Tuesday, June 29, 2010

Marangka-Maranggi




Pasadahon

Ima sindokon di sada huta, adong sada bayo namargoar Jakoje namadung tobang pamatangna. Anso nigoar halak pe ia Jakoje ambaen bolakna do koje takion nia. Salain koje takion marbunbun-bunbun muse saba nia, tobat marbalok-balok, losung bunggar adong dua, losung aek tolu muse, indape padati ambaen panaru ni eme dohot danon anta napiga. Horbo dohot lombu anta na piga bara di parmahananan. Tai ba anggo induk ni tataring nia sada maia, ima namargorar si Lembayung

Pancaritohon ni halak dompak bujing induk nitataring nia nalobi jeges halakna, manyirlak doma baen bagakna. Obukna ginjang lomlom, merbas-erbas doma mulo i ombus angin, matana songon simulmulan doma lanna, salibonna songon taji ni manuk rangga. Igungna songon mutik ni jambu bol, bibirna songon sangulas unte manis sibanggor tar rara manis. Isangna na antong songon pargantil ni loba, iponna marbaris maratak, manyirlak doma ambaen bontarna, pangecekna nalobi lambok. Tardokma tele mulo lewat boru bujing i, ngada tarbaen naposo-poso naso pangkulingkonna. Hum na mikimpe ia madung sonang nilala naposo-posoi, tuk mai ambaen nipihononkon borngin ni ari. Ambaen bagakna mada ngada tarlehen halak panggoraran panciah-ciahon najat tusia. Si bunga melur ma nilehen halak panggoraran nia.

Anggo goar ni Jakoje sabutulna haji Suleman do. Botulmada tarobankon ia do goar nia i. Angke na malo ia mar hombar banjar. Nanayang muse langka nia tu musojid, nanayang muse tangan nia manolong halak na hahurangan. Satiop adong siluluton nihalak, madung parjolo ma ia tusi, songoni muse mulo adong si riaon ni halak nabotulan muse do ia ni topot halak. Songoni ma dompak gogo dope pamatang nia.

Sannari pamatang nia madung do rukrek. Obukna madung bontar, ipon na pe madung martalgangan, olbung doma nida hurumi mulo i arsik ia sigaret i. Songoni muse mata nia pe madung habur kabur. Ambaen denggan na doma induk nitataring nia paturesa, so laing bisa ia mangaligi-ligi harto nia nabahat i.

Dungdo maringanan Jakoje dohot si Bunga Melur, marrasoki muse do rupona halai. Mar udur-udur… sorangma pinompar nihalai. Pinompar nihalai ngada adong ba jagar-jagar, doli-doli muse do sudena. Si angkaan nigorar halai si Partomuan. Tompana pas songon parrupo ni amang nia, sibukna tak lom-lom obukna kariting. Na silitonga nilehen halai gorarna Pardomuan sibukna bontar tai obukna lomlom kariting dohot parigungna songon amang nia dalpak godang. Na si Anggian ni gorar halai Partaonan, rupona antong sonjia songon inang nia bagakna. Ginjang, lele, bontar… anggo sugari tak gorsing obukna, nai ambang nihalak mai turunan ni Ulando.

Di saulak ari, dung salose sumbayang dohot mangan magorib, mangecekma Jakoje tu pinompar ni halai. “Ooo...daganak nami”, ning Jakoje muloi mangecek. Dungi i ipalalu ia obar nia: "Madung do binoto hamu bahaso damang dohot dainang muyu madung do tobang. On pe harto on hubagi tolu dos ma tuhamu. Ngada binoto anta na parjolo do hami sian hamu, rumbuk-rumbuk, marsi haholongan homu namarangka-maranggi".
Bo…anggo nasongoni ma ning damang dohot dainang, hami pe mangihutkon doda”, ning halai natolu rap mangalus.

Anta napiga ari sian i…binegema tu halak najaji di tonga borngin di malom Jumahat mangkuling ma tongtong di musojid nadi tonga ni huta i, paboahon tuhalak najaji bahaso adong na sililuton. ”Inna Lillahi Wainna Ilai rojiun” madung parjolo Jakoje manghadop Tuhanna. Hasinokan na pe halak namodom, hagogoan pe ungkor nihalak di borngin i, laing nayang do langka ni halak tu hamalangan an. Rupona sonjia nayang ni langka ni Jakoje dompak ngolu nia, songoni musema nayang nihalak di hamatean nia.

