anak ni surat

SI OLO-OLO

Adong sada carito. Ninna najolo ni najolo, dompak sihim dope panganon ni kudo, adong mada sada bayo ama na lobi malo marcarito. Ning ia, i sada maso kehe mada sada bayo tu sabania get mamuro. Bo, ngadiambang-ambang boto, pasuo mada ia dohot sada bayo alak na ro sian Padang Mandepo. Alakna boto na ringgasan mangomo marbabo, oni ra muse antong parmahan orbo. Parsibuk ni bayo on ama na togos nida boto, tarangkat ia dei sopo-sopo na get marobo, arana inumomnia manyogot-nyogot ngiro, marayak potang aek ni arambir poso. Pala mangankon ama na goso, tuptap songon parmangan ni leto, tai ba dung butong mangan tarida songon na maoto.

I sada maso, rap kehe mada aduana tu jalangan ni tuok Rajo get marmahan orbo. Di akna be rap solot antong sadabe piso, ngase binoto dabo i pardalanan naron adong na ro manyoro, bope sanga na gogo i get ro jumbo sian jolo, so taralo. Indape na lalu tu jalangan ni orbo, mang ro pio-pio ni tuok Rajo anso ipaipas pangalaho, arana rupa mang mate sada orbo na bunting poso. Arani panyosak ni tuok Rajo so ipas ro, marjipur-jipur doma boto aduana songon motor sipiso-piso.

Lalu tu lambung ni tuok Rajo, ibana tarida maniop piso dompak mangkorot-korot bolo-bolo. Ambaen aha dei bolo-bolo i tulang Rajo, marsapa sada bayo. Rontong alus ni tuok Rajo, ambaen pulungan ni ubat ji alak na tarsapo! Dung salose mangkorot-korot bolo-bolo, kehe ma alai rap tu sada sopo na get marobo. Ngada binoto-binoto rupa mang adong di si sada bayo na baru sidung mangan soto, dung i mangidup sigaret hero. Paida-idana bulus mantata boto tuok Rajo sareto mandok sada poda ni alak na jolo: Sate Soto, Mate Na Oto, peto dei luai bayoooooo ... !!!

===ooo===

SI BELE-BELE

Pala muli eme di Huta Namale, dung salose sude mardege dohot mamiari eme, tarida mei alak huta i udur-udur mamorsan karung ni eme. Dung lopeh manarui eme, marayak ariannai male muse mei simanare. Adope, mangan bubur cacak ma jolo le so ro gogoi mulak muda manarui eme. Dung salose karejo sude, laos muli tu huta rap mangan potang muse. Murmatabo muse antong na mangan i muda adong balanak na i tutung rongkon ingkayuna sumangge na igule. Songon i pe, dung muli eme na ipalagut sude di opuk eme, ulang nian sugari lupa manabusi sere, so dong obanon pala get manyapai boru di na patibal sere, muda nangkan jadi babere ni parmotor Batang Pane.  

Muda ngadong sere nangkan patibalon muyu bere, kehe homu manggore. Tai, ise do luai dongan muyu na pade bere incogot manggore? I Batang Gadis an na rere sajo do ninna sere. Muda get kehe homu monggore, ulang be pardongan si Pandehe, naron murmamale muse simanare bele-bele paiut-iut bayo i mandehe-dehe. Kasidunganna marnyae, lalu nga dapot be sere. So binoto homu bere, nataboan muse ilala si Pandehe on mangan pote. Biamantong, angke ibana pinompar ni Dja Manggete, si parhauma eme na mian di Tor Sihite.

Pondok ni carito bere, muda nga ioban komu boto sere saulakon di na patibal sere, inda lalu homu jadi babere !!

===ooo===

SI RARA

I tandai homu dope le Si Rara? Ninna, najolo ompung ni ompungnia alak naro juo dei sian Aek Nabara, ro alai sabara mamota-mota arangan dohot rura sampe tu paya-paya na ilambung ni Gunungtua. Dung tolap tu Huta Sabariba, nida alai mada sada amporik Ambaroba atia martata-tata paida-ida ulok Sa manolon Si Bodak na mata, sangkot di ola-olana, oni pangkosana tangging marsada-sada, nga bisana be muta. Kasidunganna baya, bilak mata ni ulok Sa i aduana.

