Pasadahon
Mulo bolas do pangidoaan anggi, sian pangkal tangga ni pasanggrahan Kotanopan on ma, mangido au tuho, anso ni pabulus ho au manyuratkon carito satontang hita dompak dakdanak di kampung najolo. Lolot anggi hupainte persetujuanmu, harana ngada giot au anggi manyuratkonsa mulo ngada dope adong izinmu.
Dilas ni ari on anggi di tano pandaraman on, mandonting doma ambaen milasna. Di tonga-tonga ni dalan Tol Cipularang on, mangkair-kair sora nitelepon, marsirontak songon nagiot mangambur mangalumpat doma. Ngada husangko-sangko, ro ma boa-boamu mandokon izin tando satuju. “Ulang tulis abang gorarku nasapetona”, ningmu muse mangharop. "Mabiar do au ma ila, ambaen pantataan ni halak najaji tonkin niari", ningmu muse. “Posma roamu angggi”, ningku antong mangolohon. Oloda anggi, nagodang mada botoho rohangku pabege-begesa.
“Ketika mahoni mulai berbunga”, ningmu musema mandokon judulna.
“Ala… naningot ho dope rupona anggi nadi ginjang ni batu nadi donok par volley an di toru ni mahoni i”? Ima obar na ro di ate-atengku salaos mekel sado sado au.“Ahhaaa,…judul na romantis”, ningku mangalosi ho anggi.“Bia anggi mulo hita gonti dohot saro mandailing”? Ningku muse mangharop.
“Ngada mangua abang”, ningmu mangalus.
Mur mabahat mulak nahu ingot santontang hita najolo, ningmu manambai.
“HATIA MAHONI MULOI MARBUNGO”, i ma songoni judulna ningmu muse tu au mulaki. Bo, pade antong: pas songon na i raga i tile.
Paduahon
Jot-jot hu golak-golaki ho, hu dokon ho anggi “si boru erdet”? Sabotulna ngada ambaen na erdet ho huida. Ambaen na adong do i buku parsiajaran tai gorarna si Merdet. Mandele ia minum, mandele ia modom, mandele ia maridi, tak songoni ma carito simerdet i. Padahal ngadaba songini kalakuanmu.
Beut papanganmu anggi mangaligi au. Goyak rohamu anggi tu au.
Anta napiga ari ngada marsipangkulingan hita. Mulo ni ida ho au anggi…ipasimbil ho pardalanmu.
Mulo tar tok tarligi au ho, ni openg kon ho mukomu. Songonima mulo goyak rohamu tu au. Ni ambang ho aropku anggi, naso borat hulala pandaritoan i. Manombo anggi ngada tontu hulala pamikiran i.
Anta napiga ari sian i, i golak-golaki ho pangkas ni obuk ku: “Pangkas takar”. Ngada anggi goyak rohangku paida-ida ho. Ambaen bukti ma di au bahaso madung ra ho mulak hupangkulingkon, madung ra ho mulak mardenggan dohot au. Sodar do au anggi, harana songoni ma masoi model pangkas ni hami halak lai, model pangkas takar pandokon ni halak.
Durcet obuk i sanggolom di ginjang ni bohi i. Dungi anggi, ngada unjung be pangkasku pangkas takar. Tai harani i muse ma anggi di hatiha gurunta nasian Hutarimbaru, mandokon di bagasan ni kalas tai, bahaso au naso taat tu paraturan sikola. Ni ukur ia anggi dohot induk ni jari nia.
”Antara ni suping dohot obuk madonok tu !” Ning guruntai, manyalahon au. Ima anggi kasalahanku.
Ni uhum ia au di jolo kalas tai, i pajongjong guru i au di lambung ni papan tulis i. Sabotulna maila situtu do au nai uhum i, harana antong iba pinompar ni guru, tak songon nasomanangion nai dokon. Ngada muse ancit rohangku anggi pambaen niguruntai, asal ma anggi tar pa ihut au hagiot mi, saulak nai mulo mar pangkas, ulang be model pangkas takar.