Dua taon dung pajolo Jakoje manghadop Tuhan na, jumolo muse ma induk nitataring nia. Rami muse do halak na manyumbayangkon songoni muse mangihutkon sa tu tano parkuburanan. Tinggal ma halai natolu marangka-maranggi, Rap marsipature hartona be. Sonjia wasiat dohot posan ni damang dohot dainang nihalai, nian rumbuk-rumbuk marsihaholongan do halai.

Tai ba ari murmalolot si Angkaan dohot silitonga tak lain do parangena. Si angkaan napaor… ngada tusi roha nia mangurus harto bagian niai. Dapot hasilna i oban ia tujae tujulu manjalahi parmanganan na tabo. Madung bahat parmanganan natabo i roroi ia, tai ngada unjung namarnapuas. Lolot-lolot antong harto bagian niai i gadis ia. Ni dokon iama tu anggi nia bahaso ia nangkan maninggalkon huta, giot kehe tuluat nadao giot majalahi hasonangan, manjalai parmanganan natabo. Epeng panggadisan ni hartoi i oban ia sude nagiot manjalahi sonang ni roa nia, manjalahi parmanganan na tabo.

Mar taon-taon ngada jungada ia marsuo dohot anggi-anggi nia, ngada binoto ia be sanga songon dia khabar baritana. Songoni muse anggi anggi nia ngada mamboto muse sanga tu jia do angka nihalai paingut-ihutkon si manjojak na nagiot manjalahi hasonangan ni roa. Antong lolot murmalolot pitis pe muloi ma tempas, parmanganan natabo ngada muse jungada dapot. Dapot sada giot nalain muse, dapot muse nalain giot naasing muse. Songonima …bo bohal nai oban sian huta tos sude ngada marsisa. Luntang lantung, ngada binoto ia sanga tudia be. Pamatang ngada tarusus be, sibuk na lomlom murmalomlom, rata doma nida. Obuk muse kariting songon dia nalalaen doma nida.


Dapot ari, dapot muse minggu mardapot muse bulan dohot taon mur so jelas be tujuan nia. Bonggal ma di sia bahaso di sada luat adong sada bayo na santak kayo, nadenggan muse par rohahana. Tubu ma di rohania giot manopotkon bayo nakayoi: “Ampot martarimo do pamatang na bileon on di bayo nakayoi” ning ia di bagasan roha nia. I langkahon ia ma pat si manjojak, i ambehon ma tangan si mangido, giot manopot bayo nakayoi.

Di na ro si Partomuan manopotkon tubagas ni bayo nakayoi…ngada rupona nitandai ia bahaso naditopotkon nia i dongan sadaro nia do, ima si Anggian namargorar si Partaonan. Anggo bayo nakayoi ba bulus nitantadai ia do, ima angkang nia si angkaan namadung maninggal kon ia, nagiot kehe najolo manjalahi parmanganan natabo. Songonima antong… Sianggian on pe ngada jabat marsompit ni roa manarimosa, tai bope songoni ngada di patandahon ia iba nia sanga ise .
Ngada mangua homu tinggal dohot karejo di son, tai ba salolot tolu bulan, ngada adong gaji muyu”, ning bayo nakayoi tu si Pardomuan.
Ro alus nia: “Ngada mangua i”,


Salolot na tolu bulan i, karejo ni si Partomuan i baen bayo nakayo i saban ari manjalahi gulaen di batang aek an. Mula manyogot mangarsik alahan, tak arian kehe musema manjala, potang potang tongkin nai mananom lukah musema. Ari-arion…isajoma karejo nia. Tai ba bope satiop andostrotang marisi siating i bagasan lukah nia, manyogot dapot muse incor sian alahan i, arian manombo dapot muse garing napameramerahon, ngada ba unjung dohot ia mandai sa. Satiop ari ni lehen bayo nakayo i panganon nia ima indahan tak tolu ngaum. Ancit doma nilala si Pardomuan pambaen ni halak nakayoi.