Ro ning uluan ni alai i ma Raja Gaja: i son ma ita pungka huta! Botimada, lolot-lolot jolma pe murmartamba, adong muse saba dohot rurana, sian dolok torus tu lombang, i jae bope i julu mang rarak jolma. Mang singkop mada sudena muda na giot mambaen sada banua. Putus pokat ni alai sudena binaen ma goarna: Huta Galagala, arana di si jaji tubu batang ni galagala. Songon i mada indokon, di na rinca di na robi baya, antargan di na tolbak di abornginanna, antargan di galagala na markaombu di sarumpaet na lobat bunga, oloda Dja Tulila.

Dung do alai marratus taon mian di Huta Galagala, na dangolna baya inda bahat na maruba, angoluan ni alai leng na sian kobun dohot saba, bope baya madung lolot jongjong di si sikola. Natuari sada, burangkit mada ama ni si Rara patunda ponten parsiajaran sikolana sudena na rara, mandang kulluhum angko lima, marosros doma ate-atenia paida-idana. Aso do ra songon i langa? Marsapa amangnia tu "Na So Nida". Tar sasampak jala adongma obar na alibos ibagasan roana: "mago Poda Na Lima !!!" 

Dung i marsurak simatobangnia: "Marmaraaaaa ... !!!"

===ooo===

SI RIRI

Borngin tuari marnipi Si Riri. I nipinia i nida ia mada dompak bahat marpoken siri-siri i potang ni ari. Tai, ngabinoto sian dia rona adong mada sada ulok ri na manyotop siri-siri na dompak songgop i bungo mata ni ari. I buat Si Riri bulus lidi, oni ilibas ia mantong ulok ri i. Bope inda ona tai leng liput do ulok ri i tu toru batang-batang ni kopi. Dung i, tarsonggot ma Si Siri. Bulus kehe ia antong maridi. Lalu tu tapian na i jae ni musojit godang i, nida ia bou ojinia dompak marsalin maridi, tai leng marsugi-sugi, rara doma sude baba i. Mangkuling Si Riri: "Ulang marsugi-sugi bou oji pala maridi, naron ro ulok ri !" Ning ia margiri. Rontong ning bou ojinia i: "Ho pe taing na jeges, pature parabitmu muda maridi so ulang ro alak manungkiri !" Marsiianyang musengtong bounia tu Si Riri.

Salose maridi, dung manjawek kehe Si Riri tu bagasan suro ni dadaboru i sumbayang tonga ari, oni ipalalu ia muse mangaji-aji di si. Tar tolu ayat dope kajinia tarbege mada disia sora: “Tilnong … tilnong … tilnong” ninna i dolok dalan ngon topi-topi. Ro obar ibagasan roa ni Si Riri: “Songon sora tilnong-tilnong padati ni amangboru Goti”. Arani i, bulus taringot maia tu anak patoluon ni amangboru Goti na margorar Si Lewi, sada bayo na ro sajo atia bagas borngin tu parik bagas ni alai i. Pala isapai Si Riri: “Ise dei ?” Ro mei balos ni Si Lewi: “Au dei bayo pamiari najogi !” Ninna asok sian parik i. Rontong alus ni Si Riri: “O … bayo parpadati saulak sapoken maridi !” Dung i, ipanaet Si Riri antong colok so torang i bagasan kamarniai. “Peto mantong boru suti”, ning Si Lewi asok salaos morot palan-palan sian parik ni bagas i.

Incogot bornginnai na ro muse dope mulak Si Lewi tu si, inda boto na losi. Marende-ende dohot martulila dope ia tambana di borngin ni ari na ngali i. Bo, ingoran jabat suping ni amang ni Si Riri. Pabege-begena inda tarpodom amangnia i, busa-base soni nida ilambung ni parsonduknia i. Holasna ilala ia ngada tanggung, songon na gara doma api ibagasan ni indorania pabege-bege ende-ende dohot tulila ni Si Lewi i. Padohal da, ia pe ompak poso na iparik-parik i sajo do karejonia sasaborngin mangkusip umak ni Si Riri. I topot ia bageng jabat bayo datu tu Ranggasoli so ra bujing i jadi parumaen ni amangnia Dja Manggoriti.

