Alak dia do homu langa ?!

SADA

Di potang ni ari antargan so kotu magorib, ipaombang si Taing mada amak pandan di pantar tonga ni bagas nalai i. Inda lolot dung i, sian dapur an tarbege Umak nia mengkuling: “O ... Taing, ulangko lupa parbasuan, buat aekna sian garigit tai !!!”.

“Olo Umak“, ning si Taing.

Reeekkk … sora ni pintu ruar, dungi tarbege salam: “Assalamu’alaikum !!”.

“Wa’alaikum salam !! Umak, madung mulak Ayah sian kobun !!” Ning si Taing.

“Yabo, madung masakma sude, adope rap ita angkati jolo so rap mangan kita“, ning Umak nia muse. Bo, rupana alai sabagas nagiot manganma di potang ni ari i.

“Taing, si Lian ijia langa ?”Ro sapa-sapa ni Amang nia. 

“Palobu manuk ayah”, ning si Taing.

“O … Lian, antak ma jolo na palobu manuk i, patibu ro tu son anso rap mangan kita. Na taboan on, mera gule na !!!” Ning Amang nia.

 “Olo Ayah, ro ma au !!” Dialusi si Lian.

Di amparan na hombang i, Amang ni si Lian juguk. Sian cakukna ipakaluarsa pusuk dohot timbako ambaen iduponna. Lopeh sangarsik dua arsik, tai si Lian inda pe na ro juo.

“Lian, inda pe na siap langa !!!” Marsapa Ayah nia.

“Madung Ayah, ro ma au“, ning si Lian mulak.

Dung manaek si Lian tu bagas, na bulus ro ma sapa-sapa ni amangna: “Aso do lolot na ho na palobu manuk i ?”

Ro alus ni si Lian: “Adong dabo Ayah manuk tai sada na burnungon, ibo roangku paida-idasa, jadi upainumkon nangkin aek ni bulung botik anso ulang burnungon be, so cikar mulak incogot“.

Inda sadia lolot, ro muse ma si Taing dohot induk nia sian dapur tu pantar tonga i marlagut. Adope, mangan ma alai sabagas. I buat si Lian mantong pinggan nia dohot sonduk. I sonduk ia antong indahan tu pinggan nia, songoni muse gulena. Dompak i, ayah nia lengna marbual timbus ni pusuk sajo dope salaos mamanat-manati si Lian na mangan i. 

Arani malena, inda sodar si Lian atia na mangan i, i jomak godangkon ia indahan dohot gulena tu pinggan nia. Dung i, iaumkon ia muse tu papangan nia. Boti di atia na mangan i, pat na pe pajala-jelu songon na get marmoncak mangadopi musu godang. Tup-tap iaumkon ia tu si papangannia inda unjung so, sasakali aek ni igung nia tarida morcop-murcop arani siakna gule mera i. Inda pe abis sanjomak, mai jomakkon ia muse tu papangan nia, songon parmangan ni alak na antu laparon.

Rupa i mada acakna so marrara muko boti milas muse ate-ate ni amang nia, dina paida-ida parange ni si nuan tunas on atia na mangan i. Kasidunganna inda tahan sa be, i sordikkon ibana: “Lian, antakki. Songon alak na so ture ho u ida na mangan i, inda unjung i ajarkon ompung ni ompungmu mangan songon i. Patibu antai na mangan i !!!”.

Mambege obar ni simatobang nia i, bulus so papangan ni si Lian namangankon i. Inda tartalihon ia be muko ni amang nia arani biarna, ilu do ma na ro torus tangis matunguknguk. Bope songon i, get ro muse ma darap-darap tu muko ni si Lian. Untung ma umakna manongai: “Ima dabo amang, muda mangan inda tola songon i, naron i dokon alak kita na congok, na antu laparon, inda pade boto songon i amang, ulang be ulai ke amang !!”.

“Olo Umak“, ning si Lian tai na leng tangis dope ia matunguknguk.

“Sip ko, abiskon indahan mi!!“ Ning Amang nia muse leng gusar.

Dung na manggusari si Lian i, inda get mangan be amang nia. Sian tingkap ni bagas i, i tatap ia bulung karambir na maule-ule atia iombuskon angin. Di uncuk nai tarida madung bahat arambir na tobang. Dung i, taringot mada ia di angkang ni si Lian: ”Songon dia do baya angoluan ni anakki si Binsar di Doli an?” Ima sapa-sapa  na ro tu bagasan ni roa nia, i potang ni ari na muloi golap i.

DUA

Tolu taon dung i, murmagodang mantong si Lian. Dompak di sada ari, na sonang mada roa ni si Lian, ima di ari Sabtu na solpu. Arana dung i pareso guru soal-soal maretong siperen nai karejoon nia dina borngin santak tu pukul sambilan, bope antong marlampu colok, inda boto adong na sala, sudena botul, ponten sapulu. Muse, atia marsapa guru nalai dompak parsiajaran sejarah: “Ise ma dokter na parjolo di Sumatera Utara on?“ Bulus i angkat iama tangan nia salaos mangalus: “Dokter Radja Dorie Loebis, ibuk  guru!!!”

Jop boti sonang boto roa ni guru ni alai i, paida-ida si Lian dohot si Taing na bisuk-bisuk on, arani ringgas ni daganaki marsipoda manjalaki bisuk na peto. I ma sada pituah ni ompung Willem Iskander, sada guru godang na parjolo pajongjong ”sikola rakyat” na jolo i Tano Bato, Mandailing.

Teng … teng … teng …. mangkuling lonceng mulak sikola. Sude angka guru boti dakdanak marsiap-siap mulak tu aratak na be. Songon i muse si Lian dohot dongan-donganna sasikola. Tolap tu bagas, arani sonang na roa ni danak on, marpiul-piul mada ia. Bo, tarbege mada tu induk ni ibana atia di bilik dompak marsiap-siap get kehe tu poken dot boruna si Taing.

“Lian, antak na marpiul-piul i“, ning Umak nia manggusari.

Ro alus ni si Lian, “Monga langa muda marpiul-piul, Umak?“.

“Inda tola Amang, naron ro ulok, patibu antak i !!!”.

“Olo, Umak, maidia ayah?”, ning si Lian salaos marsapa tu Umak nia.

“Ayahmu di lopo dope, aha langa na porlu, Amang?” Marsapa ni Umak nia.

“Na borngin i, Ayah marjanji, muda botul sude tugas sikola na maretong siperen i, i oban ayah au tu poken mardalan-dalan salaos mangan pocal dohot minum cendor ni Umak Umbik!!!”, ning si Lian.

“O soni, painte ma, get ro mei Ayahmu sian lopo, Umak pe dot si Taing marangkat mon tu poken“, ning ni Umak nia sian bilik salaos mambada’i dot mancikek si Taing anso jeges boti tama mada tarida boru rangkuti na margorar si Bulan i.

“O … Lian, abis aek ni garigit nai pangkal tangga on bo, oban jolo garigit nai bagas, get mambasu pat Ayah !!!” Ning Ayah nia sian alaman ni bagas nalai i.

“Yabo, Ayah !!!” Mangalus si Lian sian bagas.

Dung sampe tu tangga ni bagas i, i lehen ia garigit tu ayah nia salaos marsapa:”Ayah, lalu do kan ita kehe tu poken?”

Ro alus ni Amangna: “Jadi, asalma tugas sikolamu namaretong sipereni ponten sapulu !!!” Ning Ayah nia.

Ro ning si Lian: “Olo Ayah, dapot au do ponten sapulu“.

“Anggo songon i marsiap ma anso kehe ita tu poken !”. Ning Amang nia.

“Rap dohot Umak?” Marsapa si Lian.

“Inda ba, Umakmu dot si Taing kehe parjolo, ayah maridi dot sumbayang dope jolo tu musojit. Buat jolo salin abit marikin dot sabun ambaen di Ayah“, ning Ayah nia.

