Sunday, December 29, 2013

carito na pondok-pondok


SADA

GORAR

I sada maso pasuo mada dua jolma i Tano Sere, sada ngon barat sadanai ngon timur.

Ro ning alak na sian barat i: "ah, aha mentong jabat jaot ni sada2 gorar i, na ponting sinaloan do dabn !" Botimon.

Mangalus bayo na sian timur i: "Aha nimu !! Anggo songon i giot do ho ibaen gorarmu si botak?"

"Inda jau ba le, nga botak ulungku, gonrong do !!"

Ro ning bayo na sian timur i: "So pas, si gonrong masoni gorarmu !"

"Nga jau ba le, iambang kalak muse iba non alak na jangak, si pargajul !!"

Ro muse ning bayo na sian timur i: "Na gadukma ho le, tai idokko nangkin ngadong jaot ni gorar ji jolma , anggo jami on gorar i doah dei boto, na urang podal do ho uida !!"

Dungi, siptong bayo na sian barat i, oni kehe ia salaos marnyungut-nyungut.



DUA

TITIK KOMA;


Adong mada sada carito ni sada alak na marsikola, tai ba nga binoto ba sanga na peto anta na buras do carito on. Ninna, i sada maso, ompak marsiajar ilmu bumi i bagasan ni sada kalas, ipio guru nalai i mada muridnia na margoar si Sotul so ro tu lambungnia i jolo kalasi, oni mangkuling guru nalai i:


“Joleee…Sotul, na gaduk mada ho pala manyurat tele, inda dong titik komana, marsambung sude, inda ban iba jabat mosa atia mamasana !” Ning apak Roken guru nalai i.


Ro alus ni si Sotul: “muda get mamasana apak i, mosa jolo parjolo, tongkin nai abis osa ni apak i !”


Pabege-bege obar ni si Sotul i, manyoteng jabat sisungut ni guru nalai i sabariba, oni mandok obar: “Sirit ni amangmu !!!” Ning ia targogo.


“Anggo get paresona apak i, tiop manyogot, mangalapor dei amangku i bondar nai lombang mandersa an !!!" Ning si Sotul.









TOLU

NENEK KIKIT Vs. OMPUNG GAIT

OG: "Lenma jau dabo sotik"
NK: "Aha do langa por ni roami, gosona nida ilala ho !!"
OG: "Oiii...kikit na ho, sotik pe nga ilehenko jiba, o...na gantung i bo !!"
NK: "Aha do langa giotmu, on maia na gantung bo !!" Laos patidaon sarung ni bongko.
OG: "Olo...imada... sarung na sada nai, so upistakkon !!"
NG: "Maraek dope langa, o...tungkiskon tu takar on bo !!"
OG: "Ah, codikna ho, kemau soni jolo lao2tu pagaran sigatal !!"
NG: "Keni tusi, huh...gogoan anjak !!" Ning ia laos kehe mambasui tu aek godang an.








OPAT

SI BURAS AMAT 

Na saulak kehe mada si Buras Amat marmayam tu huta luar giot mangkusip sada boru bujing na dung solot sajo di bagasan roania. Dung sampe ia tu huta i, na bulusma itopot ia raja na poso nadi huta i get mangido izin so ipatola mangkusip tu bagas podoman ni boru bujing  i. 

Rontong alus ni raja na poso i: "Pade antong, taiba jago ho, na sapotang ninna nida alak i lambung ni bagas podoman ni boru bujung i sada ulok sa ama na santak godang".
"Sadia godang langa jabat ?" Marsapa si Amat.
"Bo ninna adong do panggodangna sabatang ni pining jabat !", ning raja na poso i.
"Ah, um cai do he, te na saulak mang unjungma ubunu sada ulok sa na sabatang karambir godangna", ning si Buras Amat manggodang.
Ro ning raja na poso i: "O, amu dei alakna rupana, na bonggalan i jabat carito i na saulak, ninna sompat dei amu liput tarkoncing-koncing jabat  isaraormu ambaen biarna, untung na ma marroan alak na bahat manolong kamu, anggo inda ......... !"
"Ah, ngasongoni ba caritona, salangkon bangke ni ulok sa i, sompat dope utanom i panggurisan kan, keta dabo ita ligin tu sadun, so purcaya ho !!" Ning si Buras Amat.

Rontong alus ni raja na poso i: "Peto mantong gorarmu  si Buras Amat !!!" Ning ia targogo sotik  laos kehe lao palan-palan tu sopo podoman ni poso-poso na i huta i.




No comments:

Post a Comment