Anggi … dung lolot hita songon nabiaso mardongan-dongan. Targolaki au muse ho, hu dokon ho “si boru enjeng”. Anso hudokon pe anggi songoni, amben natangis doho hu bege di toru ni balimbing bosi nani jolo bagas muyui. Cilat patmu ambaen natardege ho balimbing bosi na lamun. Ngada jabat ba mabangkir bohimu, ngada juo mabarbar ba pat mu. Hum namaturgis do sotik siku ni tanganmu. Rengema ilumu i baensa. Goyak situtu doma ho huida anggi mangaligi au. Anta napiga ari muse hita anggi ngada marsipangkulingan, ngada mardongan, sonjia anjing dohot huting doma.
Mardenggan hita mulak anggi di hatiha ro ho dohot simatobangmu manyalap ari manyabi di saba nami nadi lombang ni tangsian. Maridi hita nadua anggi di batang aek i. Rupona laing adong dope goyak nirohamu tu au. Iramban ho au dohot pasir. Hona matangku anggi. Ngada bisa au be mangaligi. Paida-ida au namapitung i, marlojong ho tangis mangadu tu udak najiomui di sopo nadi tonga sabai. Hongan doma halak mangaligi ho. Biar doma hulala anggi… mabiar au ni ambang halai madung mambaen nasotontu tu ho. Dung binoto halai purkarona ni suruhon si matobang tai anggi so hu pabolnang matangku tu aek i, anso kaluar pasir sian bagasan ni matai.
Ima holong ni rohangku anggi tu ho…, hubaen muse dope ambaen di ho uyup-uyup nasian batang ni eme. Hu lilitkon anggi bulung ni arambir, so murmadeges dohot magogo sora ni uyup-uyup i. Dung salose, jop situtu doma rohamu huida paida-ida au.
Ngada sadia lolot anggi…sar-sar bulung ni arambir nahu lilitkon i. Songon naso martarimokasi ho anggi tu au. Ro musema alap ni rohamu. Ni ombus ho uyup-uyup i sagogomu tu supingku. Tarsonggot doma au anggi ibaen sa. Marlojong ho anggi tu bondul ni sabai. Hu kojar anggi sian pudi. Biarna ho anggi dapot au, ipaipas ho namarlojong i, bo cilat mada patmu laho somsomkon tu paya i. Di hatiai ngada renge ilumu, songon nai ramban mi au dohot pasir.
Aropku madung habis ilu ni matamu nangkin ato mabiar ho hu golak-golaki si boru enjeng. Hu surduhon anggi tangan si amunku giot manarik ho sian lupak ni sabai: “Jongjong ho boru tulang!” Ningku mandokon ho. Mekel ho huida anggi pabege-bege partuturan na baru hudokon i tu ho. Muloi sian i ma anggi, ngada be gorar mu be hu pio. Ho pe, manombo ngada gorarkube i pio ho: “Anak namboru”, ningmu sasaulak.
Sanga sian jia pe par tuturan na barui so mohot tu ho anggi, nga da ba huboto i. “Aropku sian langit doi”, ningku saulak ari mandokon tu ho. Salolot ni ari on marudak do iba tu si matobangmu halak lai. Mar inanguda muse iba tu si matobangmu dadaboru. Si matobangmu halaklai Lubis na sian Pekalongan do, harana ompung mu mangaranto najolo tu sadu. Lolot murmalolot usaho namarjagal abit batik i mur manjadi. Ima anggi anso gorarmu pe ngada gorar ni halak Mandailing ni baensa, tai gorar ni halak Jawa do, ima Lestari Ayu Ningsih, ning uda najiomu saulak ari marcarito.
Dung lalu hita tu sopo i anggi, rap marsiligi halak tu hita: “Songon anggi kandung doma i baen ia si Lestari”, ning uda na jiomui tarbege tu supingku.