“Yabo, Ayah!” Ning si Lian salaos marlojong tu dapur. Si Lian pe mikim-mikim tarida, atia di dapur sompat muse do ia marangan-angan: mangan pocal dohot minum cendor ni Umak Umbik naron di pasar, oisda baya tabo nai, tarimo kasi Tuhan nami.

Antargan so kotu asar,  si Lian dohot Amang nia madung mulak sian poken. Tarlosok do nida si Lian na lao muli i tu huta arani gok ni bitua nia marisi pocal dohot cendor ni Umak Umbik na santak tabona i. Di tongan dalan, pasuo alai dohot dongan nia si Kuti, si Bara, si Lae, dot si Sege.

“He ale dongan-dongan, na ron potang keta tu Pagaran an mambuat lancat dot manggis, madung lamun-lamun ma uida!!” Ro ontang-ontang ni si Lian.

Ro alus ni dongan-dongan na: “Olo, keta, dung kotu asar do ba“.

Dung sumbayang di masojit, dakdanak na lima i marangkat maroban adangan tu Pagaran an. Manangkok, manuat, manangkok muse, dungi manuat mulak, sampe ma alai tu Aek Coro. Arani lojana, marjugukan mada alai i ginjang ni sada batu na godang di Aek Coro i salaos mambasu patna be namarbustak-bustak. Rupana, i pat ni si Bara adong songgop sada limatok, madung nian mokmok arani butong na mangincop daro ni si Bara. I pisatkonsi Bara antong limatok i mate, arani milasna roa nia.

Inda lolot dung i, tarbege mada di alai sora ni suling na mariot-iot sian dolok, dungi tarbege muse ma ende ungut-ungut:

Uyup-uyup parupuk

Na solot i sopo saba

Oli-oli baya mapuk-puk

Nai opkop ahape suada

Eme baya i baboan
Na di suan marsada-sada
Na ancit baya le na agoan
Muda madung somal di ida mata

Lambok ni bulung ni eme
Na lambok marduyun-duyun
Lambok lidung binege
I ma dalan markalalungun

Landit ni na mandurung
Jolo sitanggis podom-podom
Ancit ni na malungun
Jolo tangis anso modom

Sordam ni jatulila
Ungut-ungut ni baginda kahar
Malungun au di na so nida
Nau tongos di pidong habang

Ulang tong sitata dirabian
Sitanggis diroba-roba
Martata baya di balian
Tangis di bagasan roa

Pabege-bege sora ni suling dohot onak ni ende ungut-ungut i, bo rap marsiliginan ma da alai na lima salaos mikim-mikim. Ro ning si Lae, “Keta ta ligin dongan-dongan, na sonting ma bayai na marsuling dot na marungut-ungut i“.

“Keta !!“ Ning dongan-donganna rap mangalus.

Inda dao sian batang aek i tu dolok, dung manangkok sotik sampe ma alai tu napa-napa. Sian balik ni sanggar-sanggar, nida alaima tolu alak poso-poso dompak marsuling dohot marende-ende di sada sopo. O … na marsuling i rupana si Jatulila, na marende-ende margonti-gonti, sapantun si Jaultop, dung i i sambung si Jasimanare muse sapantun, songoni ma ibaen kalai marulak-ulak.

Rupana, poso-poso na tolu i rap mamboto aroro ni dakdanak na lima i. Bo, bulus jongjong ma si Jaultop salaos mandok: “He … daganak, aha do karejo muyu di si, na poso ma ilala mu. Daganak dope amu, na baru pipil pusot, adope markean kamu mulak, patibu, usotuk ulu muyu non !!!”.

Tai biama antong dakdanak, adong juo do jungal-jungalna, leng isi alai antong. Bo, milas mada ulu ni si Jatulila, i payakkon ia suling di pantar ni sopo i. Torus i lojong ia tu balik ni sangar-sanggar i. I topotkon ia si Lian dot dongan-dongan nai, salaos manokok bohi ni si Lian: “Tuk”.

Dung i mandok obar: “Aha dope langa, paipas kamu muli tu huta, ato angkon na ro dope darap-darap on !!!” Ning si Jatulila.

“Ulang ba angkang, na get muli mami on, tai kehe ami jolo mambuat lancat dot manggis tu lombang ambaen obanan tu huta“, ning si Lian.

“Olo ma, kehe ma amu mambuat lancat dot manggis i, ulang kamu ison, on karejo ni poso-poso do on, inda pe porlu i tiru amu dakdanak “, i sordik si Jatulila.

Arani hancit ni na ona sotuk i, dakdanak i pe antong markean ma salaos marnyungut-nyungut.  ”Angken tong, angkon nai pamata-mata i karejo ni naposo-poso i”, ning si Lian di bagasan ni roa nia.

Abis potang, ro ma muse ma borngin ni ari. Dung sumbayang kotu magorib dot kotu isa, sada-dua alak marroan ma poso-poso tu sopo podoman na adong di topi ni huta i, marlagut ma alai di si. Adong juo antong di si sada bayo ima bayo na tobang sibuk na poso roa, oni adong muse dua alak andor so ayu. Si bayo na tobang sibuk na poso roa on sasakali do nian ro ia tu sopo podoman i. Jop muse antong roa ni poso-poso on, arana bayo tobang on na maloan marcarito, sian carito ni Raja Gorga Di Langit Dohot Sutan Suasa Di Portibi santak tu carito ni Si Tapi Surat Tagan. Songoni muse antong carito satontang tu pangalaman maposo ni ibana, atia mangkusip boru bujing na dung solot di bagasan ni ate-ate, ima boru rangkuti na jotjot na jolo ikusip ia di bagas podoman na. Sude pangalaman ni ibana dompak poso, i caritoon sa tu poso-poso i santak tu na “gaduk-gaduk”, ima namambaen kalai sudena matukakkak matukikkik di sopo podoman i.

Asik marcarito, inda binoto-binoto abis mada pusuk idupon ni bayo na tobang i. Bo, rontong ning si Lokot: “Palalu ma Amangboru mada na marcarito i, kehe pe au tu lopo an manuor pusuk dohot timbako ni Amangboru“.

“Olo ma, i pas ko da mulak tu son“, ning bayo na tobang i.

“Olo Amangboru“, ning si Lokot.

Dung morot sian sopo podoman i, rupana inda sodar si Lokot, i cakuk nia leng solot salung lomo-lomo nia i. Sampe tu lopo ni si Jabondar i, atia i rupa bahat angka na tobang-tobang dompak minum kopi salaos marcarito-carito di si, tardok do ompung, tulang, amanguda, amangtuua, amangboru, songon i juontong tu angka namora-natoras sadebana dohot raja pamusuk ni huta i dompak marlagut di lopo i, di borngin ni ari na ngali i.

“Amangtua, jau jolo pusuk dot timbako!!” Ning si Lokot.

“Bo, madung mangidup maho langa, Lokot?” Marsapa Ja Bondar.

“Inda ba Amangtua, ambaen ji Amangboru Jainten do on !!!” Dialusi si Lokot.

“O … si bayo na tobang sibuk na poso roa i, kha … kha … kha … kak ¡!!” Haruar tata ni Ja Bondar.

“Olo amangtua“, ning si Lokot mikim tai songon na ila do nida roa nia sotik.

Arani partata ni Ja Bondar i, bo … rupana bayo-bayo na tobang na adong di lopo i, tarlobi-lobi do hatobangon na adong di isi, muko mi alai na sompat do nida marrara. Arani ida alai mada adong salung na solot di cakuk balakang ni si Lokot.

Bulus ro obar ni tulang na, ima si Batungkek: “Lokot, na so dong mada baso mu tu ami di son, tarlobi-labi angka hatobangon na undul ni lopo on. Udarapkon ko naon, na rumo, na so dong baso-basomu !!“.