Gonop ma tolu bulan…di sopo sisahua nadi tonga ni sabaan, nai ginjang Aek Si Capot i. I jou halak nakayoi ma si Pardomuan na dompak manjala di tonga ni batang aek an, anso maradian jolo.
Aha muse do so pio-pio halak nakayoon”, ning si Pardomuan di bagasan roha nia.
Ampot dabo nagiot mamunu iba do ia”, ning ia mu se di bagasan roha nia.
Ngada binoto bitua godang niai, iba madung ngalian, boltok male, gulen na dapot ibape, ipangan baba nia sude, muap-muap na pe so unjung tar anggo iba, san dais pe kuah-kuahna ngada jungada iba dapotan”, mur mamilas roha nia tu halak nakayoi.

Songonipe milasna roha nia pambaen ni halak nakayoi, laing itopotkon ia juo do ba.
A dope, sumbayang jolo so mangan”…ning halak nakayoi tu si Partomuan. Ngada adong alus nia, i paihut ia songoni. Ngada sadia lolot antong dung rap sumbayang halai di topi ni aek i, antong roma namaroban kadak marisi indahan singkop dohot ingkayuna. Buncilak doma mata si Partomuan mangaligi siating nai sambal dohot incor nai gule, singkop dohot raum-rauman nai bolgang mar rimbang, songoni muse sambal tuk-tuk na pake aso-aso na madung ni asoman dohot unte sunde, ahama na santak uskusna. Joring na marancimun aer anta napiga muse, kacang panjang naposo na baru italpok sian gadui, ngada tinggal muse pote naposo ambaen porngason, Ngada sodar manatek ijur nia paida idasa. Taringot ia anta napiga taon nasolpu dompak mangolu dope amang dohot inang nia, ima gule na santak tabo nilala ia.

Ngada mantak-antak si Partomuan namangan i, sonjia ma antong nabaru morot sian batang aek i, humitir doma bibir i ambaen ngalina. Songonima mulo halak namadung lolot marrondam di batang aek, nai pasan male, muse nagogoan i mangan. Songoni muse ma nai rasoi ni si Partomuan. Santak tabona namangan i pir doma boltok ni si Pardomuan nai onjat nia i namangan i. Jongjong susah doma nilala ia. Di hatiha i mada kaluar sian papangan nia hobar “ALLAAAAAAA…natabo mada namangan on, ondope dapot au parmanganan natabona”, ning ia di adopan ni halak na kayoi. Mekel-ekel bayo nakayoi mambege nai dokon ni si Partomuan i.

Dungi, ipatandahon ia ma iba nia, bahaso halai namarangka maranggi do. Anso ni baen ia pesongoni ambaen patidahonsa do tu angkang nia bahaso parmanganan natabo, ngada angkon nai jalahan tujae tujulu, tu dolok tu lombang, tai sambal siating dohot sambal tuktuk singkop dohot joring naposo marancimun air pe madung na taboan i.
Tinggal man syukurina doma iba tu Nasadai”, ning halak nakayoi mandok tu angkang nia.
Dung binoto ia bahaso halai namarangka maranggi, bulus i haluk ia anggi nia nakayoaan i, roras aek ni mata nia, mangingot oto ni parange nia.


Paduahon


Taringot tu silitonga namargoar si Pardomuan, ngada tak dao rupona panyakitna dohot si angkaan. Mulo siangkaan manjalahi parmanganan natabo, mulo silitonga on antong manjalahi parmodoman natabo.

Rupona ngada sadia lolot dung marangkat angkang nia maninggalkon huta giot manjalahi parmanganan natabo, i gadis ia muse ma harto bagian nia.
Ngada adong be inganan parmodoman nasinok be di luat on”, ning si Pardomuaan mandok tu anggi nia. Marangkat ma ia…i tinggalkon ia ma bona nibulu huta hasorangon, inganan damang dohot dainang majalahi hakayoan. Tinggal ma artina si anggian …..so adong angka be, so adong muse damang dohot dainang ambaen pangolosan.
Songoni ma antong…marangkat muse ma si Pardomuan na manjalahi parmodoman na tabo on.