Patoluhon
Ngada taraso anggi madung tolu taon hita namardongan-dongan i, dung do pindah homu sian Pekalongan tu Kotanopan. Holong marsi haholongan hita, son jia namarangka maranggi.
Anggi…, di nalao mandapotkon 17 Agustus di Kotanopan, bahat karamian karamian nai adongkon ni Muspida Kotanopan. Adong partandingan Volley di jolo Pasanggrahan i, adong partandingan marbal di Anggora an. Adong muse pameran pembangunan na iadongkon di alaman godung sikolan ta namartaruma i. Ribur doma ni ida anggi sude. Dagdanak namar sikola di sikola dasar latihan baris-marbaris, songoni muse sikola nai ginjang nai. Tiop sikola anggi mambaen gaba-gaba nasian pusuk ni bargot i: di kantor – kantor, songoni muse di lopo-lopo anggi madung margantungan mare-mare merah putih nabinaen sian karotas miyak, nagiot parami ni hari kemerdekaan bangson taon. Di Tonga Pasar i anggi di ingot ho dope madung di pajongjong gaba-gaba na santak godang, ngada sungkot ba motor ABS i ambaen gincatna.
Hita pe anggi ngada tontu be marsiajar. Ho anggi tarpili muse di kagiatan tari menari.
Au tarpili kagiatan baris ber baris. Dung rap loja anggi na latihan i, rap kehe hita dohot dongan dongan tu balakang ni bioskop manabusi tobu hotang, ambaen sangkuliton. Harana masoi ima pangan-panganon ambaen palua nguas namurana, lolot muse so habis. Mar pupu doma mabugang dila niba nibaensa, manyiak doma nibaensa mulo mangan.
Lagut marlagut hita anggi dohot dongan dongan di toru mahoni na dijolo pasangerahan i, mar angin palua-lua loja. Gorsing doma nida alaman ni pasanggrahan i, ambaen bungo ni mahoni namardabuan i. Ngada sadia lolot, dua tolu dongan dongan ta mar mulakan tu bagasna be.
Tinggal muse hita nadua. Marsapa ho anggi tu au, aso do hu pio ho boru tulang. Dosir darongku anggi pabege-begesa. Tai bope songoni hudokon juo do tu ho bahaso madung songon nalain parasaan ku tu ho. Rara mukomu huiada anggi mambege sa. Marlojong ho anggi maninggalkon au. “Sambang kaji” ningku manyosali. Ipas doma parlojongmu anggi, merbas-erbas obukmu huida, inda ningrohangku be ni ligi ho pardalanmu. Di toru ni mahoni nai lambung ni bubusan i, sangkot patmu di urat nai. Tahop…tandang mabangkir bohimu mardaro-daro. I oban halak ho huida anggi marubat tu doktor Muktar na paraktek di Pasanggrahan i. Ngada tontu anggi hulala be. Biar doma hulala, angke ngada malo au manjago ho.
Mulak sian namarubat i, madung dalpak parban na bontar di bohimu anggi. Lalu tu bagas anggi nisapai simatobangmu, sangan namangua doho: “Targompang”, ningmu songoni mangalosi. Mopeng-openg antong huida songoni simatobangmu.
Ancogot nai anggi, marsuo hita mulak di sikola. Sak do dibagasan rohangku ngada marsipangkulingan muse hita be, ngada mardenggan muse be hita. Por situtu do rohangku giot mangido mohop tuho, tai ngada huboto anggi sanga sian jia mamuloisa.
Di hatiha au dompak mamincuri gerep di lambung kakus naso maraek dohot naso martarup, i samping godung ni sikolantai, ro ho anggi manopotkon au salaho marsapa: “Ampot adong do gerep giot pinjamonmu”, adong ningku mangalus. Hu lehen di ho anggi sada gerep na madung nahupincuri i. “Tarimokasi abang”, ning mu senyum tu au. “Jadi ma anggi“, ningku muse mangalus. Ngada tardokon au be anggi sanga songon dia parasanku di waktu i. Huboto ma anggi ngada goyak rohamu tu au, nahudokon i natuari bahaso natak lain do parasaanku tu ho ima dompak di jolo pasangggrahan i hatia mahoni dompak marbungo. Bope anggi mabangkir jabat bohimu di beansa. Parasanku hatihai marbungo-bungo anggi, uskus doma.