“Aha salangku langa Tulang, inda uboto“, rorap si Lokot mangalus.

“Aha salamu ningmu, ligin jolo sanga aha dei na i cakuk balakang mi, na rumo do ho, sirit ni amangmu !!!” Murmamilas rupana roa ni Tulang nia i.

Motar boti bontar muko ni si Lokot, atia i jama ia cakuk balakang nia, taraso mada adong na ibul, rupana salung lomo-lomo niai leng solot di si. Indabe tarpikirkon ia sude, maripas-ipas ia kaluar sian lopo i, ionjapkon ia ulu nia ibagasan ni abit karung nia, marlojong saipas-ipas na tu sopo podoman an. Sampe tu sopo podoman i, pangkosana na sada-sada doma nida arani lojana na marlojong-lojongi dohot motarna taroktok nia.

“Aha na masa, Lokot!!“ Ro sapa-sapa ni dongan-donganna, dung lalu ia tu sopo podoman parlagutan i. I caritoon si Lokot mada satontang tu purkaro na tarjadi di lopo i nangkin. Dung i tangion kalai carito ni si Lokot i, mangalus ma antong si bayo na tobang sibuk na poso roa i: “I mada amang adat di banuanta on. Muda satontong tu aposoan, inda tola boto i patidahon tu alak na najaji, tarlobi-lobi tu mora niba dohot hatobangon, ila godang dei, idokon kalak mai alak na so marbaso, na so maradat, alak na urgit. I mada pangajaran mei di ita sudena, ulang ita ulahi tilako na songon i be !!”, sipaingot ni bayo na tobang i.

I tambai ia muse: “Anggo di alak na balok an tola do poso-poso dohot bujing-bujing marsitatapan dot mangecek-ngecek padua-dua santak tu bagas borngin. Tai anggo di banuanta on, ulang cubo-cubo parange na songonian, naron marbosar ulu, inda muat be kupia naron. I mada amang anso adong adat ni naposo, misalna mangkusip. Poso-poso rap modom di sopo podoman, muda bujing-bujing di bagas podomanna. Madung diatur ompunta na jumolo sunduti mei sude, anso taratur dohot tertib ita marmasyarakat dot maradat di banua on. Misalna muda adong bayo suti paalo-alo boru suti, i mada nai dokon kalak babiat na muba bolang, ato arambir na muba sabut. Ujung-ujungna, manggora ma naso nida, ro ma na beteng i sian dolok tu huta on manguhum na marsala, sahinggo ro ma bala tu ita sasudena na adong di banua on. Arani i, angkon i pajojor muse ma adat pahabang manuk na bontar, artina na marsala tarpaksa i usir sian huta on, boti gotap muse antong parkahanggian dot parkouman, na bile boti na dangol mada pala dung songoni. I mada so dong pituah ni ompungta satontang tuuhum na porlu leng ita ingot, ima sangkalon: sipangan anak sipangan boru, ise sajo na marsala i uhum, bope anak ato boru niba sandiri, uhum ta inda pili-pili tobu“.

Ipatorus bayo na tobang i muse obar nia: “Puuurrrt ... loja babangku na marcarito on, pusuk dohot timbako inda adong, macom doma ulala babangkon. Patunda ni si Lokot on inda marbual be ita di son“, ning bayo na tobang i salaos marsiap-siap get morot sian sopo podoman ni poso-poso i.

TOLU

Dung tomet antong sikola rakyat (SR), si Lian pe sikola muse maia tu SMP Dua na i tangkok an. Tomet sian sikola SMP ioban angkang nia si Binsar tu Doli rap dot ia. Di Doli an, si Lian on sikola di SMA Sada, ima sada sikola SMA na paling jeges di Doli dompak i. Arani ringgas na ibana antong marsipoda manjalaki bisuk na peto, si Lian na margorar si Ranto on pentong dodas do jadi juara muloi do sian kalas sada sampe tu kalas tolu bagian IPA.

Imantong tele, arani jeges muse ni rasoki ni si Ranto on,  dapot ia ma beasiswa sikola tinggi masin kapal torbang tu Jorman, ima inganan ni sada bangso na unjung diparentah sada bayo na beteng na margorar Hitler, uluan ni NAZI, nai dok halak na kejam arani sun bahatna mamunu alak Jahudi di maso na jolo. Adong do nian tolu taon lolot na si Ranto sikola di si anso dapot ia titel insinyur masin kapal torbang. Sataon dung i, dung mangalamar karejo dapat si Ranto ma antong karejo di sada parusahaan kapal torbang di London, ima ”British Airways”.

I dolok ni sada huta, ima Huta Lalo di luat Mandala Holing, pas di topi ni tobat bolak ni raja i, inda sadia dao sian tarutung bolanda nai jolo bagas ni si Parlagutan i, adong mada sada lopo ni angka ama-ama dohot na tobang-tobang. Anggo poso-poso da, sulaha do roa ni alai juguk di lopo i, paling-paling kalai barani marjuguk-juguk di bangku-bangku sanga di batang karambir na maurbat hira-hira lapan sampe dua bolas langka sian lopo i. Imada lopo ni amang ni si Parlaungan, bayo Lubis na bisuk boti na lomo dot na denggan roa i.

Ambaen ra pe alai poso-poso marjuguk-juguk donok tu lopo i, arani por ni roa ni alai do giot manangion sanga aha sajo nai kecekkon ni ama-ama dohot na tobang-tobang salaos minum kopi dohot mangan goreng pisang di lopo ni amamg ni si Parlaungan i, tarlobi di atia borngin ni ari dung salose sumbayang kotu isa. Murmatagi boti mur masimbur muse ma antong ilala alai na poso-poso on muda murdoreng sora ni tobang-tobang na adong di bagasan ni lopo i. Bo, aso ra songoni? Biaso mada, songon i ma na tarjadi atia angka na tobang-tobang i pakaluar pikiran na, maradu bisuk, maradu pistar dina manyise kajadian na gaduk-gaduk di ginjang dunia on. Muloi do sian soal paompu ni Jaombun na marlojong tu Runding poken na solpu, tokok ni gondang udan potir, arti dohot hayasa ni sopo godang, bahat ni erek dohot babi sannari di hauma, arga ni kantalan sadia poken on, bondar ni saba na mangka tolbak arani ni udan na santak por, ise-ise do imom di mandersa bulan na ro, tulang ni si Lenggana jadi calon Gubernur nomor sada di Mandala Holing, epeng na kotor (dirty money) dot na milas (hot money) di ”pasar epeng” boti muse ”korupsi marjamaah” ima na mambaen ngolu ni jolma bahat na mangae di maso globalisasi on, bom di Pakistan, pargeduk ni zionis Israel di jazirah Arab, Osama bin Laden nai kojar-kojar ni CIA, santak … tu barita ni si bontar mata na madung marulak-ulak kehe tu bulan, sudena i sise alai di lopo i. Jot-jot juo antong alai na tobang-tobangi martongkari jabat di si arani gut-gut ni sada-dua alak, ima si Jalotup dohot si Retuk.

Di tonga ari dung kotu suhur, tarbege mada sora ni canang di huta i, ”bong … bong … bong …”, nai palu amangboru ni si Gangga salaos mandok boa-boa:”O … ale di ita na sa huta on, pandok ni raja i, sasue pokat ni ibana dohot namora-natoras na dung rap ta bege na tuari sada di sopo godang, rap ita alo-alo ma ompung alaklai ni si Latifah na mulak sian Mokah i naron potang, dung sumbayang asar, botiiiiiiii …. ma”. Bo, rupana dompak i Bulan Oji, marmulakan ma oji-oji sian Mokah. Na sonang mada roa ni alak na sahuta i pabege-begesa, tarlobi-lobi daganak na bulus taringotma alai tu tabona mangan karomo dohot minum aek zam-zam naron potang.