Nga binoto Si Lewi na dompak asik marende-ende dohot martulila i lambung ni lubang pangkusipan i, rupa i balakangnia madung jonggor amang ni Si Riri, i tangan siamunnia tiop mantong nida sabatang ayu kopi. Sapala na iumbania ma bulus gurung-gurung ni Si Lewi marnoli-noli: “Buk bak buk bak buk bak” ninna binege, sareto mandok obar: “Na pipil pusot mantong kusiponmu, jole labi !” 

“Alaleee …” ning Si Lewi arani ancitna ilala ia na ona gendani, oni torus ma ia marlojong marjipur-jipur tu jaean mamota-mota kobun kopi na iparik ni bagas i.

“Toskon !!!”, ning Si Riri.

===ooo===

SI DUDU

Ompak poken i Pasar Kotanopan ari Sabtu, kehe mada Si Dudu marsadu tu sadu giot manabusi sipatu sikola ni anaknia Si Batu. I tonga dalan nida Si Dudu mada sada bayo na marlereng maroban indalu duruk tu duru-duru. Arani i bulus marlojong antong Si Dudu laos marsurak-surak: “Jooouuuu ... adong bayo na manabu !” Alak pentong ro ro sada ma tu sadu. Dung lalu tu si, nida Si Dudu, ulu ni bayo na tarduru i marbujal ona tinggang indalu. Bayo i mang juguk tai marsitundu, sareto botohonna manudu-nudu lerengnia na suksuk tu duru-duru na i lambung rumpun ni bulu. Alak pe bulusma pajongjong bayo na manabu i tibu-tibu, oni itogu-togu alai torus tu bagas ni sada bayo partangga bulu. Di si, ambaen ngalina ari, isuru alai bayo i marsidudu. Salose pature alak na manabu, Si Dudu pentong torus kehe maia tu pasar marsadu.

Tolap tu pasar nida Si Dudu mang rami alak na pae-paulu. Di poken i adong alak na marjagal kue bolu, robung ni bulu, marmocom-mocom ingkayu, gulaen budu, sapu, indalu, soni juo na marjagal sipatu. Lalu tu lambung ni parjalan sipatu, mijurma ia sian sadu. Dung i, ituor iama sapasang sipatu ambaen ji anaknia Si Batu na marsikola i SR pitu kalas tolu. Lopeh manabusi sipatu, kehe musema ia orong tu julu giot manuor ingkayu dohot gulaen budu tu parjagalan ni amangboru Togu, na marjagal i lambung ni tugu. Ompak manuor-nuor gulaen budu, ibana pasuo dohot sada Bayo Datu. Marsapa Si Dudu: “Aha dei ubat ni ulu na poning sabariba amang bayo datu ? Bahat kalak mandok ubatna epeng karotes na balau, botul de lei amang Bayo Datu ?” Rontong ning Bayo Datu: “Olo, tutu !”.

Benna topek antong ari Sabtu, ipalalu Si Dudu kehe tu parjagalan ni bou Balu giot mangan kue bolu. Dung butong mangan kue bolu, mangkuling Si Dudu: “Tungkus jolo jau ambaen silua, bou Balu !”  I tungkus bou Balu antong kue bolu, oni ilehen ia tu Si Dudu. Hum na mangalangka dope Si Dudu get kehe mulak tu julu manjalaki sihim ambaen panganon ni kudo, ro mada amangboru Binu mosa-osa manopotkon Si Dudu salaos mandok obar: “Songon na ronyang sotik uida kudomu !”  Rontong ning Si Dudu: “Olo, arana mang tolu ari bo indape na unjung mandai sihim, amangboru !” Mangkuling mulak amangboru Binu: “Ngadong kuida na manggadis sihim poken on, osur maia na dong. Biama mei, Dudu?” Markerut boi ni Si Dudu mambege obar ni amangboru Binu salaos mangkuling: “Lahle bagian ... mate mei kudongki baya, inda bisa iba on be tudia-dia marsadu !”

Pabege-bege kecek ni amangboru Binu dohot Si Dudu, ro jabat obar ni bou Balu: “Andigan mentong unjung sihim panganon ni kudo muloi do sian maso na rinca na robi, duhut dei dabole panganonna, bongakna uida homu !”

Rontong alus ni Si Dudu: “So binoto bou, lain dei boto kudongki, kudo pucako na marbegu !”

“Laik dontong so rupomu satonga nida tarsongon begu !” Ning bou Balu.

Cileungsi, 9 Mei 2012

===ooo===