Muloi siani i anggi maruba musema partuturanta. Mar abang doma ho tu au, songoni muse au mar anggi tuho. Bahat dongan-dongan anggi maso i namangarisak, mandokon hita namargandak.
Paopatkon
Ngada adong ba namaruba anggi…, songon nabiaso laing ro do ho anggi marmayam tu bagas ni hami. Songoni muse do au laing sagama do hulala marmayam di bagas muyu. Laing lek jot-jot do si matobangmu dadaboru manutung pisang sitabar namongkol ambaen pangan-panganonta. Laing lek jot-jot do, inanta naji homui mangajari hita mamasa Juz Amma dohot maretong siperen. Sobar ia mangajari hita, bope sasakali songon na giot martata iba pabege-bege pangecet nia na bangkang i mulo ia marsaro Mandailing. Manombo anggi isibitkon ho au mulo giot martata pabege-begesa. Songon jia ma antong, angke inanta najiomui asalna nasian Jawa do, ima nasian Kabupaten Sleman di Jogjakarta. Ari-arion anggi ngada unjung huida malua abit pamake nia nabinuat sian batik. Nagaduk huida anggi sanggul nai maia, songon ban serap ni Opelet Sinar Kota nasian Banjar Narako an. Gantil godang huida i pudi ni ului. Jat huida songon sarang ni porkis.
I partongaan bulan Mei, songon panyoro ni ronggur doma hulala, dung nidokon ho bahaso ompungmu na sian Pekalongan manyuru homu anso mulak, harana so adong patorus usaho namadung i bina niai. Tondo huida ho anggi, songon nagiot magulang aek ni matamu. Au pe anggi ngada malo mangecek. Anggo nasongoni bo ngatarkaua ibe.
Ngada tarpaida-ida au ho anggi nagiot marangkat i. Anggo i pasari-sari na tongkinma hita namar dongan i. Ngada marbilang taon jabat namar tutur abang i ho tu au, songoni muse au, ma mio anggi tu ho. Gotap anggi caritontai, sampe i si. I sompat kon ho dope tu bagas ni hami anggi, maroban bungkusan, marisi gerep sabahat dua bolas di bagasan ni kotak. Dung marsisoloman, i tinggalkon ho au anggi di barando bagas ni hami i. Ngada adong be haropan nagiot marsuo, angke nadao luat tujuan muyui.
Mar bilang bulan anggi, songoni muse marbilang taon, ngada jungada be hita marsirisaan, ngada jungada be unjung hu ida papangan mu beut mulo goyak ro hamu tu au, ngada jungada be mangarasoi pisang si tabar nai tutung ni inanta najiomui. Ngada jungada be isibitkon ho au, mulo manangion simbil dohot bangkang pangecek ni inanta nai jomui. Ngada jungada be anggi huida senyummu tar songon dompak manginjam gerep ho tu au. Ngada jungada be huida anggi bohimu bokas na mabangkiri. Ngada be jungada hu ida ipon gingsulmi anggi ima namananba manis ni pantata mi. Mahoni nani jolo pasanggraran i pe anggi, ngada be marbungo.
Sasakali anggi taringot do au tu ho, mulo iba dohot dongan-dongan marangin-angin marjuguk-juguk i barando ni pasanggrahan i. Taringot au anggi rara mukomu, songoni muse merbas-erbas obukmu marlojong maninggalkon au juguk di batu nadi donok par volley an i. Sasakali muse anggi dompak juguk iba di lopo nadi Simpang Opat i, laing taringot muse do iba tu ho.