”Tintin … tintin … tintin …” tarbege sora ni kalakson ni motor ABS nomor lima bolas sian lombang, di topi dalan godang an. Arani sora ni kalakson i mangkuling marulak-ulak, marmuldopan ma ulu ni alak huta i sian tingkap ni aratakna be, angka dakdanak pe sampe do antong marsurak-surak arani simbur dot riang na di potang ni ari i, atia sude alak huta i marsiap-siap mangalo-alo ompung alaklai ni si Latifah na mulak sian Mokah i.

Inda sadia lolot, mijur mada raja i sian Bagas Godang, mangalangka palan-palan tu lombang. Bo, ma ro raja i sian dolok udur dohot namora-natoras ni huta i. Di balakang nai ihut muse antong alak na jaji rap mardalan kalai marudur tu topi dalan godang an, marrami-rami mada alai mangalo-alo aroro ni ompung alaklai ni si Latifah na dung oji i. Dung sampe alak na bahat i tu topi dalan godang an, haruar ma ompung ni si Latifah sian bagasan ni motor i, bulus ro ma raja i manjagit oji na tobang on salaos marsijalangan, marsisanggoan, dungi margonti-gonti alai angka namora-natoras manogu-nogusa santak tu bagas na. Oni, ihut muse ma antong alak na jaji sian balakang, rap udur ma alai sudena dohot sonang ni roa rap lao tu bagasan ni huta. Adope, dung lalu tu bagas, i pakaluarma antong silua na borkat on: karomo di tapak dohot aek zam-zam di cangkir. Taro mangankon, taro muse ma alai manangion carito satontang pangalaman ni ompung ni si Latifah atia di Mokah dina malaksanaon rukun iman nai suru ni Tuhanta na Maha Kuaso i: ”Allohu Akbar!!!”, sasakali tarbage puja-puji tu Tuhan di bagas na martondi i.

Di Huta Lalo na adong di Mandala Holing i, ima sada banua na martua sapanjang, bahat do boto alak na kayo di si . Taiba, muda iba tarbonggal tarmasuk alak na kayo tu angka kaum-sisolkot na mian di jae-julu, nangkan ro mai sapa-sapa ni alak: ”Madung oji ma bayo i?”. Muda madung oji: “Alhamdulillah!!!”, taiba muda indape naek oji: ”O … songon i do rupa !!!”, ning alak na bahat rap pohom be: ”leng na dunia on dope rupana nai pikirkon ni bayo na dung muap tano i!!!”.

Dung rap mangeceti tarboto mada tu sadebana. Rupana, na maroban ompung ni si Latifah naik oji tu Mokah i, ima si Binsar, anak nia na godangna, na mian di tano Doli, sada pangusaha na marhasil boti kayo muse. I sude dopot ia arani pargaulanna luas, oni na malo mardongan, roana toruk, na laok pangkuling, bisuk, pistar, oni na malim muse antong anak siangkaan nia on. Salain si Binsar, rupana na dot muse do anggi nia si Ranto na tu Mokah i. Arana tolu bulan na solpu, Si Ranto on madung marhasil manamatkon sikola tinggi masin kapal torbang di Berlin-Jorman, jadi marhak ma ia mamake titel insinyur masin di jolo ni gorar nia: Ir. Eng. H. Ranto Rangkuti. I mada boto so dohot ia na tu Mokah i, i ma malaksanaon nasar ni ibana muda dung salose sikola tinggi dot markarejo. Tai poken na ro marangkat ma ia mulak tu London, manoruskon karejo nia di British Airways, dung do ia cuti sabulan lolotna. Muda si Binsar antong madung adong tolu daganakna, indukna boru Sunda na dung leleng kaluargana mian di Doli. Anggo si Ranto na lajang dope, taiba madung adong do na solot di ate-ate nia, ima boru Parancis na bontar, na bagak, na ginjang dot na marigung mancung i, matana tarbalau, bibir na rara, goarna si Margareth White, dongan nia sakarejo di banua Eropa na i siborang laut an. Alakle baya, tinggal martungkol isang boti marangan-angan mada boru ni tulangna, jagar-jagar ni Huta Lalo i.

Ira-ira sapangidupan nai antargan so mangkuling tong-tong kotu magorib, Si Ranto kaluar sian bagas mangalangka giot tu suro nai dolok. Leng songon caro na jolo i do boto: ia marabit karung, di abarana sandang salin maridi abit marikin dohot tauk-tauk marisi sabun, gosok gigi singkop dohot sabut panggosok ni daki na adong di pamatang, boti-boti iba alak kampung na tiop ari tu saba dot tu kobun, tarbahat do daki na mian di pamatang niba. Di namardalan i sian bagas santak tu suro an, adong do nian sada-dua bujing-bujing na muldop uluna di tingkap ni bagasna be, mangintip si Ranto na tampan on, na marsikola tinggi i, boti alak na maradong muse. Taiba, si Ranto on alakna na pohom, sada-sada mai obar na kaluar bope dompak margaul marsirisaan dohot dongan-donganna di huta i. Songon i pe da, leng na tata manis do nida muko nia muda binoto ia adong dongan-dongan atope bujing-bujing na manatap-natap ibana, so ulang idokon kalak iba na sombong: sada sifat na so pade di ita manusia.

Sampe tu suro i, marsalin ma antong Si Ranto marsiap-siap giot maridi di ”pancur na lima” i. Siap maridi, inda lolot dung i, bahang ma si Akbar mamio anso rap sumbayang marimom. Dung abis sumbayang antong, mulak ma Si Ranto tu bagas. Sian alaman ni bagas ni alai i, nida ia rupana leng na adong dope koum bope sisolkot na dohot marsonang ni roa arani amang nia madung oji taon on. Marbalik surut ia mulak, sian samping ni bagas i torus ia mardalan tu balakang sampe tu pintu dapur, baruma ia masuk tu bagas. Bo, i ginjang meja ni dapur i rupana masiap ma indahan na markolas-kolas dope arana baru iangkat sian udon, songoni muse galena: gule bulung gadung na mararias dot limbat pangaroncana, adong muse antong antarsa dot lasiak na mata i meja i. Inda be da, get manetek doma dondong nia paida-ida sa. Bulus ma i pajuguk si Ranto antong salaos mambasu tanganna, dung i ibuat iama pinggan. I sonduk ia muse ma indahan dohot gule bulung gadung i, oni diaumkon sa: “o … inang na tabo mada on”, ima obar na ro di bagasan roa nia, arani martaon doma inda unjung ia be mangan gule pucako i. Ro pe angkang nia Si Binsar tu lambung nia na dompak mangani, inda be iboto sa. Dung iantuk angkang nia dope gurung-gurung nia so sodar si Ranto: “Bo, angkang i dehe, mangan au parjolo, na malean kulala”. Ro ning angkang nia: “Inda monga, palalu ma, kuati na mangan i, so ro mulak sibukmu, marnyiang ko ida dung tolu taon lolotna di banua ni alak na balok an”.

Ro sapa-sapa ni si Ranto: “Lalu do ro si Bulan, Angkang?”, manyapai haroro ni iboto ni alai i na maringanan dohot bayo batubara na mian di Aek Nabara.

“Lalu, muda inda adong alanganna, alai sabagas tolap mei incogot dung kotu”, ning Angkang nia salaos kehe tu ruar, pasuo dot mangecek-ecek mulak dohot koum atope sisolkot ni alai na margonti soluk ro tu bagas ni alai i.