Mardapot ari mardapot bulan mardapot taon muse, ngada na unjung dapot honak ni parmodoman. Dapot hotel nasada giot hotel nalain muse, dapot panginapan na sada giot panginapan nalain muse, songoni ma satiop ari. Lolot murmalolot antong tip tip sa titi-tipna muse ma bohal nai oban sian huta i. Ngada ada adong be jamaon, ngada binoto be sanga tudia. Giot mulak tu huta ngada tarbaen, madung lopus hobar bahaso ngada angkan namulak be.
Inda nangkan natartagung ila”, ning si partomuan di bagasan roha nia.

Ngada be tarsosalkon…badan doma na mananggung, ate-ate marngot-ngot, mangingot oto ni pamikir. Simanjojak ngada be tarora sanga tujia mangalangka, badan nadangol mangihutkon doma. Halak nalain mangaligisa songon nasenjang, pahae pahulu ngada adong tujuan. Malungun tu angka dohot anggi, tai ngada binoto sanga dijia. Taringot tu damang dohot dainang, tai ngada muse tarbaen mangaligi kuburanna. Mur mahancit nilala ia sidangolan i.

Disaulak ari tarbongal musema di sia bahaso adong sada halak nakayo, nadenggan roha, nalomo roha, nanayang pangambe. Tubu musema di roha nia giot mangalangka manopot halak nakayoi. “Ngada binoto ampot martarimo do badan nadangol on”, ning ia di bagasan roha nia.

Tarsonggot muse halak nakayoi di haroro ni si Pardomuan i. Bulus binoto ia do bahaso bayo nanijolo nia i, ima angka silitonga nia, harana sarupo butul igungna dalpak godang songonjia igung ni amang nia.

Isapai halak na kayoi si Pardomuan sanga aha do maksud niharoro niai. “On mabo…damang dohot dainang ambaen pangoloson so adong be, harto so martungko be, angka dohot anggi so binoto be luatna, tinggal badan nadangol on doma paihutkon tu jae dohot tu julu. Tujia ning simanjojak tu sima nilangkahon. Ngada be tarsosalkon oto ni pamikir. Ma hugadis sude harto paninggalan ni damang dohot dainang”, ning ia mandok tu halak nakayoi.

Tujia do ni binaen ho hepeng panggadisan ni harto paninggalan ni simatobang mi ?” Ning halak nakayoi muse tu sia. Ngada taralosi ia be, sangkot nilala ia di ola-olai, ngada tarulakkon ia mancaritohonsa. Sip polngit santongkin i. Taringot halak nakayoi anta na piga taon na solpu, di hatiha angkang nia nasilitonga tarsongon namandemes tu sia, harana ngada godang roha nia tu angkang nia nagiot marangkat manjalahi parmodoman na taboi.
Oooo ... Jalobu”, ning halak nakayoi mandok tu halak na pature saba nia.
Aha de he luai morangku”, ning Jalobu mangalus. I padonok halak nakayoi tu suping ni Jalobu. Mondok-ondok ulu ni Jalobu sonjia burung balom jambi doma nida, manandahon bahaso madung mangarti ia nani maksud ni mora nia i.
Ngada sajia lolot dungi, ni ontang ia ma bayo najongjong tondo di siambirang ni halak nakayoi, anso mangihutkon ia.

Tinggal ma ia dohot Jalobu di bagas nai lambung ni losung bunggar i. Sasadarion karejo nia hum namandungkapi dohot manyisipi goni na matombuk maia. Ngada dope salose sada madung adong muse dungkapon dohot sisipon nalain, songoni ma ari arion. Angke nabolak antong saba ni halak nakayoi, satiop ari manjombur eme, satiop ari muse manduda di losung bunggar i, anta napiga halak muse napadudahon tu si. Simbur doma nida halak na pahae pahulu mamorsan eme dohot mamorsan danon. Anggo ia ba nalaing jugug sajoma karejo nia mandungkapi dohot manyisipi karung dohot goni. Ulang do maradian sotik madung sirik ma mata ni Jalobu paida ida ia. Ra ra doma nida matai naso modom-modom i, angke mulo nida Jalobu marsitundu, roma songgak songgak nia.

Dung tolu ari inda modom-modom…
I ontang Jalobu ma ia tu sopo si sisahua nadi tonga ni saba, na di ginjang ni Aek Si Capot i. I oban ma karung dohot goni ambaen dungkapaon. Lomos doma ia mangaligi bahatna karung namasuak nagiot dungkapon i.

