SIAN jaean… ima sian Musojid Raya Lamo nadi Pasar Kotanopan tarbegema tu suping niba adong na mangaji-ngaji, mar Tarahim-tarahim ning halak na jaji, manandohon bahaso ari madung bagas borngin, nalau giot andostorang doma, tai mata ngada juo tarpit-pitkon anso modom. Lau giot kotu subuh ma anso tarpitpit kon mata i.
Hum tarkelong dope…”Kreeerrrrekkkkk nyiiiiiiiiiiiit ...”, tarbege musema sora goruk-goruk nitingkap i buka dainang. “Adope amang ngot ma, torang ma ari, ulang sai margobak sojo be, kei ma manjawek so sumbayang subuh”, ning dainang tu iba. Songonima satiop manyogot hobar ni dainang mulo mang ngoti iba.
Petoma antong, manuk jantan nadi lobui pe madung martakkauak, songoni muse balom jambi nadi tarumai pe madung marpupu munduk-unduk “kuk kurru” ning ia songon namandokon bahaso ari pe giot torangma, anak nimanuk pe madung muse maranciokan, mangido so i buka lobu ni manuk i.
Naborat mada nagiot mambuka mata i. Hum dua langka dope dainang maninggalkon bilik podoman niba, mai tengget setan muse mata niba. Marnipi dohot mungkor muse situtu.
Ngada sadia lolot sian dapur ro musema hobar ni dainang: “Ado pe le ngotma, baca…! Alhamdulilahillaji Ahyana Ba’da Ma Amatana Wa Ilaihin nuzur, lawan setan i”, ning dainang muse palan. Sian dapur antong binege musema dainang dompak mangkuhur arambir, timbus ni soban nai tutung sian tataring an pe madung do taraso di igung niba, artina i manandahon ma di iba bahaso ari madung torang botul. Ngada tarbaen losok ibe, angkon jongjong ma iba i torus maridi tu batang aek an
Di ari sadari i, di ari Sabtu, di ari poken di huta i, daganak namarsikola di sikola dasar nangkan manarimo rapot, na manontuhon sanga manaek kalas do sanga tinggal kalas. Maso i tola ni dokon jarang do halak na marsikola tinggal kalas. Mulo tinggal kalas pe ambaen na poranna mai ato nahurang sehat doi sasataon.
Dung mangan denggan, i langkahon ma pat simanjojak, i ambehonma tangan simangido marangkat tu si kola na marbangku mar meja-meja, na di donok pasar na di huta i. Marlagut lagut ma dohot dongan-dongan na sian julu, sian jae, sian dolok songoni muse nasian lombang. Rap marjob niroha songoni muse marsonang niroha muse nida, harana santongkin nari nangkan manarimo rapotma satorusna muse giot perei sikola.
Tolap ma tu sikola …di sadu…di alaman ni sikola namartarumai, namartangga ayui, namartingkap nabolak-bolak i, namartarup bosi i, godung sikola sd sada (vervalog school), ima godung sikola paninggalan ni sibontar mata ning ompung mandiang Sutan Baringin tu iba najolo, ato si sandang garigit ning Kuria i sian Tamiang. Ngada marna loja nida dongan dongan i marlojong-lojong mangkojar kojar bal palastik. Pitu halak sian lombang, pitu halak muse sian dolok, sada halak sian lombang manjago ulang masuk bal tu kipper i, songoni muse ma na sian dolok. Sasakali nida martongkar situtu, sasakali adong muse nida nasomsom tu batu-batu karekel i, nadeba adong nida namangapus hodok, nadeba muse adong namangurcop-urcop monmon. Di tangga sikolai adong muse na lagut marlagut todik marsitodian, risak marsirisaan, mangkardak situtu, giot sarsar doma nida ipon i ambaen simburna kardak na i. Napohom-pohom nai antong hum na ekel-ekel ia songoni, sonjia nida namarngot-ngot ipon i. Nabisuk-bisuk nai antong mamincuri gerep muse ma. Bontar doma nida batu-batu na adong i alaman sikola i. Maso i antong batu tulis dope dohot gerep alat tulisna. Adong muse doi ende-endena namadung apil iba targan sosikola pe. Ende-endenai ima :
Sada dua tolu ninna guru i
Opat lima onom mangiut sipitu i
Roma si salapan dohot sambilan i
Gonopma bilangan dung ro sapulu i
Laos tu si kola pincuri gerep mi
Obanma botolmu marisi aek i
Ulang nitijuri batu tulis i
Dumenggan ma dibasu dohot aek tawar i
Adong dei boto sada dua dag danak dongan sasikola nibai na hodar pamakena, manombo muap cikarap bage ilala muda ro tu lambung niba. Angke nalosokan maridi, hum na i basu nia maia muko dohot pat nia muda get tu sikola manyogot-nyogot. Dakina pe mardalpak-dalpak doma i pamatang nia arana inda unjung iurgas ia, ima bahatna sabut pangurgas marderetan songoni lao tu tapian paridian. Ipon pe gorcing doma marsilodaha-silodaha muse arani inda unjung manggosok ipon. Padohal boto le, bope ngadong gosok gigi niba, bahat dei dapot abuan i masin padi an ambaen panggosok ni ipon so ias bontar. Ima aropku so dodas na dongan-dongan na hodar-hodar i ona uhum di sikola. Somalna, isuru guru nami i mei alai mambaca Poda Na Lima marulak-ulak i jolo kalas antargan so tola juguk tu bangkunabe. So ibaen guru nami i pe songon i, so leng totop mada hami ingot pituah ni tobang-tobang alak na jolo i, ima:
Tolu : paias parabitonmu.Opat : paias bagasmu.