Songon na biaso, pukul pitu borngin lewat saparopat, marmulakan ma alak na sumbayang kotu isa sian mosojit na i topi Batang Gadis an, i siborang dalan. Muda ita pamata-matai, adong na markupiah, na marlobe, adong muse antong naso dong sanga aha di ulunai. Tai na jelas alai sude umumna marabit karung na marcorak garis-garis, lidang-lidang (“simetris”), inda dong na bengkok-bengkok, ato na melduk-elduk (“sulur”). Corak na songon i (sulur), misalnya songon gambar ni “ragi kacang” ato “bungo-bungo”, ima corak ni abit ni dadaboru: bujing-bujing, umak-umak, atope na tobang-tobang dadaboru. Anggo dadaboru leng umbahat do sumbayang di suro, tai pala adong malom pangajian (manangion kaji ugamo sian guru mangaji: “ustadz”) ro dei alak na sahutai manangion kaji, biasona ibaen malom Jumaat di musojit godang.

 “Andigan ko mulak tu Eropa, Ranto?” Ning tulang nia si Torop marsapa dompak pasuo alai di jolo ni musojit i dung salose sumbayang.

“Anggo inda adong alanganna Tulang, poken naro”, ialusi si Ranto.

“Bo, aso do ipas na?”Marsapa mulak tulang nia i.

“Cutingku sabulan maia, so ulang tarlambat karejo, jadi poken na ro  angkon na mulak do au”, ning si Ranto.

“O …, songon i pe, ro ho tu bagas, so markopi ita, nantulang mu pe por do roa nia pasuo dot ko!!” Ontang-ontang ni Tulang nia.

“Insya Allah, Tulang”, ialusi si Ranto salaos alai mardalan palan-palan marudur mulak tu bagasna be.

Satonga pardalanan, lewat ma alai pas di jolo ni lopo ni bayo lubis i, ima lopo ini amang ni si Parlaungan. Di bagasan ni lopo i tarida bahat ama-ama dohot tobang-tobang dompak mangecek-ecek salaos minum kopi atope mangan goreng na milas-milas. Atia nida alai si Ranto lewat udur dot Tulang na si Torop, sian bagasan ni lopo i mangkuling mada Amangboru nia si Jatumaya:”O … Ranto, ro amu tu son, so mangan goreng kita!!!”.

Rontong alus ni si Ranto: ”Olo Amangboru, ro pe au, mulak au jolo tu bagas, manggonti salin jolo au!!”.

Somalna, angka na poso-poso di huta i, alang do roa ni alai masuk apalagi juguk-juguk di lopo ni na tobang-tobang i. Bope di atia i si Ranto on poso-poso dope, tai arani madung lolot boti dao muse pangarantoanna, jadi por mada roa ni na tobang-tobang on mambege carito atope pangalaman ni ibana di ranto ni alak na balok an, tarlobi-lobi dung do ia manjalaki hangoluan di Eropa: ima banua inganan ni sada bangso na maju boti kayo, tapi nasun bahat beso ni paradatanna dot alak kalai na mian di luat Mandala Holing.

Inda pe abis pusuk nai idup ni Amangboru nia i, madung muldop si Ranto di pintu ni lopo i. Dung masuk ia tu bagasan lopo i, i jalangi ia antong sude angka ama-ama dohot tobang-tobang na adong di si. Dung i, amangboru nia mangkuling: “Ranto, pajuguk i son, di lambungku. O … amang ni si Laung, baen jolo kopi di si Ranto!!”.

“Olo ma angkang, kopi paet do sanga kopi manis?” Ialusi bayo parlopo i.

“Kopi manis mantong, na bia do ho!!!” Nning amangboru nia.

“Ma piga taon ko di Eropa dung do tomet sikola SMA di ita on adi?” Ro sapa-sapa ni Amangboru na.

”Dalan opat taon ma ba, Amangboru”, dialusi si Ranto.

”Aha do sabotulna karejo muyu di sadun?” Marsapa muse Amangboru nia i.

”Sasue dohot sikolangku, ima pareso masin ni kapal torbang, muda adongtong na sego ita pature so bisa mulak mabang”, ning si Ranto.

”Olo baya, pade ma i. Tai ubege-bege nadung adong do boru Eropa dongan sarosumu. Bo, songon dia mai boru tulangmu nai huta on?” Mangarsak Amangboru nia.

”Anggo satontang tusi da Amangboru, Tuhan do na kuaso, iba na marusaho maia, sanga songondia incogot-aduan, ita sorahkon ma tu na SADA i”, ning si Ranto antong.

Mikim boto Amangboru nia mambege alus ni si Ranto i: rupana isi dope, indape na mago, leng na lokot dope ajaran boti pituah nami di bagasan ni ulu nia, songon i ma obar na dong di bagasan roa ni Amangboru nia i.

Marsapa muse parudaon nia si Jarintop: ”Bahat do alak kita di sadun? Butong do ho nian na mangan roti i sajo?”

Ro alus ni si Ranto: ”Bahat juo do donganku sian suku-suku na lain, bope na sian Jawa, Kalimantan, Sulawesi atope alak Papua. Tai anggo sian Sumatera on inda piga alak kami. Adong na sian Karo, Simalungun, Pakpak, Toba, Angkola, Sipirok, Padang Bolak, Nias, oni au mantong sian Mandailing. Anggo dina mangan, songon dia pe antong angkon namanyoseon diri do iba. Sasakali nian kehe do au tu KBRI muda malungun kulala mangan indahan dot sambal ikan tori”.

Dungi i patorus si Ranto muse: ”Dung do bahat pargaulan niba dohot jolma na marmocom-mocom di ranto an, adong do dua-tolu bingkolang na salalu manggitik-gitik utok-utokku, tarlobi-lobi antong tarjot-jot muse do iba mamasa buku-buku sejarah dohot budaya ni bangso-bangso na adong di ginjang dunia on, atia adong woktu na luang. Muda upasari-sari, tarotama satontang tu ita sude na marombar balok di Sumatera Utara on, aha nai tuliskon ni alak Eropa, bope alak kita, satontang tu alak kita, inda boto sude masuk diakalku nai pardok ni alai i. Indantong arani cimburu atope arani milas ni boltok niba muda hum maju alak na balok i. Biama antong, sian pargaulan niba dohot alak-alak na baloki, taraso do boto di bagasan roa niba bahaso iba inda na sarupo iba dohot alak-alak na balok i. Muloi do sian parroa, caro pangkuling, marpikir, markoum-sisolkot, markobar, markorja, santak tu na margondang. Biama anso songon i, arana mulai sian menek niba santak tu magodang, uraso-rasoi boti muda upikir-pikirkon manat-manat, i sude arani kapurcayaan, paradatan, bope pituah-pituah nai ajarkon amang-inang nami dohot koum-sisolkot niba sasudena memang marbeso dohot na adong di alak-alak na mian di ombar balok taon. Di itaon, rupana ombar do adat dohot ugamo, on mada mungkin namambaen kita marbeso sian koumta alak-alak na baloki”.

Polngit santongkin, dung i ”… uhuk … uhuk … uhuk …” tarbege sora ni batuk ni sada bayo na tobang na juguk di lambung ni Tulang nia si Torop. Rupana na batuk-batuk i sada bayo na tobang, natoras ni huta i, mora ni mora ni si Ranto. ”O … parlopo, buat jolo aek na bontar i ambaen di Tulang nami on!! Ning Amanguda nia si Jarintop. ”Yabo, ro ma”, ning ayah ni si Laung, parlopo i

Dung isirup ia saotik kopi nia i, mangkuling muse ma si Ranto mulak: ”Songon i peda, ulang isangko simatobang nami bahaso ami na poso on madung bahat parbinotoanna satontang tu paradatanta di huta on. Bahat dope na so ami boto. Dibaon dompak marlagut angka simatobang nami, namora natoras dohot raja i di son muse dompak lagut, por do roa nami marsapa saotik, ima satontang tu Sopo Godang, aso do inda mardinding?”.