I tinggalkon Jalobu sado-sado ia disi. “Ulang naso salose karung dungkapon on, antargan so mangkuling ogung partado kotu luhur”, ning Jalobu tusia. Ngada ba ni alusia ia. Dung kehe do Jalobu maninggalkon ia, so kaluar hobar sian papangan nia. “Tee… do ibabamu Jalobu”, ning ia mandemes, hancitna nilala ia manahan mata nagiot modom i.
Palan-palan i muloi ia mangarejohonsa. Sian toru ni sopoi tarbege sora ni Aek Si Capot mamircak-mircak, palan-palan marombus-ombus muse angin si alogo, sian bariba batang aek i herek songon na mandelam-delami dohot pabile-bilehon ia, burung ambaroba sian ruap-ruap i ngada marajian-ajian marlogu-logu, burung cion ngada loja muse binige maturepet, sonjia doma binege umak-umak nahamagoan sonduk ni indahan. Tar dua karung dope tarkarejohon ia, mata ngada tartahan be. Mungkor ia situtu. Di hatihai ma ro halak nakayoi dohot Jalobu. Mopeng-openg halak nakayoi mangaligi sinokna angka silitonga nia namodom i. I topuk ia abarai: ”Ngotma”, ning ia tu angka nia i. Tarsonggot ia situtu mangaligi halak nakayoi madung jong-jong di adopan nia, salaho kaluar hobar sian papangan nia, “Alaaaaaa…natabo mada na modom i
Mekel-ekel muse halak nakayoi paida-idasa, laho mandok: “Angke na tabo an do modom di sopo si sahua i, umpado manjalahi par podoman tujae tujulu manghabiskon harto paninggalan ni simatobang niba”. Dosik taroktot nia pabege-begesa, taringot anta piga taon nasolpu, di hatiha ia giot maninggalkon huta inganan sorang nia.

Di hatihai ma di solom torus i haluk kaluk halak nakayoi angka nia si Pardomuan salaho i patandahon bahaso ia margorar si Partaonan ima si anggian. Ngangang doma papangan ni si Pardomuan songon dabuan rimbang manangihon nai dok ni halak nakayoi, taringot ia ha otoan nia na madung manghabiskon harto ni amang nia.


Patoluhon

Taringo tu si anggian…Hancit doma nilala ia dung do ni tinggalkon angkang-angkang nia ia. Angke ngada adong be pangoloson, damang dohot dainang so adongbe, angka na dua ngada binoto sanga di jiabe luatna. Muse…bahat hobar-hobar ni halak naso pade tangionon ni suping. Adong namandokon: “Anak te do su de”. Adong muse namandokon: “Mayup harto na bahat i”. Songoni matehe di hutai, sude sala do di halak.

Ambaen nasongoni mada, ngada tar tangi-tangion si Partaonan. Ngada sadia lolot i gadis ia muse sude harto bagian nia i, i tinggalkon ia huta hasorangan nia. Tai ba ngada songon niat ni angka-angka nia. Ni jalaki ia tano luat natumbur namomo suan-suanan mangolu, artina nipindah kon ia harto nia i tu luat na asing. Antong lolot mur malolot ambaen sobar nia dohot tokunna nia, muse nalobi borgo muse tanganna nia, harto nia murmur martamba sajo. Hakayoan nia lobi lobi bahatna sian harto ni simatobang nia najolo.

Songoni ma bisuk nisi anggian i, ima mulo halak na mar akal”, ning ayahanda Amiruddin Lubis (Guru Mirdin), obar pangabisan manutup carito.

Sayur matua bulung halai natolu marangka-maranggi ... !

Bandung, 8 Juni 2010

Wassalam



Tagor Lubis


Catatan :Cerita ini saya rangkai kembali seperti yang ayahanda Amiruddin Lubis (Guru Mirdin) tuturkan secara bersambung setelah selesai sholat magrib berjamaah dan makan malam bersama kepada kami putra dan putrinya pada masa kanak-kanak di kampung dahulu. Mohon maaf bilamana ada nama-nama yang sama, ini hanyalah rekaan belaka. Dan kepada ayahanda Amiruddin lubis, semoga selalu dalam lindungan-Nya. Ceritamu dan nasihatmu selalu terpatri kuat di dalam dada dan ingatan kami.