Lima : paias pakaranganmu
I taruma sikolai…bope na muap te ni itik surati, adong muse doi martumpuk-tumpuk dongan dadaboru najuguk lanom di tanoi, marmain congklak. Ngada ipardulihon halai riburna dongan na mar main i alaman sikola i. Ngada ipardulihon halai muse ujung ni jari nihalai madung hapal lomlom sisilon i na ma mindah-mindahkon batu namenek-menek i tu lubang nasada tu lubang nalain.
Na deba…natak parabur i…manyogot ni ari dope, ngada ban ia be dao-dao sian parjagalan nadi pudi ni sikola i. Sonjia songon na anturaparon muse nida. Nadeba adong muse namarabur tu parjagalan ni ompung Paet nadi pintu gerbang pasar i, marabur manabusi gulo-gulo satonga ari. Ambaen nararak gulo-guloi di parjagalan i, adong juo doi namarcekel, ibuat ia dua sangatolu gulo-guloi tai idokon dohot i bayari ia sada doba.
I pintu gerbang ni sikolai…adong muse ma namarjagal es potong na sian Sidimpuan. Anso ni dokon es potong harani tola do manabusi sang gotap. Songon na mangkoyok manuk doma mula manabusi es i. Angke mula nitabusi sada, ngada nangkan na habis i sampe mangkuling lonceng masuk. Ambaen bahatna na marsihir ni roa nagiot manabusi es i, ngada taralo namarjagal sai nida malayani si panabusi i. Songon jia ma antong angke sakali do sapokan bisa marabur es potong. Baen ramina mada…bo rorap si parjagal es i. Cilat mada piso silet panggotap nai. Bo…hona induk ni jari ni dongan namabusi, mabugang mardaro-daro. Mangkair ia situtu tangis, tandang i lojongkon ia tu rumah sakit nadi lombang ni Tor Siojo i.
Ngada sajia lolot mangkuling ma lonceng nagantung di sudut godungni sikolai, marsinanggur doma ambaen gogona. Na mar bal, mar main congklak i taruma sikolai, na marabur, na mar yeye, na main koje, namar simonjab, na mar kudo panjang, na margala panjang, na margotria-gotria, namar kalas-kalas maringkek-ingkek, na marangan-angan, rap rim nida marbaris giot manaek tangga masuk tu kalasna be.
Bahat muse antong namarlojong jolo tu samping ni godung sikola i, tu kakus naso martarup i, naso adong adong aekna, palua hajat giot moyo. Muapna ngada tardokon be ambaen bauna, gorsing marlanok-lanok doma nida pambaen ni dag danak i. Gugur ngada tardalankon na i ajarkon ni guru ugamoi, anso ulang jongjong palua hajat, songoni muse ulang lupa marsuci.
Dong do masuk tu bagasan sikolai, dung juguk denggan …roma guru kalas. Rap jongjong mulak i pimpin katua kalas mangucapkon salam tu gurui. Sada-sada i pio tujolo manarimo buku rapot. Alhamdulilah, manaek tu kalas opat … liburrrrrrrr !!!
Bandung, 1 Juli 2010
Na nisuratkon: Tagor Lubis