Palimahon
Tarakhir anggi…ima di taon 1984, dung tomet au sian SMA sompat dope tarbayang di au songa di urat ni mahoni jia sangkot patmu, targompang namambaen mabangkir jabat bohimu. Isima anggi terakir hu tatap godung Pasanggrahan nai bangun ni Bolanda i.
Hu langkahon ma anggi pat simanjojak, hu ambehonma tangan si mangido, hutinggalkon ma anggi bona ni bulu huta hasorangan, hutinggalkon ma anggi carito satontang hita najolo. Bandung ma anggi jadi tujuan ku.
Anggi… ngada pe jabat satoan dung tinggal au di Bandung, dapot auma hobar sian kampong bahaso mahoni na di jolo Pasanggrahan i madung di taba halak. Songon nai soro ni ronggur muse do ma hulala parasaan i, pabege-begesa. Rang-rang doma nida ning halai Pasanggrahan i. Ancit muse hulala anggi pabege-begesa, apalagi muse iba anggi dompak ha asianna mar siajar satontang lingkungan. Ngada be anggi natar kangua, madung ni paksa i rek-rek kon halai, i oban halai cariton ta dompak nadi toru mahoni i. Tinggal tungkona doma, ngada unjung be martunas, ngadong artina be di au anggi. Lolot mur malolot anggi mur malupa au tuho, madung rang-rang hulala sude anggi, sonjia par rang-rang ni alaman ni pasanggrahan Kotanopan i. Dangol doma hula anggi pambaen ni halai, halak nabisuk-bisuk i.
Paonomkon
Gotap…ngada marsibotoan hita be anggi, rap so mamboto khabar barita. Bope anggi unjung do hubege homu tinggal di Jalan Kauman di Pekalongan, tai songon panaba ni halak nabisuk mahoni nai jolo Pasanggrahan Kotanopan. Songoni muse ma rupona anggi rohang ku tuho, ngada martungko be.
Anta napiga taon au anggi dung manjalahi bisuk na peto, i purcayo ma au anggi so manjadi Perencana Ibu Kota Kecamatan Sindang Laut ima di Kabupaten Cirebon. Ngada dao bedana anggi songon Kotanopan na madung rap hi tinggalkon i. Pasanggrahan pe adong juo do disi, tai jegesna inda songon Pasanggrahan nai Kotanopan, rami na pe jia sojia do. Muse unjung juo do Belandai najolo disi. Buktina anggi Pabrik gulo nai bangun taon 1886 sampe sannari mardalan dope. Sian carobong asap nai marbual dope timbus ni paberik i, sian tonga-tonga ni kobun tobu i marmolusan lori pangangkut ni tobu ambaen gilingon. Taringot au anggi mulak dompak hita manyangkuliti tobu nasian balakang ni Beskop Tapanuli nai balakang ni pasanggrahan Kotanopan i.
Potang ari nai anggi…, muloi ma rami di donok paberik ni guloi, mar roan ma halak sian jia-jia. Rupona songoni ma kabiasoan di paberik i, mulo giot musim giling bahat mai kagiatan nai adongkon ni perusahaan guloi. Iba pe anggi pordo roha ni mangihutkon halak na rami i. Harana anta na sanga andigan muse doma iba bisa mangaligi karamian pesta paberik nasongo nian.
Di hatiai mada anggi, di jolo bagas-bagas nagodang paninggalan ni Bolandai, bagas-bagas ni karyawan ni paberik i, pang pang huida palakat namanyurat kon “dr Lestari Ayu Ningsih lubis” Kepala Puseksmas Kec. Sindang Laut. Dosir anggi darongku paida-ida palakat i, taringot au mulak tu ho, taringot au satontang hita najolo di kampong. Yakin do au anggi bahaso ho doi. Ngada be anggi nature hulala pamikiran i. Parmainan pesta paberik ipe ngada tusi be roangku. Borngin na i ngada be tarpodom au ibaensa. Giot sosak hu lala dapot ari.
