Muda langka au manjala
Dapot au dua mera
Hugadis mai sada
Anso adong di ho panabusi sira
(Willem Iskander)
IMA SINDOKON ADONG SADA BAYO NA MARGORAR JANAPORAS. Sada bayo na somal marmayam di bariba batang aek na di huta i. Anso nidokon gorarnia Janaporas, angke panggorar-goraran ni halak do tu sia. Ngada pangalehen ni simatobang nia i. Songon i ma rupona di huta i, mulo adong ma na targaduk di sada-sada halak i, mohot muse ma gorar nia na imbaru.
Saban ari karejo nia na hum na manjala sajo ma ia di batang aek i. Angke sodong saba jamaon songoni muse sodong porlak parhaumaon.
Dungdo ia ngot andostorang bulus manjawek ma ia di pancur nadi topi saba i, laho mangalangka ia tu musojid. Songoni muse dongan parsonduk nia. Targan so manjawek iodohon ia ma udon ambaen pamilas aek. Muda mulak tongkin nari dongan bayo nia sian musojid, madung adong kopi na milas rongkon gadung na i tutung.
Ngada sadia lolot antong mulak ma Janaporas sian musojid: “Assalamu'alaikum”. “Wa'alaikum Salam”, alus ni dongan parsonduk nia.
Songon na biaso dung ni panaek ia tangga hayu laho masuk tu bagas, juguk ma ia di karosi hotang donok nitingkap i. Igulung ia timbako dohot pusuk, i sertek ia dohot loting pakpak. Dung i, isirup ia sotik kopi i. Ahhh…, “Natabo mada dongan parsonduk nibaon mambaen kopi”, ning ia, i bagasan roha nia.
Madung lolot ia ngada jungada be minum kopi tu jambur nadi topi ni tobat an, angke harani ambaen na suada do, lobi-lobi muse hancit nilala ia pambaen ni Jamago.
“Ooo… Janaporas, tar pasikola ho pinompar mi sampe tomet SMP, marsyukur moho !!!”. Ning Jamago mangukuri ia di tonga ni halak na di jambur i.
Iapus ia antong indora nia, pabege-bege hobar ni Jamago na pabile-bileon i. Arani i, ngada tartolon ia kotan rongkon pisang i be, kopi pe rasona mur paet, mulak jat ia sian jambur i.
Tak torang ma ari i, marangkat ma Janaporas rongkon dongan parsonduk nia. Sandang ma jala rapot nia di abara i, gantung di ak nia baluang ambaen inganan ni gulaen, oni kupiah ngada muse tinggal. Songon i musema inang nidanak nia, madung sandang do hadangan andilo dohot golukna. Ima baya karejo ni halai ari-arion.
Muda Janaporas manjala di topi-topi batang aek i, anggo dongan parsonduk nia manjalahi pahu ma rongkon robung bulu parupuk. Ambaen na songon i ma karejo ni dongan parsonduk ni a, mohot muse ma tu sia gorar ibaen halak, ima “Inang Pahu”.
Targan so mangkuling ogung partando kotu luhur, halai pe marayak muli ma. Gulaen aporas, sulum dohot gulaen na lain madung di susuk, ngada sebinoto ampot adong tongkin na i na manabusi di tongan dalan. Pahu rongkon robung bulu parupuk pe madung dikobean. Muda ngada laku na i jala sadari i, potang ari angkon na i sale muse ma i. Martaon-taon, songon i sajoma karejo ni halai.
Di saulak ari di namulak halai sian topi batang aek an, dapot halai pinompar ni halai madung tondo di toru ni tingkap i.
Marsapa Janaporas tu pinompar nia, “Aha do so songon namarsak roamu,amang ?”
Ro alus ni pinompar ni a, “Ngada ba amang sanga namangua. On ma bo, madung do iba tomet SMA, nangkan na tu topi aekan juo do huida na petona”.