Ro alus ni natoras ni huta i: ”Sapambinotoanku, Sopo Godang i inganan parpokatan namora-natoras dohot raja i. Aso do inda mardinding, maksudna anso binoto alak na sahuta on aha sajo nai pokatkon di si, songon dia pardalanan, santak tu hasilna ima kaputusan na rap samo-samo i olo on angka namora-natoras. Bolas dokonon, ira-ira tarsongon DPR mei di maso sannari on”.

Dungi, marsapa muse si Ranto: ”Aso do dakdanak alaklai ita pio si Lian ?

Dialusi natoras ni huta muse antong: ”Satontang tu ”si Lian”, i kapondokan ni hata ”dalian” do i. Adong juo do antong namamabaen gorar ni pinompar alaklai na “si Dali”, i pe kapondokan ni hata “dalian” i dei. Ahama arti ni hata ”dalian” on, ima ”tumpuan”, inda ”tungku” ba artina. Jadi muda alak kita didok maradat ”Dalian Na Tolu”, artina adat na ita obankon i adong ”tolu tumpuan” na: ima ”Mora”, ”Kahanggi”, dohot ”Anakboru”. Tumpuan na tolu on tarjadi arani adong namarbagas ita na markaoum-koum na marlainan marga, oni muse arani adong ita na ”sadaro” ato ”samarga” ato ”saompu parsadaan”. So denggan mardalan adat ”Dalian Na Tolu” i, ibaenma aturan satontang tu ”hak dan kawajiban” na masing-masing, ima: ”mora i ulu bondar”, ”kahanggi i jait domu-domu”, oni ”anakboru i sitamba na urang siorus na lobi”. Dung i, so ulang mago adattai, ibaen muse ma aturan na lain, ima: ”sangap marmora”, ”elek maranakboru”, dohot ”manat-manat markahanggi”. Muda ita pareso ”tataring” nai dapur ni bagasta i, ”batu-batu” na adong di si goarna ”dalian”, di ginjang nai ma ipatibal ”udon” atope ”kuali” muda inanta marmasak, jadi ”dalian” nai ”tataring” i bolas didokon ”tumpuan”, inda ”batu” nai ba, guna ni batu i do antusanna.  Muda ”tataring” i antong bolas juo didokon ”landasan” ni ”dalian” i. I mada boto anso pinomparta dadaboru ita pio ”si taing”, kapondokan ni sian hata ”tataring”, boti inang ni ”si taing” on biaso muse do antong di pio amang ni ”si taing” dohot hata ”induk ni tataring”.

Markerut boto boi ni si Ranto dung manangionsa, salaos manatap lampu tarongkeng na sangkot di langit-langit ni lopo i, marsapa-sapa di bagasan ni roa nia: ”Aha dope luai nangkan sapaon tu natoras ni huta na bisuk on”? O … madung u ingot mulak, adong dope sada nai na porlu i sapaan.

”Tola dope marsapa, tulang?” Ning si Ranto.

”Tola mantong, aha muse na get sapaon mi, Lian?” Ning natoras ni huta i.

”Satontang tu marga dohot huta. Arani muda ubandingkon dohot huta-huta na adong di alak na balok an, marbeso do mungkin dohot huta-huta na adong di ita on. Di satiop huta di ita on, rap lagut ita sude na markoum-sisolkot: adong Lubis, Nasution, Parinduri, Daulae, Batubara, Matondang, Pulungan, Hasibuan, Rangkuti dohot Tanjung. Mungkin adong do partalianna dohat adat ta Dalian Na Tolu ato adat Markoum-Sisolkot i?

Ro alus ni natoras ni huta i: ”Tontu mantong, bere. I sude nai na martali-tali dei, inda bisa igotap-gotap. Misalna, songondia ita pajonjong sada horja godang di huta on muda alai Lubis i maia misal na mian di huta on !!! Ise na mangatur dohot mangarahkonsa, oni ise muse na mangkarejoonna. Na jolo, muda get mamungka huta, ”tumpuan na tolu” i: mora, kahanggi dohot anakboru, angkon na adong, inda bisa inda. Dung i, angkon adong muse raja panusunan bulung dohot namora-natoras ambaen uluanta. Oni adong muse ulu balang na manjago-jago raja i di Bagas Godang an dohot sude alak di huta on. Salain i, adong muse antong Datu dohot Sibaso. Muda Datu on na jolo tardok do on ”gudang ni elmu” (”traditional wisdom”) arani bahat boti luas ni parbinotoan ni ibana, na santak bahat jaotna di ita sude alak huta on. Sibaso antong gunana jadi parantara antara ita na mangolu dohot naso nida, tarmasuk arwah-arwah ni ompungta nadung jumolo sunduti, ambaen parsapaan misalna aso do ro bala na mambaen alak di huta on bahat na marnyae dompak i, oni bisa muse antong i sapaan sanga songondia do baenon anso mantak boti ulang ro be bala i incogot aduan”.

”Muda satontang tu na margondang, Tulang?” Marsapa muse si Ranto.

”Bo, inda pe na abis sapaonmu rupana, martamba-tamba, antusi jolo le amangboru na, margonti ita, umboto do ho i bayo parudong-kudong?” Ning ibana tu amangboru ni si Ranto na juguk di lambung ni natoras ni huta i.

Ro ning amangboru nia: ”Ho pe da antong Ranto na bahat ma sapa-sapamu. Ahama gunana dio mamboto uti-utian ni alak kita, arana ho sada-sada insinyur masin ni kapal torbang, boti parkarejoanmu pe di banua Eropa, inganan ni alak na maju, na kayo, na modern i, na madung marpupu tu bulan an!!!”.

”Anggo di au porlu situtu do amangboru, arana songondia pe songondia, sotik bahatna angkon na binoto juo paradatan ni bangso niba, tandona iba alak Mandala Holing, tarlobi-lobi iba nangkan matobang juo do pala so dong caritoon tu pinompar niba saulakon”, ning si Ranto.

”Tutu madai mora nami,” dungi i patorus amangboru nia: ”Unjung do le ibege ho alai dakdanak nai huta on markuling-kuling anca: tak sipatuktak tolu indena, aha mai?”

”Anggo i uboto dei amangboru, anca: alak na mangordang dompak manyuan eme, jegang, atope kacang di hauma!” Ning si Ranto.

”Jeges mai anggo madung i boto amu antusan na,”  dungi i patorus amangboru nia muse: “Songon nai pajojor natoras ta nangkinondi, adatta “Dalian Na Tolu” ato adat ”Markoum-Sisolkot” i, adong tolu “tumpuan” na ima: mora, kahanggi dohot anakboru. Muda ita pasari-sari muse antong gorar-gorar ni gordang na adong di gordang sambilan, ima uning-uningan ni ompunta na parjolo sundut i: adong na margorar: eneng-eneng, udong-kudong, paniga, panulus dohot jangat. Oni, biasona adong muse etek na tibal igincat ni jangat i. Satontang tu son, jotjot muse do rap tabege obar ni ompung-ompungta na jolo na bisuk-bisuk i, ima: opat ganjil lima gonop (”empat ganjil lima genap”). Bo, anggo di ginjang dunia on da, sapambotoanku, alak kita maia na mandok songon i. Biama so songon i, anggo di ita on, ”opat” (”empat”) ita dok ”ganjil”, ”lima” ita dok muse ”gonop”: jadi balik artianna sian parbinotoan ni alak-alak na balok na adong i dunia on. Purkaro na targaduk on (”opat ganjil lima gonop”), ning roangka, anso rap ita boto artianna, ita pareso musema burangir adat nai surduon ni anakboru tu adopan ni mora ni mora ni ibana, misalna di atia pajongjong adat manyapai boru atope di na patibal sere. So tardok ”burangir adat” angkon na singkop, angkon adong: (1) burangir, (2) pining, (3) itak, (4) gambir, (5) timbako, rasona marlain-lain, dung i pangan kaluarma aek na rara tarsongon mudar ni jolma. Di na manyurdu burangir i, muda inda singkop, misalna inda adong pining ato timbakona, bulusma i mangkuling suhut nai bagas  i: ”Na ganjil ma antong burangir adat nai surdu muyu on, pature amu mulak, angkon na singkop do, anso ami tarimo haroro muyu di bagas on!!!”. ”Olo ba, angkon nai pature muyu dei,” ning morana muse sapokat dohot angka barisan hatobangon na adong di bagas i. Sapanjang nau pardokon on, adong do pe na so mangarti amu mora nami, bayo sipangaranto?”.

