Wednesday, June 19, 2013

Bayo na so tarlupahon




HATIO TEMPO SIKOLA taon on, ama na santak por sikatutu rohangku pasuo dohot damang, dainang rongkon anggi-anggi di huta harana antong madung joman au inda mulak kampung. Au si Fatimah Nauli Nasution, sada boru bujing sian kampung namian na itarimo jadi mahasiswi Institut Pertanian Bogor ira-ira tolu taon na solpu, sannari madung onom semester au marsipoda di si. Dung do tolu taon, ondope so bisa au mulak tu huta.Harana bahat do partimbangan niba lumobi partimbangan ni biaya sahinggo inda tartontuon mulak tu huta muda tempo di maso semesteran. On pe hara ni damang baru marnyae ima anso mulak au manindo damang namadung muloi alhamdulillah irasma mulak pamatang ni ibana.

Paduaa arina di huta, targan so kotu, hatio sidumadang ari muloi manaek, uida mada dainang sandang adangan bayuon na.Bulus marsapa au: "Giot tujia do umak?" ningku. Rontong alus ni dainang: "Ke au jolo tu saba, ampot tarcalongma kacang panjang dohot kacang buncis na i gadu i !!", ning dainang mangalus.Salau upake solopku mangkuling au: "Dot au!", ningku targogo sotik.

Tolap tu saba, dainang pe na kehe ma tu gadu i mancalong kacang panjang na i jung-jungan na marbaris sapanjang gadu na ombar dohot bondar kenek i. Atia nida dainang au leng mangiut i balakangnia, mandok obar dainang tu au: "Ke pajuguk tu sopoan, nangkon ko dot mancalong", ning dainang, biarna ilala dainang nangkan kotor baju niba.


Dung upajuguk isopo saba nami i, taraso ulala ibus-bus angin songonna mangalaok-laok, tandang mambaen taringot tu maso menek niba. Ningot marlonjak-lonjak iginjang durame hatio mardege, ningot margulu itonga lupak hatio manyosak. Pula utatap buse tu bariba, lampas dope tarida batang ni jambu orcik panaekon niba najolo dohot dongan-dongan saparmayaman. Mekel au antong, pula uingot hatio ro "Nai gas-gas i” (babi) na ikojar-kojar ni halak hatio marburu. Dompak i hami rap dohot dongan-dongan lalat marmayam, taro narap martaru ipas doma hami manaek tu batang ni jambu orcik i, rap maradu tu uncukan. Bope batang ni jambu i tarlampas sotik, tai benna menek i, taru na iayunkonsa do hami mordok tu toru, nasingit ma antuk tu tanggurung ni na i gas-gas i.

Opat halak hami sakongsi: au, kak Salamah, si Lindung dohot bang Syafruddin. Maso i au kalas tolu, bang Syafruddin kalas opat. Mulak sikokala, ami pe na kehe mai tu saba marmayam, mariari isuru dainang angkon ro, so mangan arian tu sabaan. Topek musengtong ombar do saba nami dohot halak bang Syafruddin.

Pula upasari-sari, angke na madung holong do rohania tu au muloi sian menek. Dihatio manaek na roi na i gas-gas i, ipajolo ia do au manaek anso manaek ia. Muda adong parsiajaranku naso dapot au, ama na ringgas ia mangajari au. Harana bang Syafruddin on, na bisukan alakna di parsiajaran. Ima so inda heran au sannari ia dompak mambuat sikola gincat program S2 i sada universitas na godang i Belgium.


Dung do mangkagodangi hami, parkongsion di hatio menek tinggal kenangan doma sannari. Tai bope songoni hatio hita rap muloi mompas godang, muda rap ibagas ni halak napaboru-boruon, uboto do na i pamataimu sajo do au dompak so uida, songoni juo au na upamatai muse do ho abang dompak so nida ho. Santak do dung tu luar negeri ho abang na marsikola gincat i, pupu do ikirimko diau surat na totop manyapai atorkisan, dohot marcarito ho sanga songondia hangoluan ni halak i sadun. Sakali, dua kali, tolu kali ro suratmu riang dope ulala manarimo dohot mambacasa. Tai lambat-lambat, ama na jop rohangku abang dung ituliskon ko isi ni rohamu na sapetona tu au, harana ido na madung lambat upainte muloi do na jolo sian ho abang. On pe posma rohamu abang, leng na upainte do aroromu mangalap au sanga andigan pe, ima pangidoanku tu Na Sada i. 

========================
Penulis cerita pendek berbahasa Mandailing ini
adalah putra Hutanagodang, Ulu Pungkut,
Mandailing Julu. Setelah menyelesaikan
pendidikan Akademi Akuntansi Artawiyata
Indonesia (A3I) di Jakarta, kemudian ia
bekerja di Badan Penanggulangan Bencana
Daerah Tanjung Balai, Propinsi Sumatera
Utara. Sekarang ia dan istrinya telah
memiliki sepasang buah hati (putra-
putri) yang mereka sayangi.

No comments:

Post a Comment