I padonok Janaporas tu pinompar nia i, dung i mandok obar: “Inda ba amang, songon dia pe dalanna angkon ipatorus do sikolamu, ulang songon hamion be ho markancitna”, ning Janaporas tu pinomparnia i.
Dung i maripas-ipas ia masuk tu bagas torus tu bilik mambuat celengan. I ruar i lambung ni tingkap i, i boltak ia ma celengan na sian tano liat, naibaen ni halak Siluak i.
“Ulang be marsak roamu, ro jolo tu son !!!”, ning Janaporas tu pinom-parnia.
Ngangang songon dabuan rimbang doma pinompar nia paida-ida bahat ni pitis i.
Tibu situtu, habur-kabur dope ari i, i jalang ia ma amang rongkon inang nia. Magulang aek ni mata nia, ibaca ia doa nadung niajarkon ni inang nia tu sia.
“Bismilllahi Tawakkal tu Alalloh Lahaula Wala kuata Illabillah…”. Mangalangka ma artina pat simanjojak, iambehon ma artina tangan simangido. I tinggalkon ia ma bona ni bulu huta hasorangan, inganan ni damang dohot dainang markancit-kancit.
Dapot ari, dapot poken songoni muse mardapot taon, ngada taraso madung opat taon pinompar ni halai ngada jungada mulak, madung opat taon artina pinompar ni halai majalahi bisuk na peto. Di ari Sabtu, di ari poken di huta i, bahat halak na kehe tu pasar, songoni muse Inang Pahu kehe do ia marbuniago manggadiskon ihan na di sale. Anggo Janaporas ngada ke he tu pasar, porluan do ilala ia mandungkapi jala i jolo ni bagas nia i. Di hatia i mada ro surat ni pinompar nia, isina tarsongon on :
Parahiyangan, 30 Pebruari 1973
Tu adopan ni amang dohot dainang
Assalamu’alaikum …
Di haroro ni suraton, pangidoan niba amang dohot dainang dibagasan hatorkisan. Aupe naditinggalkon ni surat on Alhamdulilah torkis do nian.
Ngada ginjang giot dokononku tu damang dohot dainang … ima tolu ari nasolpu “Jasulum” pinompar ni damang dohot dainang madung do lulus manjadi sarjana perikanan. Godang situtu do rohangku anso ro damang dohot dainang di acara wisuda na i. Botima.
Wassalam
Rustam alias Jasulum
Renge boto ilu nia mamasa surat ni pinompar nia i, itingalkon ia jala dungkapon i bulus i lumpat ia tu pancur na di topi saba i, “manjawek”, torus ia sumbayang syukur mandok tarimo kasi tu Na Sada i. Tap-tap doma amak parsumbayangan i ambaen ilu ni mata nia. Martaon-taon antong baya ngada kaluar aek ni mata i, bo…sakali kaluar songon pancur godang doma.
Ngada sadia lolot, mulak ma dongan parsonduk nia sian poken. Homang-homang ia mangaligi dongan bayo nia.
“Aha dehe na namangua, angkangku?”, ning ia mada.
Ngada ro alus ni dongan bayo nia i. Murmartamba musedo tangis ni dongan bayo nia i, son jia na hamatean doma nida.
Dungdo binoto dongan parsonduk nia, bahaso pinompar nihalai madung lulus manjadi sarjana, bulus i buat ia aek nai garigiti ambaen panjawet. Ngada tartahan ia muse naso magulang aek ni matai.
Ngadaba tarpaihut halai hagiot ni pinomparni halai i, anso ro di hatiha wisuda. Songon dia ma antong pitis so adong, songoni muse pamatang pe madung ruk-rek. Inda cukup sadari dua ari manaek motor naginjangi anso lalu.
Songoni ma rupona rasoki ni Jasulum ngada bisa simatobang nia manghadiri wisuda i. Ibuat ia karotas, marpupu itulis marpupu muse niambungkon, marpupu itulis marpu muse nia ambungkon, songonima anta napiga kali. Angke tolu baris dope tarsuratkon madung manetek ilu tu karotas i. Ipagogo ia doma roha nia, so bulus bisa tarsuratkon ia, mandokonsa bahaso dungdo salose wisuda nangkan mulak ma ia.