Ambaen na iba anggi gorarna katua Tim Perencana, hubaen ma anggi siasat mambagi tugas. “Tugasmu tu kantor camat” ningku tu nadeba, “ho dohot si anu tu kantor kelurahan” ningku muse tu nalain, pabisuk-bisukkon. “Lobi nai bagianku, tarmasuk manjalai data kesehatan satontang masyarakat”, ningku muse mayakinkon dongan dongan i. Ngada binoto halai na adong do niat niba nalain.
Manyogot ari dope anggi, madung marsiap-siap au giot tu Puskesmas Sindang Laut. Marheranan doba dongan-dongan i, tai ngada hupadulion be. Hu langkaon songoni pat simanjojak, hu ambehon tangan simangido. Tujuan naparjolo ima tu Puskesmas. “Tugas na lain papudi doma i”, ningku di bagasan rohangku.
Tibo di Puskesmas humitir doma pat ku, hu pagogo rohangku…
“Assalamualaikum”, ningku di jolo baba pintu nai. “Waalaikum salam”, ning petugas nai muse mangalus. Isapai halai sanga aha do maksud ku. “Giot Silaturahmi dohot ibu dokter”, ning ku mangalosi halai. I pabulus halai anggi hagiot ki.
Hu ambang lupa ho anggi tu au: songon nagiot manglumpat do moho huida dung hudokon sanga ise au. “Santongkin jolo da abang”, ningmu maningkalkon au. “Aha muse do namaso on”, ningku marsapa-sapa i bagasan rohangku. Ngada sadia lolot, ro ho anggi mulak maroban aek ni tobu dua galas nai esan. Sada ibaen ko i jolongku, sada nai ambaen diho, borgo doma anggi tu ola-olai: “Di son hita…ngada manyangkuliti tobu”, ning mu mangkardak. Huida mulak anggi gingsul ni iponmi. Por situ-tu do gari giot niroha tak lolot namarsuoi, tai songon dia ma, adong dope tugas nalain, songoni muse ho anggi bahat dope tugas nangkan nai karejohonmu.
“Mangido ijin ma au”, ningku to ho.
“Potang ari tongkin nai, hami alap abang tu penginapan”, ning mu muse tu au.
“Ulang be repot-repot”, ningku mangalosi. Beut papangan mu huida anggi, sonjia mulo goyak rohamu tuau najolo di kampung. “Oo… ale boru enjeng”, ningku mada tu ho. Isibitkon ho au sagogomu, rata lomlom doma panyibitan i, tai ngada taraso be anggi harani namadung marsuo i hita.
Ro ho dohot dongan bayomu mangalap au, oban daganak mu sada, napas mada boru mi songon ho anggi dompak di kampung najolo. Bahat anggi parsapaan mu satotang kampung tai. Laho bubarma anggi pesta paberik i so mantak hita namar carito i. Sanga nai sangajo sanga inda, ngada huboto. I motor muyui anggi palan tarbege lagu ni Andi Meriam Matalatta dohot Yopi Latul, judulna “Jumpa Lagi”, marirama bosas.
Tiada Kuduga, berjumpa lagi
Saat ini kulihat kau lain sekali
Kau Nampak cantik, cantik sekali
Lain waktu kita masih kecil
Reff:
Kini kita sama tlah dewasa
Hidup pun jauh di tanah sebrang
Ooo adakah rindu kampong halaman?
Yang menanti uluran tangannn…
Olo da anggi…ngada malo au manjawabsa. Mikim-mikim huida anggi dongan bayomi i balakang sitiur i.
Aropku ontap nion ma jolo cariton taon. Pangidoan niba tu Na Sada i, rap iras be ma hita nian, oni ulang muse nian gotap parsudaroanta samatua, amin ya robbal 'alamin.
Bandung, 25 Juni 2010
Wassalam
Tagor Lubis
Cerpen ini kutuliskan untuk mengenang masa-masa kecil
dan remaja ketika hatiku mulai berbunga-bunga
di Kota Kecilku Kotanopan