Ro alus ni si Ranto: ”Anggo satontang i, madung mangarti do au arani torang na panyise ni amangboru. Jadi sude na martali-tali do u ida aha-aha na adong di adat-istiadatta. Hangoloan ni alak kita dina na marsaba misalna, tontu angkon adong bondar-bondar ambaen dalan ni aek tu sabanta anso jeges tubu ni eme. Arani i, na porlu botul misalna angkon adong ulu bondar na. Songon pondak ni natarosta nangkinondi, ”mora i ulu bondar”, jadi artianna mungkin hira-hira mora niba i ma na mangalehen ”dalan” (boru nia) anso bisa iba marpinompar sahinggo alak kita leng totop adong boti torus murmurmabahat di portibi on. Muda kahanggi diibaratkon jait domu-domu, artina kahanggi ato sisolkot i ma na patomuon boti palokot iba dohot mora ato koum niba. Arti ni ”anakboru siorus na lobi sitamba na urang”, anggo inda au sala,  anakboru ma namalaksanaon karejo niba. Anso bisa tarlaksanaon sude angkon na ”sangap do marmora, elek maranakboru, manat-manat markahanggi”. Muda upasari-sari muse, tarsarupo do on artianna dohot goar-goar ni gondang na adong di saraban gordang sambilan. Pandok ni alak Eropa dohot Amerika, gordang sambilan taon tarmasuk mon ”alat musik (drum chime)” na paling godang, boti ”musik tradisional” na paling ”ganjil” (”komplikasi ritmis serta meter yang saling tumpang tindih”), di dunia on”.

”O … amang ni si Laung, adong dope goreng na milas di si !!!” Ro sapa-sapa ni sada namora ni huta na adong di lopo i. Ro alus ni bayo parlopo i: “Yabo raja nami, ayuara na godang parsilaungan, adong do na baru masak, ro ma !!”.

Dung ro bayo parlopo i pataru goreng na milas i tu jolo ni raja i, oni si Jalotup mangkuling tarpalan tu bayo parlopo i: ”Tamba jolo le aek ni kopingkon, murmararat-ratat boti murmatagi do ubege carito on”.

Ro alus ni si Retuk na mambege obar ni si Jalotup i :”Bo tamba aek do langa, paila-ilaon,  baen susu i sagalas ambaen di sia, au pe manggayarsa, tai ba poken na ro do ita maretong, sannari tuliskon jolo!!!”

“Khak … khak … khak … khak … khaaaaak, lagak na i lala ho ale bayo parutang!!!” Ro arsak ni si Jalotup.

”Roamu ma di si Jaontip, angkon na minum susu dobo iba, anso sehat dot pistar songon si Ranto, ulang leng sai nong-nong kopi paet i, gombung naron bituamu !!”, murmilas roa ni si Retuk. Mai bayaran susu nia, ulang ma jolo mandok tarimo kasi, balosanna obar na mambaen ancit ni roa niba muse do.

”Antak kamu i, na tarsarupo do amu na dua, angkon na sangko do dabo ita tu angka namora-natorasta, tarlobi-lobi rajanta na dompak rap dot kita di lopo on”, ning sada halak natoras ni huta i. Mambege obar ni natoras ni huta i, rap unduk be antong si Retuk dohot si Jalotup, ila roa ni alai nadua.

Anggo raja i antong mikim-mikim ia soni, angke na dung binoto ibana do parange ni bayo nadua i, adua  na rap dot ibana do di huta i muloi sian dakdanak santak tu matobang na.

”Adope Ranto, i ta pangan goreng on, tabo dompak milas-milas”, ning Raja i.

”Yabo, raja nami”, alus ni si Ranto.

Dungi marsapa ia tu raja i: ”Adong do boto saotik sapaonku di raja i”, ning si Ranto.

”Aha mai, Lian”, ning Raja i.

”Di bindu matoga-matogu ni Bagas Godang dot Sopo Godang na di huta on, adong gambar-gambar na lidang-lidang, oni marbolang muse na lomlom, na rara, dot na bontar. Sabutulna aha do artina sudena i, raja nami”, sapa-sapa ni si Ranto.

“Sudena lambang-lambang na adong di Bindu Matoga-Matogu i, adong dei artina, ima satontang tu paradatan, harajaon, markoum-sisolkot, marsaba dohot na asing-asing: pokokna satotang tu sude angoluanta di huta on. Anggo arti ni lambang-lambang i nangkon upajojor be, sapaima tu angka namora-natoras na adong di huta on. Na porlu ita sise: aso do lambang-lambang nai Bindu Matoga-Matogu i umumna lidang-lidang (”simetris”), inda dong na melduk-elduk, misalnya songon lambang ni bona bulu, pusuk ni robung, aropik, sipatomu-tomu, bintang na toras, rudang, raga-raga, sancang duri, jagar-jagar, bondul na opat, atope alaman bolak silangse utang. Sapulu taon na solpu, adong sada alak ruar na marsikola ro tu huta on. Dung i pamata-matai ia Bindu Matoga-Matogu i, i dokon ia tu ami bahaso lambang-lambang na lidang-lidang (”simeteris”) na songonian tarmasuk do paradaban ni jolma na paling tobang di dunia on. Aha artina i, na dung marsikola tinggi do ho antong Lian, madung binoto ho do i sanga aha artina i”, ning Raja i.

Mopeng doma ulu ni si Ranto dung mambege nai obarkon ni raja i. Dung i, ia mangguk-angguk. ”Bole baya, nadung tobang ma rupana bangsonkon, tapi aha do so leng rarat boti mangae bangso nami di banua na bolak on”, ima obar na ro di bagasan roa nia, bulus munduk ia, rupana get manetek ilu sian simanyolong nia pasari-sarina. Arani i, marsak boti jalak-jalak mada roa nia.

”Bo, aso do munduk ko, Lian?” Marsapa raja i.

”Inda sanga mangua ba raja nami, nangkin taringot au saongok tu alak Eropa nadung bisa mambaen kapal torbang, na maroban kalai tu dia-dia, sanga tudia giot ni roa ni alai di ginjang tano on. Songoni muse antong kamajuan di bidang ”teknologi-informasi”, dung ibaen kalai muse ”komputer” dot ”internet”, alai bisa mangecek-ecek sian banua na sada tu banua na lain, oni muda alai marbuniaga pe inda angkon na pasuo badan saudagar na tinggal di Eropa dohot kongsi dagangna na mian di Amerika, sude momo boti mura. Dao botul besona sian kadaanta sannari di son”, ning si Ranto.

Rontong alus ni natoras ni huta i: ”Anggo i da, hamu na poso-poso i doma na bisa mamikirkon i sudena, biama so mur mamaju alak kita on. Anggo sian kami na dung martungkot-tungkot on, do’a dohot olong ni roa maia na tarlehen di homu, anggo gogo inda na dong be. Bope songon i, sumangot leng gara dope nian, boti leng por dope roa nami mangida alak kita rap maju incogot-aduan, songon bangso-bangso na dung maju di maso sannari on. Taiba, angkon na leng ita ingot do Tuhanta Na Kuaso i, anso ulang ita halalkon sagalo cara dina manjalaki sinadongan i. Muda get maju angkon na rap maju do ita sudena, ulang hum na sada-dua alak sajo maia na maju, songon na tarjadi maso sannari on di ita on. So bisa songoni, sapanaili sapangambe, salumpat saindege, sahata saoloan, mate mangolu sapartahian ma ita, boti angkon na marsiolong-olongan do anso rap maju alak kita on sasudena”.

