sada poso-poso ro tu lopo i, dung i mangkuling ia tu bayo na tobang i: “Ompung, intean ompung adaboru i bagas, get modom ia ning ia, naron ngadong mambukak pintu ji ompung”.
“Olo anggi, rap muli ma ita, maroban senter do ho, na lupa dau nangkin i bagas laos tu lopo on”. Marsapa ompung nia i.
“Olo ompung”, ning paompu nia i.
“Jadima, muli ma ami parjolo da, incogot aduan ita sambung mulak caritonta i”, ning bayo na tobang i.
“Yabo, takok itogu-togu dope amangboru tu dolok”, ning si Lagut.
“Ala ... anggo ho da tulang menek, na cikaran dope da bo ulala pamangtang on, salangkon tu Tor Siojo an manangkok-manuat utopung do pei saulak sapoken”, ning bayo na tobang i.
“Songon i ma da, Assalamu’alaikum”, ning ia mulak.
“Wa ‘alaikum salam”, ning kalak na i lopo i.

Ambaen madung habis ‘ntong miak ni palito, sampe ison ma jolo carito on. Mudah-mudahan nian adong woktu na tarlapang so ita sambung mulak caritonta taon.

Nani suratkon: Edi NasutionGandoang, 15 September 2010.

Boa-boa: Carito on inda kisah nyata on, nai puhut-puhutan dei songon i sian parningotan niba di hangoluan ni alak kita, oni muda adong gorar-gorar atope tokoh-tokoh na tarsarupo dohot koum-sisolkot nami i bagasan ni carito on, inda boto na ami sangajo i, anso suman dei carito ni alak kita Mandailing.