Ambaen godangna roha ni Janaporas nagiot mulak pinompar nia, i gogohon ia juo songon nabiaso majalahi gulaen tu batang aek an. Ngada i pardulihon ia batang aek na mombur muloi magodang. Laing taringot ia, “aporas nai boyom” ima gule nani halungunan ni pinompar nia. Songoni muse antong dongan parsonduk nia, oban muse do andilo dohot golukna. Mar pahu, mar robung bulu parupuk, anso adong ingkayu mula mulak pinompar nihalai i tu bona bulu.
Madung tak lolot ngada piga dapot ia gulaen, ipa tu tonga ia. Bo…tok tok mada pat nia tu batu, bo.. mur iobankon aek i tutonga. Ngada adong sada halak pe namangida na, ia mangido tolong, laho bonom iayupkon aek i. Incogot nia ari do ma so dapot halak ia, sangkot di batang ni ayu, nga marhosa be : “Inna Lillahi Wainna Ilahi Rojiun”.
Tolap Jasulum tu huta i, hongan-hongan ia mangaligi rami ni halak di bagas i. Dosik taroktok nia paida-idasa. I lojong ia situtu, songon hilap doma ipasna. I tonga bagas i, ida ia amang nia “pejuang pendidikan” i madung gulung i kopenan. Dungi, i uloskon ia baya baju wisuda i, baru i sumbayangkon ia. Manetek ilu nihalak na di bagasi paida-idasa.
Dung salose sude, marmulakan muse ma halak na mangaji. Mangecek ma inang pahu tu Jasulum.
“Ooo…amang, ngada adong natartinggalkon amangmu diho, on maia bo !”.
Isurduhon inang nia ma disia kupiah nabiaso ni pake Janaporas mulo manjala.
Warna na pe madung maruba, jat muse dope. Tai bope songoni, i jagit Jasulum songoni.
Palan-palan iparate-atehon ia kupiah i, inot-noti ia, ipareso ia. Ibagasan kupiah i ma dapot ia solot tulisan i karotas nagit masuak-suak doma, tai lek tarbaca dope. Tulisanna ima :
AJAR NI AMANGNA TU ANAKNA, NA KEHE TU SIKOLA
Ia bole amang sianuan tunas !
Langka ma ho, amang marguru tu siloka
Ulang hum baen song luas-luas,
Tai ringgas ho, amang, marsipoda
Anggo panganon dohot abit,
Huparkancitkon manjalahisa
Inda au nian makikit
Diho mangalehensa
Muda langka au manjala
Dapot au dua mera
Hugadis mai sada
Anso adong diho panabusi sira
Muda adong tuhor ni kopi
Na dapot au dohot inangmu
Deba mai hupajopi
Deba ambaen di ho abit matomu
Muda ngada di pangan tangkalon
Dapot hita tolu lungguk,
Sada mai hugadiskon
Panabusi timbako dohot pusuk
I ma le nian, amang,
Pornirohangku ho marbisuk,
Ampot sogot madokdok ma hulala pamatang,
Anso ho doma hubaen husuk
Muda au sogot matobang
Inangmu pe ngada be marnida
Da hami ma pasonang
Homa markayahon hita
O, nalobi denggan roha,
Na umbege na hupardokon on,
Mangido au di Hita
Hita patorang pangarohai ni danak on!
(Willem Iskander: Si Bulus-bulus Si Rumbuk-rumbuk)
“Bo… ende-ende ni Willem Iskander on do rupa napagogo roha ni amangki pasikola au. Tarimo kasi Tuhan, tarimo kasi amang-inang haholonganku”, ning Jasulum di bagasan roha nia, renge muse ilu ni mata i.
Bandung, 12 Juli 2009Na ni surat : Tagor Loebis