Mangguk-angguk antong si Ranto, boti iraso-raso ia songon na ro mulak sumangot dohot tondi tu badan nia dung itangion ia manat-manat aha-aha nai obarkon ni angka namora-natoras dot raja ni huta nalai i.

Habis mangecek natoras ni huta i, polngit satongkin, rap sip be, rap marsitatapan alai sude nai lopo i: adongtong na mikim-mikim, adong na unduk, adong juo na manyirup kopi salaos mangidup pusuk marbual-bual, adong muse antong na mangan goreng.

Mangkuling muse natoras ni huta i: ”Biado Ranto, torang ma di ho sanga songondia adatta ”Dalian Na Tolu” i, sudena martali-tali, muloi do sian caronta markoum-sisolkot, mamungka huta, pajonjong horja, santak tu na margondang di banuan taon !!!”

Mangguk-angguk antong si Ranto salaos manalihon boi dot manatap mata ni amangboru nia.

Rontong ning amangboru ni si Ranto: ”Aha na ipajojor angka namora-natorasta nangkinondi, tardokma i ”batu-batu” ni paradatanta. Salain i, porlu do utambai saotik. Aha mai, ima satontang tu adil dohot reso na alak kita dina markoum-sisolkot i. Sannari au amangboru mu, hamu mora nami. Taiba, tu koum na lain, au amangboru muyu on jadi mora ni alai muse. Oni musengtong, au on jadi kahanggi ni sisolkot nami. Pondok ni hata, satiop alak kita di sada maso bisa jadi mora, di maso na lain jadi anakboru, atope kahanggi. Satontang tu son, pareso ma jolo sanga adong dei di dunia on na botul-botul sarupo paradatan na dohot alak kita, ima ”Dalian Na Tolu” na adil boti ringkas !!!”.

Bulus mangkuling raja i: ”Imada anso binoto ho Lian, godang na joi, paradatan ni alak kita on. Ulang be ita songon beo. I pareso jolo boti i pikirkon manat-manat. Anggo sanga songondia do anso sude alak kita rap maju, amu na poso-poso i doma usuk nami, amu ma mamikirkon dohot pature-turesa !!!”

”Olo … tutu mada nai pardok ni raja i, ayuara na godang parsilaungan ta on, mudah-mudahan nian, dohot ijin ni Tuhanta na denggan roa i, rap ita ida dope ari natorang incogot ni ari !!!” Ning sada alak natoras ni huta i.

Sasaulak do nian raja i mangkuling, taiba boto na lobi lanom boti masuk tu bagasan ni roa niba. Ro alus ni si Ranto: ”Yabo raja nami, satontang tusi antong porlu do angka namora-natoras dohot raja nami ambaen tungkot di nalandit boti sulu-sulu di na golap, di ami na poso-poso on!!!”

”O … amang ni si Laung, milop-ilop uida lampu tarongkeng taon, porlu mai pompa jolo so torang mulak !!!” Ning si Jalotup tu bayo parlopo i.

”Alaaa ... amu ma mamompasa, tolong jolo, dompak mangisi miak ni colok au”, ning parlopo i.

”Pompa bontong, songon alak na balok muse ibaenko ibamu”, arsak ni si Retuk.

”Alah, nabahat naiboto mu, ho langa monga,” i balos si Jalotup muse, rap marsitune-tune an kalai na dua.

Ehem … mandehem sada bayo na juguk di siambirang ni si Retuk, dungi ia mangkuling: ”Santabi di hatobangan dohot raja nami, lain ma jolo kecek i, adong do sada bingkolang na leng solot di ate-atengku. Aha mai, ima goso ni ”alak Barat” na marulak-ulak tu Bulan, epeng ni alai marabis-abis tu si. Pandok ni alai, paresosa sanga bisa do alak mangolu di Bulan!!!”.

“Tarsongoni dei dabo parange ni alak na marepeng, manjalak-jalaki padang tambalalonna !!!” Jauk-jauk si Jalotup.

Ro ning si Retuk: “Ulang ko se jauk-jauk songon Jamonis, pikirkon jolo so mangkuling!!!”

Itambai ia muse: “Songon na so iboto ho sanga ise na mangkuling i, guru IPA di SMA nai lombang Tor Siojo an dei !!!”

Mikim-mikim antong guru sikola i paida-ida hadua bayo na so unjung top on: “songon aek tu miak”.

Mangkuling muse si Jalotup: “Aropku dabo, aso do goso na alai sampe marulak-ulak tu Bulan, arani alai markagiot tinggal di Bulan dung kiamat dunia on. Antargan so kiamat dunia on, kehe ma alai mabang tu Bulan, tinggal ma le ita na pogos on leng di son !!!”

”O … manuk tinggiran, inda luai na ma injang tu pangaroaimi?” Ning si Retuk.

“Bahat contona !!!” Ning si Jalotup. Dung i, i patorus ia muse: “Na jolo, ompungta i mardalan pat do tu Doli, marbulan-bulan so tolap. Anggo sannari, dung adong motor bus, marangkat potang lalu manyogot tu Doli. Conto na sing, kan pupu do ho martalipon dohot baberemu parwarung nai Jakarta i, salaos mangido epeng ambaen panabusi ni idupon mu dot parkopi mu di lopo on?”.

Ro antong ning si Retuk: “Nangkon pe upaido leng nai tongoskon nia dei tiop bulan !!!” Mur milas roa ni si Retuk paida-ida si Jalotup.

“Uhuk … uhuk … uhuk … “, rupana batuk-batuk raja i, bulus sip alai na dua, i antak kalai antong na marsirisaan i.

Inda sadia lolot dung i, mangkuling ma raja i: ”Assalamu’alaikum, muli mada ami parjolo, incogot manyogot na get pareso bondar ni saba olettai dope tu Aek Coro  !!”

”Yabo, Raja nami”, alus ni alak na di lopo i sadebana.

Dung kaluar raja ni huta i sian lopo i, muldop musema ulu ni si Binsar i di tingkap ni lopo i.

”Bo, naison do ho langa Ranto, jalak-jalak boto amangboru Saleh, ro ia nangkin tu bagas, arani lungun ni roa nia get pasuo dot ko salaos giot mangecek-ecek dot ko,”, ning si Binsar.

”Olo angkang, au pe na muli mon tu bagas, uabiskon jolo kopingkon“, dialusi si Ranto.

”Assalamu’alaikum, tarimo kasi tu angka namora-natoras nami sudena, incogot aduan leng ro dope au marsapa-sapa satontang tu paradatan atope uning-uningan ni ompunta na parjolo sundut i”, ning si Ranto salaos mangido isin muli tu bagas.

”Olo mada Ranto, andigan sajo haroromu, bukak do pintu ni bagasta”, ning sada natoras ni huta i.

Ari pentong madung bagas borngin, sada-sada marmulakan muse ma alai nai lopo i tu aratak nabe. Dungi modom sinok, sodong gogo dot sumangot dina marusaho incogot ni ari, bope na tu saba, mangguris tu kobun apea an, tu kantor, mangajar anak sikola, marbuniaga tu poken, atope manjala gulaen di Batang Gadis an.

***

Boa-boa: Carito on inda sejarah on, inda buse antong kisah nyata. Pula adong na sarupo goarna dohot tokoh-tokohna i na kebetulan sajo dei, inda na disangajoi, so suman dei carito ni alak kita Mandailing.